«Тэдний элбэг дэлбэг байдал ... та нарыг хангах болно»
МЭ 49 ОН. «Багананууд гэж хүндлэгддэг» Петр Иаков Иохан нар элч Паул болон түүний хамтран зүтгэгч Барнабт даалгавар өгчээ. Тэд харь үндэстнүүдэд дэлгэрүүлэхийн зэрэгцээ ядуу христиануудад санаа тавих ёстой байв (Гал. 2:9, 10). Энэ даалгавраа хэрхэн биелүүлсэн бэ?
Паул авсан даалгавраа хэр зэрэг биелүүлсэн нь хурлуудад илгээсэн захидлаас харагддаг. Жишээлбэл, Коринтын христиануудад «Ариун хүмүүсийн төлөөх хуримтлалын талаар би Галатын чуулгануудад ямар чиг өгсөнчлөн та нар тийнхүү үйлд. Намайг очиход цуглуулахгүйн тулд долоо хоног бүрийн эхний өдөр хүн болгон бололцоогоороо цааш нь хийж хадгал. Би очоод та нарын зөвшөөрсөн хүмүүсээр бэлгийг тань хүргүүлэхээр захианы хамт Иерусалим уруу илгээнэ» хэмээн бичжээ (1 Кор. 16:1–3).
Ямар зорилгоор мөнгө хадгалах хэрэгтэйг Паул коринтчуудад бичсэн хоёр дахь захидалдаа тайлбарлажээ. Уг захидалд «Та нарын элбэг дэлбэг байдал тэдний хэрэгцээг хангана» гэсэн байдаг (2 Кор. 8:12–15).
МЭ 56 оны орчим Паулыг Ромын христиануудад захидал бичиж байх үед хандив цуглуулах ажил бараг дуусаад байлаа. Тэрбээр: «Би ариун хүмүүст үйлчлэхээр Иерусалим уруу явах гэж байна. Учир нь Иерусалим дахь ариун хүмүүсийн дотор буй ядууст зориулж хандив өгөх болсон нь Македони болон Ахайн хүмүүсийн сэтгэлд нийцэв» гэж бичжээ (Ром 15:25, 26). Паул захидал бичсэнийхээ дараахан даалгавраа биелүүлсэн. Яагаад ингэж хэлж болох вэ? Тэрбээр Иерусалимд буцаж очоод удалгүй баривчлагдан Ромын амбан захирагч Феликт байцаагдаж байхдаа «Би өөрийн ард түмэнд өглөг авчран, мөн өргөл өргөх зорилготой ирэв» гэж хэлсэн байдаг (Үйлс 24:17).
I зууны христианууд ямар хүмүүс байсныг Паулын хэлсэн үгнээс тодорхой мэдэж болно. Тэрбээр македоничуудын тухай бичихдээ «Сайхан сэтгэлээр өгөхийн завшаан олгохыг биднээс ихэд шаргуу гуйсаар байсан» (ШЕ) гэжээ. Тэднийг дууриахыг Коринтын христиануудад уриалан «Хүн бүр зүрхэндээ шийдсэнчлэн харамгүйгээр, албадлага бусаар өгөгтүн. Учир нь Бурхан баяртайгаар өгөгчийг хайрладаг» хэмээн бичсэн байдаг. I зууны христианууд ийм өгөөмөр сэтгэлтэй байсны учир юу вэ? Тэд «зөвхөн ариун хүмүүсийн хэрэгцээг хангадаг төдийгүй, харин ч Бурханд өргөх арвин талархлуудаар мөн бялхдаг» байжээ (2 Кор. 8:4; 9:7, 12). Бид ч бас ийм л зорилго өвөрлөн өгөөмөр сэтгэл гаргадаг. Ехова Бурхан харамгүй сэтгэлтэй хүнийг ивээх нь гарцаагүй. Тийм ээ, «ЭЗЭНий ерөөл баян болгодог» (Сур. 10:22).
ДЭЛХИЙ ДАХИНЫ ҮЙЛ ХЭРЭГТ ЗОРИУЛСАН ХАНДИВ
Өнөө үеийн христианууд элч Паулын үеийнхний адилаар тодорхой хэмжээний мөнгө «цааш нь хийж хадгалдаг». Түүнийгээ «Дэлхий дахины үйл хэрэг» гэсэн хаягтай хурлын хандивын хайрцагт хийдэг (1 Кор. 16:2). Хурлууд хандивын мөнгийг тухайн орны Еховагийн Гэрчүүдийг хариуцдаг салбар луу сар бүр явуулдаг. Түүнээс гадна, хувь хүн оршин сууж буй улсынхаа Еховагийн Гэрчүүдийн байгууллагад хандиваа шууд илгээж болно. Ингэхийн тулд хуулийн гол этгээдийн албан ёсны нэр, хаягийг мэдэх хэрэгтэй. Үүнийг тус улс дахь Еховагийн Гэрчүүдийг хариуцдаг салбараас лавлаарай. Салбарын хаягийг интернетийн www.jw.org сайтаас мэдэх боломжтой. Та дараах төрлийн хандивыг шууд илгээж болно.
