Еховагийн хонинуудыг халамжлах «хүн бэлгүүд»
«Дээш гарахдаа, Тэр олон хоригдол олзлов. Тэр хүмүүст [хүн, ШЕ] бэлгүүдийг өгсөн» (ЭФЭС 4:8).
1. Христосын шашинтан нэгэн эгч хурлын ахлагч нарынхаа тухай сэтгэгдлээ хэрхэн илэрхийлсэн бэ?
«ТА бүхэн биднийг үргэлж санаа тавин халамжилж байдагт их баярлалаа. Та бүхний инээмсэглэл, ямагт биднийг гэж байдаг халуун сэтгэл тань үнэхээрийн хосгүй. Бидний үгийг сонсож, урам зоригийг маань сэргээх үгсийг Библиэс олж өгөхөд та бүхэн хэзээд бэлэн байдаг. Энэ бүхнийг цаг үргэлж санаж явахын тулд би залбирдаг» хэмээн нэгэн эгч хурлынхаа ахлагч нарт бичсэн захидалдаа дурджээ. Христосын шашинтны ахлагч нарын хайр халамж энэ эгчийн зүрх сэтгэлд хүрчээ гэдэг нь уг захидлаас харагдаж байна (1 Пэтр 5:2, 3).
2, 3. а) Исаиа 32:1, 2-ын дагуу өрөвч сэтгэлтэй ахлагч нар Еховагийн хонинуудыг хэрхэн халамжилдаг вэ? б) Ахлагчийг ямар тохиолдолд бэлэг хэмээн үзэж болох вэ?
2 Ехова хонинуудаа халамжлуулахаар ахлагч нарыг байлгадаг (Лүүк 12:32; Иохан 10:16). Ехова хонинуудаа үнэлэдэг болохоор Есүсийн үнэтэй цусаар зольж авсан юм. Тийм болохоор, ахлагч нар түүний сүрэгтэй эвээр харьцахад Еховад тааламжтай байдагт гайхах зүйлгүй (Үйлс 20:28, 29). Ахлагч нар буюу «ноёд»-ын тухай зөгнөлд хэрхэн дүрсэлснийг үзье. «Хүн бүр салхины хамгаалалт мэт, шуурганы халхавч мэт, цөл газрын усны суваг мэт, ангасан газар өндөр модны сүүдэр мэт болно» (Исаиа 32:1, 2). Тийм ээ, тэд сүргийг хамгаалдаг, тэнхрүүлдэг, тайтгаруулдаг билээ. Энэ шалтгааны улмаас сүргийг өрөвч сэтгэлээр хариулж байдаг ахлагч нар маань Бурханы тэдэнд тавьдаг шаардлагад нийцэхийг чармайдаг.
3 Тийм ахлагч нарыг Библид «хүн бэлгүүд» гэж нэрлэдэг (Эфэс 4:8, ШЕ). Ер нь бэлэг гэдэг бол ямар нэгэн хэрэгцээг хангах эсвэл хүнд баяр баясал авчрах зорилготой байдаг. Сүргээ баяр хөөртэй байлгах, шаардлагатай тусламж дэмжлэг үзүүлэхийн тулд өөрийн авъяас чадвараа зориулж байгаа ахлагчийг бэлэг хэмээн үзэж болно. Тэр хэрхэн үүнийг хийх вэ? Элч Паулын Эфэс номын 4:7–16-д бичсэн үгсээс гарах хариулт Ехова хонинуудаа халамжлан хайрладагийг тусган харуулдаг.
«Хүн бэлгүүд»-ийг хэн өгдөг вэ?
4. Дуулал 68:18-ын биелэлээр Ехова ямар утгаар «өндөр газарт гарсан» ба «хүн бэлгүүд» гэдэг нь хэн байсан бэ?
