Байгаль орчинд ээлтэй, ах дүүст маань тустай ногоон хөгжлийн бодлого

Хүн төрөлхтний дэлхийд учруулж байгаа хор уршгийг Ехова Бурхан удахгүй үгүй болгоно гэдгийг Гэрчүүд бид мэддэг (Илчлэл 11:18). Тэр цаг иртэл бид газар дэлхийгээ хамгаалахын тулд чадах бүхнээ хийнэ. Хийсээр ч байгаа билээ. Жишээ нь бид ногоон хөгжлийн бодлогуудын дагуу барилга байгууламжаа барьж засварладаг.

Ер нь ногоон хөгжлийн бодлогууд гэдэг нь байгаль орчинд үзүүлдэг муу нөлөөг багасгахад чиглэсэн төслүүдийг хэлдэг. Бид ямар ямар ногоон хөгжлийн бодлогыг хэрэгжүүлсэн бэ? Энэ нь хандивыг ухаалгаар зарцуулахад хэрхэн тус болсон бэ?

Чуулганы танхимыг агааржуулах шийдэл

Мозамбик дахь Матола чуулганы танхим нь анх ханагүй, саравчин хэлбэртэй баригдсан бөгөөд дээвэр нь төмөр байжээ. Тиймээс дээвэр нь наранд халахаар танхим маш их халуун, бүгчим болдог байв. Нутгийн нэгэн Гэрч: «Танхим их халуун болохоор бид маш их хөлөрнө. Хөтөлбөр дуусангуут л цэвэр агаар амьсгалж сэрүүцэх гээд гадагшаа яаран гардаг байж билээ» хэмээн ярьжээ. Итгэл нэгтнүүдээ чуулганыхаа хөтөлбөрийг таатай орчинд сонсоход нь зориулан бид юу хийсэн бэ?

Бид ногоон хөгжлийн бодлогыг хэрэгжүүлэхээр шийдэн дээвэрт тусгаарлагч хийж салхиар ажилладаг сэнс суурилуулсан. Тусгаарлагч нь танхим руу орох нарны элчийг багасгаж, сэнс нь агаарын солилцоог сайжруулжээ. Сэнснүүд цахилгаанаар бус харин салхины хүчээр ажиллан танхимын халуун агаарыг гадагшлуулдаг бөгөөд тус бүр 50 ам.долларын үнэтэй.

Ийм арга хэмжээ авснаар чуулганы танхимын агааржуулалт сайжирч, чийгтэж мөөгөнцөртөх нь эрс багассан. Мөн танхим дахь нүүрстөрөгчийн хэмжээ багасаж, хүчилтөрөгчийн хэмжээ ихэссэн. Үүний ачаар чуулганд хүрэлцэн ирэгсэд тав тухтай орчинд, хөтөлбөрөө илүү анхааралтай сонсох боломж бүрдсэн юм. Дээр дурдсан Гэрч: «Одоо бид хөтөлбөр дуусангуут яаран гардгаа больсон. Шинэ дээвэртэй болсон чинь танхимдаа өдрийн хоолоо идээд, найз нөхөдтэйгөө ярьж хөөрөөд, яг л том модны доор сэрүүцэн сууж байгаа юм шиг сайхан байгаа» хэмээжээ.

Сэргээгдэх эрчим хүч ашиглах

Еховагийн Гэрчүүд янз бүрийн улс оронд байдаг барилга байгууламждаа фотоволтайк систем буюу нарны цахилгаан үүсгүүр хавтан суурилуулсан. Энэ нь нарны гэрлийг цахилгаан болгон хувиргаж сэргээгдэх эрчим хүчийг бий болгодог юм. Үүний ачаар байгаль орчинд хор хөнөөлтэй материалаас гарган авдаг цахилгаан эрчим хүчний хэрэглээ багассан. Уг нарны цахилгаан үүсгүүр нь байгаль орчны бохирдлыг багасгахаас гадна хандивыг хэмнэхэд их тустай.

2023 онд Словени салбарт фотоволтайк системийг суурилуулсан. Энэ нь тус салбарын барилга байгууламжид хэрэглэгдэж буй цахилгааны 30 хувийг хангадаг. Хэрэгцээнээс илүү гарсан цахилгааныг нутгийнхны хэрэглээнд зориулж байгаа. Уг системийг суурилуулахад 360 000 ам.доллар зарцуулсан боловч хэмнэгдэх цахилгааны төлбөрөөр уг зардал дөрвөн жилийн дотор нөхөгдөнө.