ШУУД ӨГӨХ
Бэлэн мөнгө, үнэт эдлэл болон бусад хувийн өмч зэргийг хандивлаж болдог.
Дээрх зүйлийг хандивлахаа илэрхийлсэн захидал бичээрэй.
БУСАД ХАНДИВ
Мөнгө болон бусад үнэт зүйл хандивлахаас гадна Хаанчлалын дэлхий дахины үйл хэргийг дэмжих өөр олон арга байдаг. Эдгээрийг жагсааж бичлээ. Та ямар ч аргаар хандив өргөх байсан, таны оршин суугаа улсын Еховагийн Гэрчүүдийг хариуцдаг салбартай холбоо барьж, дор дурдсан хандивын аль нь тохиромжтойг лавлана уу. Улс болгоны хуульд заасан шаардлага, татварын хууль өөр өөр байдаг учир татвар, хууль зүйл талаар мэргэшсэн хүнээс зөвлөгөө авбал хандив өргөх хамгийн сайн аргыг мэднэ.
Даатгал: Амьдралын даатгалд даатгуулаад, хүлээн авагчаар нь Еховагийн Гэрчүүдийн байгууллагын албан ёсны нэрийг заасан байна.
Банкны данс: Банкны данс юм уу хадгаламжийн сертификат эзэмшигч нас барвал тухайн банкны дүрэмд нийцсэн тохиолдолд хадгалуулсан мөнгийг нь Еховагийн Гэрчүүдийн байгууллагад шилжүүлж болно.
Гэрээслэл: Хуулийн дагуу үйлдсэн гэрээслэлээр Еховагийн Гэрчүүдийн байгууллагад мөнгөн хөрөнгө өвлүүлж болно.
Дэлгэрэнгүй мэдээллийг танай улс дахь Еховагийн Гэрчүүдийн байгууллагыг хариуцдаг салбараас аваарай.
БИД ЯАГААД ХАНДИВ ӨРГӨДӨГ ВЭ?
Нэгдүгээрт, хандив өргөхийг Ехова шүтлэгийн нэг хэсэг гэж үздэг. Хандив өргөх нь бидэнд сайн. Сайхан сэтгэлтэй Бурхандаа талархаж байна гэсэн үг. Жишээ нь, бяцхан хүүхэд нь хийсэн юм уу худалдаж авсан юмаа бэлэглэхэд аав ээж нь яагаад баярладаг вэ? Хэрэгтэй юмыг нь өгсөн учраас уу? Үгүй л болов уу. Хүүхэд нь хүний ачийг санадаг, өглөгч зантай хүн болж байгааг хараад баярладаг. Ехова ч бас биднийг өглөгч байгаасай гэж хүсдэг, өгөхлөөр баярладаг. Хандив өргөдөг нь туйлын энэрэнгүй, өгөөмөр Еховадаа үнэхээр талархаж байгаагийн илрэл юм. Ехова «аливаа сайн соёрхол ба аливаа төгс бэлэг» өгдөг. Тийм учраас талархах шалтгаан олон байна (Иаков 1:17). Еховагийн өгсөн хамгийн том бэлэг нь хайртай Хүү нь юм. Тэрбээр биднийг мөнх амьдруулахын тулд Хүүгийнхээ амийг золиосолсон (Иохан 3:16). Талархахгүй байхын аргагүй!
Хоёрдугаарт, хандив өргөөд сурчихвал Ехова Есүс хоёрыг дууриаж буй хэрэг. Энэ бол хамгийн чухал зүйл юм. Ехова өгөх дуртай, өгөөмөр сэтгэлтэй Бурхан. Тэрбээр «амь, амьсгал хийгээд хамаг юмсыг» бидэнд өгсөн гэж Библид байдаг (Үйлс 17:25). Тийм учраас, амьсгалах агаар, идэх хоол өгдгийнх нь төлөө, баяр баясгалантай мөч бүрдээ талархах учиртай (Үйлс 14:17). Есүс ч Эцэгтэйгээ адилхан өгөөмөр сэтгэлтэй нэгэн байсан. Тэрбээр өөрийгөө тэр чигээр нь зориулсан. Гайхамшиг үйлдэхдээ ч сэтгэл зүтгэл гаргадаг байсныг та мэдэх үү? Өвчтэй хүмүүсийг эдгээх үед нь түүнээс «хүч гарч» байсныг Библид нэг бус удаа бичсэн байдаг (Лук 6:19; 8:45, 46). Есүс үнэхээр өгөөмөр хүн байсан учраас «Өөрийн амийг үхэл уруу асгасан» юм (Исаиа 53:12).
Тиймээс бид цаг зав, хүч чадлаа зориулж, эд хөрөнгөө хандивладаг бол Еховаг дууриаж буй хэрэг бөгөөд ингэснээрээ түүний «зүрхийг ... баярлуулна» (Сургаалт үгс 27:11; Ефес 5:1). Бас төгс жишээ үзүүлсэн Есүс Христийг дууриаж байна гэсэн үг (1 Петр 2:21).