4 Элч Паул «хүн бэлгүүд» гэж бичихдээ Давид хааны Еховагийн тухай хэлсэн үгээс иш татан «Та өндөр газарт гарч, Та Өөрийн олзлогдогчдыг дагуулан, Та хүмүүсээс [«хүн», ШЕ] бэлэг авна» хэмээжээ (Дуулал 68:18). Израильчууд Амалсан газар нутагт очоод нэг бус жилийн хугацаа өнгөрсний дараа үлгэрлэн хэлбэл Ехова Сион ууланд «гарч», Иерусалимийг Давид хаан нь байсан Израилийн хаант улсын нийслэл болгожээ. Гэвч «хүн бэлгүүд» нь чухам хэн байсан бэ? Энэ газар нутгийг эзлэн түрэмгийлэх үед баригдсан олзлогдогсод юм. Эдгээр хүмүүсийн зарим нь хожим асарын дэргэдэх туслахийн үүрэг гүйцэтгэх левичүүд болсон (Езра 8:20).
5. а) Дуулал 68:18 нь Христийн хуралд биелэдэг гэдгийг Паул хэрхэн харуулдаг вэ? б) Есүс ямар байдлаар «дээш гарсан» бэ?
5 Элч Паул Эфэс номд бичихдээ дуулалчийн үгс Христийн хуралд өргөн хэмжээгээр биелж буйг харуулсан. Дуулал 68:18-ыг бага зэрэг өөрчлөн: «Бидний хүн бүрт Христийн бэлгийн хэмжээгээр ивээл өгөгдсөн байв. Тиймээс „Дээш гарахдаа, Тэр олон хоригдол олзлов. Тэр хүмүүст [«хүн», ШЕ] бэлгүүдийг өгсөн“» гэж Паул бичжээ (Эфэс 4:7, 8). Паул энэхүү дуулалыг Бурхны нэрийн өмнөөс үйл ажиллагаагаа явуулсан Есүст хамааруулдаг. Есүс үнэнч байдлаараа «дэлхийг ялсан» (Иохан 16:33). Тэрчлэн, Бурхан түүнийг үхэгсэдээс амилуулсан болохоор тэрбээр үхлийг болон Сатаныг ялсан юм (Үйлс 2:24; Еврей 2:14). МЭ 33 онд дахин амилсан Есүс тэнгэрийн бүх бүтээлүүдээс дээш буюу «бүх тэнгэрийн дээр дээш» гарсан (Эфэс 4:9, 10; Филиппой 2:9–11). Есүс ялагч гэдгээрээ дайснаас «хоригдол»-ыг булаан авсан. Яаж?
6. Дээш гарсан байсан Есүс М.Э. 33 оны Тавь дахь өдрийн баяраас эхлэн хэрхэн Сатаны гэрийг дээрэмдэж эхэлсэн ба «хоригдолуудыг» яасан бэ?
6 Есүс дэлхий дээр байхдаа албидын эрхшээл дор байсан хүмүүсийг чөлөөлж, Сатанаас давуу болохоо харуулсан. Энэ нь, Есүс Сатаны гэрт ороод түүнийг хүлж орхиод эд зүйлийг нь хураан авсан гэсэнтэй адил (Матай 12:22–29). Үхэгсэдээс амилсан бөгөөд «тэнгэр газар дээрх хамаг эрх мэдэл»-ийг авсан Есүс хичнээн олон сайн зүйлийг авч байсныг төсөөл дөө! (Матай 28:18). Дээш гарсан байсан Есүс МЭ 33 оны Тавь дахь өдрийн баяраас эхлэн Бурханы нэрийн өмнөөс үйл ажиллагаагаа явуулан, «хоригдол олзолсноор» Сатаны гэрийг нь дээрэмдэж эхэлсэн буюу өөрөөр хэлбэл, Сатаны эрхшээл дор удаан хугацааны туршид үхэл болоод нүглийн боолчлолд зовж шаналсан хүмүүсийг сулалж эхэлсэн. Эдгээр «хоригдол»-ууд нь сайн дураараа «Бурхны хүслийг сэтгэлээсээ үйлддэг Христийн боолууд» болсон юм (Эфэс 6:6). Есүс тэднийг Сатаны эрхшээлээс чөлөөлж, Еховагийн нэрийн өмнөөс «хүн бэлгүүд» болгон хуралд өгсөн. Хамар доороо байсан хүмүүсээ алдсан Сатаны уур хилэнг төсөөлөөд үз дээ!