2024 онд Шри Ланка салбарт нарны цахилгаан үүсгүүр хавтангууд болон томоохон хэмжээний зай хураагуур суурилуулсан. Энэ төсөлд 3 000 000 ам.доллар зарцуулсан бөгөөд салбарын цахилгаан хэрэглээний 70 хувийг хангах боломжтой болсон. Ингэснээр гарсан зардлыг гурван жилийн дотор нөхөх юм. Мөн өнгөрсөн жил, Нидерланд салбарт фотоволтайк системийг суурилуулсан. Үүнд 1 100 000 ам.доллар зарцуулсан бөгөөд энэ нь салбарын нийт цахилгаан хэрэглээний 35 хувийг хангаж байна. Уг зардал есөн жилийн дотор нөхөгдөх юм.

Мексикийн хэд хэдэн орчуулгын алслагдсан оффист фотоволтайк систем суурилуулсан. Чиуауа мужид байрладаг Тарахумара (төв) хэлний орчуулгын оффисын жишээг үзье. Тэр бүс нутгийн цаг агаар өвөлдөө хасах хэмд хүрдэг ч зундаа 40 градусаас дээш халдаг. Цахилгааны төлбөр өндөр гардаг учраас ах дүүс маань халаалт ба хөргөлтийн төхөөрөмжийг хэрэглэхээс зайлсхийдэг байв. Уг оффист ажилладаг Жонатан: «Өвөл болохоор бид зузаан хувцаслаад бас нөмрөх юм авчирдаг. Харин зун нь цонхоо дэлгэж салхи оруулдаг байсан» гэжээ.

2024 онд суурилуулсан энэхүү систем нь 21 480 ам.долларын өртөгтэй ч таван жилийн дотор зардлаа нөхнө. Одоо ах дүүс маань халаалт, хөргөлтийн төхөөрөмжийг байнга хэрэглэх боломжтой болсон. Энэ талаар Жонатан: «Бид үүргээ илүү баяр хөөртэй биелүүлж улам бүр үр бүтээлтэй ажилладаг болсон. Мөн байгууллага маань хандивыг байгаль орчинд ээлтэй зүйлд ухаалаг зарцуулдаг гэж бодохоор бидэнд сайхан санагддаг» гэж ярьжээ.

Борооны усыг ашиглах

Африкийн зарим цуглааны танхим цэвэр усны хангамж бараг байдаггүй. Тиймээс ах дүүс маань хэдэн км зайтай газраас танхим руугаа ус зөөдөг. Зарим танхимд зөөврийн ус худалдаж авдаг бөгөөд энэ нь өндөр үнэтэйгээс гадна байгаль орчинд төдийлөн ээлтэй биш юм.

Ах дүүсээ устай залгуулахын тулд Африк дахь цуглааны танхимуудад борооны усны хаялга болон нөөцлүүр сав суурилуулсан. Суурилуулахаасаа өмнө орон нутгийн цаг агаарыг нарийвчлан судалж тухайн танхимд хамгийн тохиромжтой шийдлийг сонгосон юм. Цуглааны танхимуудаас хамааран 600 ам.доллароос 3 000 ам.доллар зарцуулсан. Ингэснээр усны зардал хэмнэгдэж үүний ачаар танхимуудын үйл ажиллагааны зардал багасжээ.

Борооны усыг нөөцлөх энэхүү шийдэл итгэл нэгтнүүдэд маань их нэмэр болж байгаа. Мозамбикт амьдардаг Ноемиа хэмээх Гэрч бүсгүй: «Бид өмнө нь ус авах гэж их хол зам туулна. Тэгээд усаа аваад танхимдаа буцаад ирэхээр ямар ч тэнхэлгүй болчихсон байдаг байлаа. Ус хомсдолтой болохоор ариун цэвэр сахина гэдэг их амаргүй асуудал. Одоо бол бүгдээрээ гараа төвөггүй угаах боломжтой болсон. Бас ус авах гэж ядралгүй хөтөлбөрөө сонсоод сайхан байна аа. Та нартаа маш их баярлалаа!» хэмээжээ.

Ийм ногоон хөгжлийн бодлогыг хэрэгжүүлэхэд санхүүжилтээ хаанаас гаргадаг вэ? Дэлхий дахины үйл хэргийг дэмжихэд өргөдөг хандиваас гаргадаг бөгөөд ихэнх нь donate.jw.org сайтад янз бүрийн аргаар өргөсөн хандив байдаг. Өгөөмөр сэтгэлтэй та бүхэндээ баярлалаа!