Христиан хөвгүүд ээ, та нар хариуцлагатай үүрэг хүлээхийг эрмэлздэг үү?
1. Христиан хөвгүүд 1 Тимот 3:1-д байдаг зөвлөгөөг хэзээнээс дагах хэрэгтэй вэ?
1 Хуралд хариуцлагатай үүрэг хүлээхийг «эрмэлзвэл, тэр сайн ажлыг хүсдэг хүн байна» гэж Библид бий (1 Тим. 3:1). Энэ үг христиан эрчүүдэд их урам зориг хайрладаг. Насанд хүрсэн хүн л хариуцлагатай үүрэг хүлээхийг эрмэлзэх ёстой юу? Христиан хөвгүүд та нар ч бас ийм зорилго тавивал сайн. Ингэвэл ахлагчид чамайг сургаж, ирээдүйд туслах үйлчлэгчээр үйлчлэх шаардлага хангахад чинь тусална (1 Тим. 3:10). Хэрэв чи баптисм хүртсэн бол хариуцлагатай үүрэг хүлээхийг хэрхэн эрмэлзэх вэ?
2. Яавал өөрийгөө золиослох сэтгэлтэй болох вэ? Тийм сэтгэлтэйгээ хэрхэн харуулах вэ?
2 Өөрийгөө золиослох нь: Нэр алдартай болохыг биш, сайн ажиллахыг эрмэлздэгээ санах хэрэгтэй. Тиймээс итгэл нэгтэндээ туслахыг хүсдэг болоорой. Үүний тулд Есүсийн үлдээсэн сайхан жишээг эргэцүүлж бодоорой (Мат. 20:28; Иох. 4:6, 7; 13:4, 5). Бусдад санаа тавьдаг байхад туслахыг Еховагаас гуйх хэрэгтэй (1 Кор. 10:24). Настай юм уу, бие муутай итгэл нэгтэндээ тусламж үзүүлж чадах уу? Хаанчлалын танхимаа засаж тордох юм уу ойр орчмыг нь цэвэрлэх гэх мэтийн ажилд сайн дураараа оролцдог уу? Дэлгэрүүлэгчийн сургууль дээр хэн нэгний оронд сайн дураараа илтгэл тавьж чадах уу? Бусдад тусалбал чи өөрөө ч баяр жаргалтай байна (Үйлс 20:35).
3. Сүнслэг байх нь яагаад чухал бэ? Яаж сүнслэг байх вэ?
3 Сүнслэг байдал: Хуралд үйлчлэх хүн авьяас чадвартай байхаас илүү сүнслэг байх нь чухал. Сүнслэг хүн Ехова Есүс хоёр шиг үзэл бодолтой байхыг хичээдэг (1 Кор. 2:15, 16). Мөн «сүнсний үр жимсийг» илэрхийлдэг (Гал. 5:22, 23). Хаанчлалыг эн тэргүүнд тавьж идэвх зүтгэлтэй дэлгэрүүлдэг (Мат. 6:33). Бие даан судалж хэвших нь сайхан зан чанарыг хөгжүүлэхэд тустай. Ийм хэвшилтэй хүн Библийг өдөр бүр, «Харуулын цамхаг» сэтгүүлийг дугаар алгасалгүй уншиж, бүх цуглаандаа бэлддэг (Дуу. 1:1, 2; Евр. 10:24, 25). Паул залуу Тимотыг сүнслэгээр өсөөсэй гэсэндээ «сургаалдаа анхаарлаа нарийн хандуул» гэж бичжээ (1 Тим. 4:15, 16). Тийм учраас Дэлгэрүүлэгчийн сургуулийн даалгавраа сайн биелүүлэхийг хичээгээрэй. Дэлгэрүүлэх ажилд бэлдэж, тогтмол оролцоорой. Байнгын эхлэгч юм уу бетелчнээр үйлчлэх, Ганц бие эрчүүдэд зориулсан Библийн сургуульд сурах гэх мэтийн сүнслэг зорилго тавьж, түүндээ хүрэхийг хичээгээрэй. Сүнслэг байвал «идэр насныхаа дур хүслүүдээс зугтаж» чадна (2 Тим. 2:22).
4. Итгэл хүлээх нь ямар ач тустай вэ?
4 Итгэл хүлээх нь: Нэгдүгээр зууны үед «нэр хүнд бүхий» буюу итгэл хүлээсэн эрчүүд гачигдалтай хүмүүст хоол хүнс хуваарилдаг байсан учир элч нар санаа зоволгүй бусад чухал ажлаа анхаардаг байжээ (Үйлс 6:1–4). Үүнтэй адил, чи ямар нэгэн даалгавар авсан бол түүнийгээ биелүүлэхийн тулд чадах бүхнээ хийгээрэй. Зааврыг нарийн мөрдөж хөвөгч авдар хийсэн Ноаг дууриагаарай (Эх. 6:22). Ехова итгэл хүлээсэн хүнийг үнэлдэг. Мөн энэ нь сүнслэгээр төлөвшсөн хүний шинж юм. (1 Кор. 4:2; «Сургахын ач тус» гэсэн хавсралтыг үзнэ үү.)
5. Залуус хариуцлагатай үүрэг хүлээхийг эрмэлзэх хэрэгтэйн учир юу вэ?
5 Ехова зөгнөсөн ёсоороо хүмүүсийг цуглуулах ажлыг түргэлүүлж байна (Ис. 60:22). Жилд дунджаар 250 000 хүн баптисм хүртэж байна. Шинээр ийм олон хүн үнэнийг хүлээж авч байгаа учраас хурлын ажлыг хийх сүнслэг эрчүүд илүү хэрэгтэй болж байна. Одоо Еховагийн төлөө хийх ажил хэзээ хэзээнээс илүү их байна (1 Кор. 15:58). Залуус аа, та нар хариуцлагатай үүрэг хүлээхийг эрмэлздэг үү? Тэгвэл үнэхээр сайн ажлыг хүсдэг гэсэн үг!
[2-р хуудасны товчлол]
Шинээр ийм олон хүн үнэнийг хүлээж авч байгаа учраас хурлын ажлыг хийх сүнслэг эрчүүд илүү хэрэгтэй болж байна
[3-р хуудасны хавсралт]
Сургахын ач тус
Ахлагчид шаардлага хангасан залууст даалгавар өгч, зааж сургавал ач тустай байдаг. Дүүргийн харгалзагч цуглааны дараа тайзан дээр сууж, нэг дэлгэрүүлэгчийг урамшуулж байжээ. Тэрбээр нэг хүүг хажууд нь зогсон хүлээж буйг хараад хэлэх юм байгаа эсэхийг нь асуусан аж. Тэр хүү цуглаан болгоны дараа тайзны тоос соруулах даалгавартайгаа хэлжээ. Эцэг эх нь харих гээд хүлээж байсан ч, хүү нь даалгавраа биелүүлж байж л харих санаатай байв. Дүүргийн харгалзагч шууд л зай тавьж өгчээ. Тэр харгалзагч хожим нь «Энэ хурлын ахлагчид залуусаа сургахын тулд ажил даалгаж өгдөг юм билээ. Тэгээд намайг эргэлт хийхээр очиход залуусыг туслах үйлчлэгчээр томилох санал дэвшүүлдэг байсан» гэж хэлжээ.