7. а) «Хүн бэлгүүд» хуралд ямар хэлбэрээр үйлчилдэг вэ? б) Ахлагчийн үүрэг гүйцэтгэдэг хүн болгонд Ехова ямар боломж өгдөг вэ?
7 Тэгвэл өнөөгийн хуралд тийм «хүн бэлгүүд» байдаг уу? Тийм байдаг! Тэд бол Бурханы ард түмэний дэлхий даяарх 87 000 хуралд «сайн мэдээг дэлгэрүүлэгч, хоньчин ба багшаар» ажилладаг ахлагч нар юм (Эфэс 4:11). Хэрэв тэд сүрэгтэй эвгүй харьцдаг байсан бол Сатанд үүнээс таатай зүйл үгүй байх байсан. Гэвч Бурхан үүний төлөө Христээр дамжуулан тэднийг хуралд өгөөгүй юм. Эдгээр хүмүүс хурлын сайн сайхны төлөө санаа тавьж, тэдэнд хариуцуулан өгсөн хонинуудын төлөө өмнө нь хариуцлага хүлээж байхаар Ехова тэднийг тавьсан (Еврей 13:18). Ах дүү нарынхаа төлөө ивээл буюу бэлэг байх сайхан боломжийг ахлагчийн үүрэг гүйцэтгэдэг хүмүүст Ехова олгодог. Дөрвөн чухал үүргийг биелүүлснээр үүнд хүрч болно.
Хэзээ «засах» хэрэгтэй вэ?
8. Ямар тал дээр бид бүгдийг заримдаа засах хэрэгтэй болдог вэ?
8 Паулын хэлснээр, нэгдүгээрт «ариун хүмүүсийг засахын» тулд «хүн бэлгүүд» нь өгөгджээ (Эфэс 4:12, ШЕ). Энд «засах» гэж орчуулагдсан грек үг нь ямар нэг юмыг «зөв байрлалд» оруулах гэсэн утгатай. Бид төгс бус хүмүүс учраас бидний бодол санаа, аливаад хандах хандлага, зан байдлыг маань цаг үргэлж «зөв байрлалд» оруулж «засах» буюу Бурхны таалал хийгээд бодол санаатай зохицуулах хэрэгтэй болдог. Шаардлагатай өөрчлөлт хийхэд маань туслаг гэж Ехова «хүн бэлгүүдийг» хайрын сэтгэлээр өгсөн. Ахлагч нар уг даалгаварыг яаж биелүүлдэг вэ?
9. Ахлагч алдаа гаргасан хонинд яаж туслах вэ?
9 Зарим тохиолдолд, «буруу юманд эзэмдүүлсэн» байж болох хонинд туслахыг хүсэн ахлагчид хандаж болох юм. Ахлагч түүнд хэрхэн тусалж чадах вэ? Галат 6:1-т «та нар түүнийг даруу байдлын сүнс дотор засахтун» гэсэн байдаг. Өөрөөр хэлбэл, ахлагч алдаа гаргасан нэгэнд зөвлөгөө өгөхдөө хатуу харгис үгээр загнахгүй гэсэн үг. Зөвлөгөөгөөр «далайлгадаг» биш харин урамшуулах хэрэгтэй (2 Коринт 10:9; Иоб 33:9-г харьцүүл). Тухайн хүн тэртээ тэргүй ичиж шаналж байгаа болохоор халамжтай хоньчин сэтгэлийг нь улам зовоохгүй юм. Тэр бүү хэл, зөвлөгөө нь хатуу зэмлэл байлаа ч гэсэн хэрэв хайрын сэтгэлээс гарч, хайрын улмаас өгсөн энэ нь алдаа гаргагчийн сүнслэг эдгэрэлтэд нөлөөлөн, бодол санаа болоод зан байдлыг нь засах болно (2 Тимот 4:2).
10. Бусдыг засна гэдэг нь юу гэсэн үг вэ?
10 Биднийг зөв сайн тал уруу өөрчлөгдөөсөй гэж «хүн бэлгүүдийг» өгөхдөө ахлагч нар ард түмнийг нь сүнслэгээр шинэчлэн сэргээж, үлгэр дуурайлал болохуйц жишээ байгаасай гэж Ехова хүсдэг (1 Коринт 16:17, 18; Филиппой 3:17). Бусдыг засна гэдэг нь зөвхөн алдаа гаргасан засаж залруулна гэсэн үг бус мөн үнэнч хүмүүс зөм замаа баримталж байхад нь туслана гэсэн хэрэг. Өнөөдөр олон бэрхшээл байдаг болохоор цөөнгүй хүмүүсийг урамшуулах хэрэгтэй болдог. Хэн нэгэнд нь бодол санаагаа Бурхны бодол санааны дагуу болгохын тулд тусламж хэрэгтэй болдог. Жишээлбэл: үнэнч христосын шашинтнуудын зарим нь өөрийгөө ямар ч үнэ цэнэгүй, хэнд ч хэрэггүй гэж үздэг гүн гүнзгий шингэсэн бодолтойгоо тэмцдэг. Яаж ч хичээж үйлчиллээ гэсэн Ехова тэднийг хайрлахгүй, хэзээ ч хүлээн зөвшөөрөхгүй гэж эдгээр «урамгүй» хүмүүст санагдаж магадгүй (1 Тэсалоник 5:14, «Шинэ Гэрээ», ОҮМБОХ, 1998 [ШЕ]). Гэвч, ингэж бодох нь үнэн хэрэг дээрээ Ехова албатууддаа хэрхэн ханддагаас зөрдөг юм.
11. Өөрийгөө хэнд ч хэрэггүй гэж үздэг бодолтойгоо тэмцэж байгаа хүмүүст ахлагч нар хэрхэн тусалж болох вэ?
11 Ахлагч нар аа, та нар ийм хүмүүст яаж тусалж чадах вэ? Ехова албат болгоноо нэг бүрчлэн халамжилдаг гэдгийг баталдаг илэрхийлсэн Библийн зүйлийг хайрын үндсэн дээр тэдэнд үзүүлж, энэ зүйлүүд нь хүн болгонд хамаатай гэдгийг үнэмшүүлээрэй (Лүүк 12:6, 7, 24). Ехова тэднийг өөртөө үйлчлүүлэхээр «татсан» болохоор тэднийг үнэлдэг гэдгийг ойлгоход нь туслаарай (Иохан 6:44). Ганцхан тэдэнд ч биш, Еховагийн бусад үнэнч олон албатуудад ч ийм сэтгэгдэл төрдөг гэдэгт итгүүлээрэй. Зөнч Елиа хүртэл нэгэн удаа сэтгэлийн их дарамтад орж, бүр үхэхийг хүссэн явдал бий (Хаант улсын дээд 19:1–4). Нэгдүгээр зууны үеийн зарим тослогдсон христосийн шашинтнуудыг зүрх сэтгэл нь «буруутгасан» (1 Иохан 3:20). Библийн цаг үед амьдарч байсан үнэнч хүмүүс «бидэнтэй адил мэдрэмжтэй» байсан гэдгийг мэдэхэд үнэхээр тайтгармаар (Иакоов 5:17, «Шинэ Гэрээс», англи-монгол Библи, 1994 [МАБ]). Тэрчлэн, сэтгэл санаагаар унасан хүмүүстэй хамтран «Харуулын цамхаг», «Сэрцгээ!» сэтгүүлийн урам хайрласан нийтлэлүүдийг хэлэлцэж болно. Тэдэнд урам хайрлах гэсэн та бүхний чин сатгэлийн чармайлтуудыг та нарыг «хүн бэлгүүд» болгон өгсөн Бурхан анзаарахгүй өнгөрнө гэж үгүй (Еврей 6:10).
Сүргийг «байгуулах» нь
12. «Христийн Биеийг байгуулах» гэдэг хэллэг нь юунд хамааралтай ба сүргийг байгуулах түлхүүр нь юу вэ?
12 Хоёрдугаарт, «Христийн Биеийг байгуулахын тулд» «хүн бэлгүүд» өгөгджээ (Эфэс 4:12, МАБ). Паул үүнийг дүрслэн хэлжээ. «Байгуулах» гэдэг нь бүтээн бий болгох гэсэн санааг төрүүлдэг бол харин «Христийн Бие» гэдэг нь христийн хурлын тослогдсон гишүүдэд хамаатай (1 Коринт 12:27; Эфэс 5:23, 29, 30). Ахлагч нар ах дүү нарыгаа сүнслэгээр бат бэх байхад нь туслах хэрэгтэй. Тэд сүргийг «эвдэхийн тулд биш, харин байгуулахын тулд» хичээдэг (2 Коринт 10:8, МАБ). Сүргийг байгуулах гол түлхүүр бол хайр билээ. Учир нь «хайр нь хүнийг байгуулдаг» (1 Коринт 8:1, МАБ).
13. Өрөвдөх гэдэг нь юу гэсэн утгатай бөгөөд яагаад ахлагч нар бусдыг өрөвдөх нь чухал вэ?
13 Сүргийг байгуулахад ахлагч нарт тус болох хайрын салшгүй нэгэн хэсэг бол өрөвч сэтгэл юм. Өрөвдөх гэдэг нь хэн нэгний төлөө санаа зовж, тухайн хүний боломж бололцоог харгалзан үзсний үндсэн дээр бодол санаа, сэтгэл мэдрэмжийг нь хуваалцана гэсэнтэй утга нэг (1 Пэтр 3:8). Яагаад ахлагч нар өрөвч байх нь чухал вэ? Яагаад гэвэл, нэгдүгээрт, «хүн бэлгүүд» өгдөг Еховаг өөрийг нь энэхүү чанар ялгаруулж байдаг. Албатууд нь зовж шаналж байх тэр үед тэрбээр тэднийхээ төлөө санаа зовдог (Египетээс гарсан нь 3:7; Исаиа 63:9). Хязгаарлагдмал нөхцөл бололцоог нь ч мэддэг (Дуулал 103:14). Ахлагч нар бусдыг хэрхэн өрөвддөг вэ?
14. Ахлагч нар яаж бусдыг өрөвдөх вэ?
14 Сэтгэл санаагаар унасан хүн ахлагч нарт хандахад тэд түүний сэтгэл мэдрэмжийг ойлгон, анхааран сонсдог. тэд ах дүү нарынхаа гэр бүлийн гарал, хувийн зан чанар, нөхцөл бололцоог нь харгалзан үзэхийг хичээдэг. Ахлагч нар хонинд Библийн зөвлөгөө өгөхөд хэрэгжүүлэхэд хялбархан байна. Учир нь тэднийг ойлгодог, хайрладаг хоньчид зөвлөгөөг өгдөг билээ (Сургаалт үгс 16:23). Өрөвдөх сэтгэл нь бусдын хязгаарлагдмал нөхцөл бололцоо хийгээд үүнээс урган гарч болох мэдрэмжийг харгалзан үзэж байхыг ахлагч нараас шаарддаг. Тухайлбал: зарим тохиолдолд үнэнч Есүсийн дагалдагчид нас дээр гарснаасаа болоод эсвэл эрүүл мэндийн боломжгүйгээс шалтгаалан Бурханд илүү ихээр үйлчилж чадахгүй байна гэцгээн өөрсдийгөө буруутгадаг. Нөгөө талаас, өөр хэн нэгнийг үйлчлэлээ сайжруулахад нь урамшуулан зоригжуулах хэрэгтэй (Еврей 5:12; 6:1). Өрөвч сэтгэл ахлагчийг «сэтгэлд таатай үгсээр» ярихад нөлөөлнө (Номлогчийн үгс 12:10, ШЕ). Еховагийн хонинуудыг байгуулан, урамшуулбал Бурхныг хайрлах тэдний хайр үйлчлэлдээ боломжтой бүхнийг хийхийг өдөөх болно!
Эв нэгдэлийг дэмждэг хүмүүс
15. «Итгэлийн нэгдэл» гэсэн хэллэг нь юуг илэрхийлдэг вэ?
15 Гуравдугаарт, «бид бүгд итгэлийн нэгдэлд ба Бурхны Хүүг мэдэх мэдлэгт хүрэхийн» тулд «хүн бэлгүүд» өгөгджээ (Эфэс 4:13). «Итгэлийн нэгдэл» гэсэн хэллэг нь зөвхөн итгэл үнэмшлийн хувьд бус мөн итгэгчид хоорондоо эв нэгдэлтэй байхыг илэрхийлдэг. Ехова «хүн бэлгүүдийг» бидэнд өгөх болсон бас нэгэн шалтгаан гэвэл ард түмнийх нь эв нэгдэлийг дэмжих ёстой юм. Ахлагч нар үүнийг хэрхэн хийдэг вэ?
16. Яагаад ахлагч нар өөр хоорондоо эв нэгдэлтэй байх нь чухал вэ?
16 Юуны түрүүнд тэд өөр хоорондоо эв нэгдэлтэй байх хэрэгтэй. Хэрэв хоньчид нь хагаралтай бол хонинууд нь салан задгай хоцорно. Хоньчины ажилд зориулж болох үнэт цаг нь элдэв чухал биш асуудлыг шийдвэрлэх маргаан, хурал зэрэгт хий дэмий зарагдах болно (Тимот 2:8). Ахлагч нар нь өөр өөр ухаан бодолтой хүмүүс болохоор хэлэлцэх асуудалд үргэлж адилхан хандахгүй. Эв нэгдэл нь өөр саналтай байхыг, үүнийгээ илэн далангүйгээр илэрхийлж болохгүй гэсэн үг биш. Ахлагч нар бие биенийгээ ямар нэг атгаг санаагүйгээр, хүндэтгэн сонсож, эв нэгдлээ хадгалдаг. Хэрэв Библийн зарчим зөрчигдөөгүй бол буулт хийж, ахлагч нарын зөвлөлөөс эцэслэн гаргасан шийдвэрийг дэмжихэд бэлэн байх хэрэгтэй. Буулт хийхэд бэлэн байна гэдэг нь ахлагч нар «дээрээс буух мэргэн ухааныг» удирдлагаа болгодог ба «амар тайван, ухаантай» гэдгийн илрэл болдог (Иакоов 3:17, 18, ШЕ).
17. Хурлын эв нэгдлийг хадгалахад ахлагч нар хэрхэн нөлөөлдөг вэ?
17 Түүнээс гадна, хурлынхаа эв нэгдэлийг дэмжих ёстойгоо ахлагч нар ямагт санаж байдаг. Хэрэв элдэв таагүй хов жив, алив муу талыг дөвийлгөх гэсэн хандлага, ямар нэг өрсөлдөөнөөс бий болсон хагаран бутаргах гэсэн нөлөө хурлын амгалан тайван байдалд заналхийлбэл ахлагч нар удааширалгүйгээр зөвлөгөө өгөх болно (Филиппой 2:2, 3). Хэн нэг нь бусдын хэрэгт хэт их оролцох эсвэл хэтэрхий шүүмжлэлтэй хандаж байгааг тэд анзаарлаа гэж бодъё (1 Пэтр 4:15, 1 Тимот 5:13). Ахлагч нар ийм хүмүүст иймэрхүү зан байдал нь Бурхны бидэнд сургадаг зүйлтэй болоод «хүн бүр өөрийн ачааг үүрнэ» гэсэн зарчимтай тохирдоггүй болохыг ойлгохуулахыг хичээдэг (Галат 6:5, 7; 1 Тэсалоник 4:9–12). Тэд Ариун Бичээсийн тусламжтайгаар Ехова бидэнд олон зүйлийг сэтгэлийнхээ үзэмжээр шийдэж болохыг зөвшөөрсөн ба ийм тохиолдолд бидний хэн нь ч бусдыг шүүх эрхгүй тайлбарладаг (Матай 7:1, 2; Иакоов 4:10–12). Хамтдаа эв нэгдэлтэй үйлчлэхийн тулд хурлын уур амьсгал бие биенийгээ хүндэтгэсэн, бие биедээ итгэсэн байх ёстой. «Хүн бэлгүүд» шаардлагатай үед Библи дээр үндэслэсэн зөвлөгөө өгснөөрөө эв нэгдэл болоод амгалан тайван байдлаа хадгалахад тусалдаг (Ром 14:19).
Сүргийг хадгалангаа
18, 19. а) «Хүн бэлгүүд» биднийг хэнээс хамгаалдаг вэ? б) Өөр ямар аюулаас хонинуудыг хамгаалах хэрэгтэй ба үүний тулд ахлагч нар юу хийдэг вэ?
18 Дөрөвдүгээрт, «хүмүүсийн заль бөгөөд төөрөгдлийн зальхай ов мэхэнд унагах аливаа сургаалын салхинаас» биднийг хамгаалах гэж Ехова «хүн бэлгүүд»-ийг өгсөн (Эфэс 4:14). «Заль» гэж орчуулсан грек үг нь «шоо хаяан тоглох үедээ луйвардах» эсвэл «шоо хаяан тоглох чадвар» гэсэн утгатай гэж байдаг. Энэ нь тэрсэлсэн этгээдүүд хэрхэн зальжин ханддагийг сануулахгүй байна гэж үү? Үнэн христосын шашинтнуудыг итгэлээсээ нь холдуулах гэсэндээ башир аргаар боловсруулсан баримтуудад дээр үндэслэн Библийн зүйлүүдтэй чадварлагаар «тоглодог». Эдгээр «догшин чононуудаас» сүргийг хамгаалахын тулд ахлагч нар бэлэн байх ёстой (Үйлс 20:29, 30).
19 Еховагийн хонинуудыг бусад аюулаас ч мөн хамгаалах хэрэгтэй. Эрт дээр үед Давид хоньчин байхдаа эцгийнхээ сүргийг зэрлэг араатнаас аймшиггүйгээр хамгаалж байв (1 Самуел 17:34–36). Тийм болохоор, өнөөдөр ч гэсэн Еховагийн хонинуудыг ялангуяа илүү эмзэг хэсгийг нь гомдоож, хавчин хяхдаг хэн бүхнээс сүргийг хамгаалахын тулд христосийн шашны халамжтай хоньчдод ямар нэг тохиолдолд эр зориг хэрэгтэй байж болох юм. Санаатайгаар нүгэл үйлддэг, элдэв башир арга хэрэглэдэг, залилан мэхэлдэг, хорон арга хэрэглэдэг хүмүүсийг ахлагч нар хурлаас шууд холдуулан зайлуулдаг (1 Коринт 5:9–13; Дуулал 101:7-г харьцуул).
20. Ямар учраас «хүн бэлгүүдийн» халамж биднийг аюулгүй байдалд байгааг мэдрэх боломж олгодог вэ?
20 «Хүн бэлгүүдтэйдээ» бид хичнээн их талархнам бэ! Тэдний хайр халамжийн ачаар бид аюулгүй байдалд буйгаа мэдэрдэг. Учир нь тэд биднийг засаж, хайраар байгуулж, бидний эв нэгдлийг хайрлан хамгаалж, биднийг эрэлхэгээр хамгаалдаг билээ. Тэгвэл, «хүн хэлбэрийн бэлгүүд» хуралд гүйцэтгэх үүрэгтээ хэрхэн хандах вэ? Бид тэднийг хүндэтгэдэг гэдгээ яаж харуулж болох вэ? Дараагийн нийтлэлд энэ тухай үзье.
Та санаж байна уу?
◻ Бурханы Христээр дамжуулан өгсөн «хүн бэлгүүд» гэж хэн ба юуны төлөө тэднийг хуралд өгсөн бэ?
◻ Ахлагч нар сүргийг засах үүргээ хэрхэн биелүүлдэг вэ?
◻ Итгэгчдийгээ байгуулахийн ахлагч нар юу хийх вэ?
◻ Ахлагч нар хурлынхаа эв нэгдэлийг яаж хадгалж болох вэ?