«Амьдрал, үйл хэрэг цуглаанаар үзэх материал»-ын хавсралт
7-Р САРЫН 6–12
БУРХНЫ ҮГЭН ДЭХ ЭРДЭНЭС | ЕГИПЕТЭЭС ГАРСАН НЬ 6-7
«Намайг Фараонд юу хийхийг одоо чи харна»
it-2 436 ¶3
Мосе
Израйлчууд бас мэдэгдэхүйц өөрчлөгджээ. Тэд эхэндээ Мосегийн үзүүлсэн тэмдгийг хүлээн авсан боловч Фараоны тушаалын дагуу ажлын нөхцөл нь хүндэрмэгц Мосед ихэд гомдоллосон тул Мосе сэтгэлээр унан Еховагаас тусламж гуйхад хүрчээ (Ег 4:29-31; 5:19-23). Тэгэхэд нь хамгийн дээд Нэгэн Мосег тайвшруулан, Абрахам, Исаак, Иаковын хүсэн хүлээж байсан зүйлийг, өөрөөр хэлбэл Израйлыг аварч их улс болгон Амласан газар суулгаад өөрийн Ехова гэдэг нэрний утгыг бүрэн илэрхийлэх гэж байгаагаа хэлжээ (Ег 6:1-8). Гэсэн ч Израйлчууд Мосегийн үгийг сонсож дагаагүй. Гэхдээ ес дэх гамшгийг буулгасны дараа тэд Мосег дуулгавартай дагаж, дэмжсэн учраас арав дахь гамшиг болсны дараа Мосе тэднийг эмх цэгцтэйгээр зохион байгуулан, Египетийн газраас жагсаалаар цувран гарч чаджээ (Ег 13:18).
it-2 436 ¶1-2
Мосе
Египетийн Фараоны өмнө. Одоо Мосе Аарон хоёр «Бурхдын дайн»-ы гол баатрууд болжээ. Фараон илбэчдээ дуудаж ирүүлсэн ба тэдний толгойлогч нь Ян ба Янбрэ нар байсан бололтой (2 Ти 3:8). Фараон Египетийн бүх бурхдын хүчийг цуглуулан төгс хүчит Еховагийн эсрэг тэмцэв. Фараоны өмнө Мосегийн зааврын дагуу Аароны үйлдсэн эхний гайхамшиг нь Ехова Бурхан Египетийн бурхдаас хавьгүй илүү хүчтэй гэдгийг баталсан ч Фараоны зүрх илүү хатуурав (Ег 7:8-13). Дараа нь гурав дахь гамшгийг буулгахад Египетийн илбэчид хүртэл «Энэ бол Бурхны хуруу!» хэмээн хүлээн зөвшөөрөхөөс өөр аргагүйд хүрчээ. Тэр бүү хэл, идээт ярны гамшигт хүчтэй өртсөн тэд тэрхүү гамшгийн үеэр бүгдээрээ Мосег эсэргүүцэхээр Фараоны өмнө зогсож чадаагүй (Ег 8:16-19; 9:10-12).
Гамшгууд хүмүүсийг дуулгавартай эсвэл зөрүүд болгосон нь. Арван гамшиг болохын өмнө Мосе Аарон хоёр гамшиг бүр нь юу байх вэ гэдгийг нэг нэгээр нь урьдчилан тунхагласан. Тэдгээр гамшгууд тэдний тунхагласны дагуу нэг нэгээрээ болсон нь Мосе бол үнэхээр Еховагийн төлөөлөгч гэдгийг баталсан. Египетэд Еховагийн нэр тунхаглагдаж, олон хүмүүс ам дамжин ярьдаг болов. Энэ нэр хүмүүст нөлөөлж, зарим хүмүүсийг дуулгавартай, өөр заримыг нь зөрүүд болгов. Израйлчууд ба зарим Египетчүүд дуулгавартай болж, Фараон ба түүний зөвлөгч түшмэд, дэмжигчид нь зөрүүд болов (Ег 9:16; 11:10; 12:29-39). Египетчүүд өөрсдийн бурхдаа хилэгнүүлсэн биш, харин өөрсдийнх нь бурхдыг Ехова шүүж байгааг ойлгожээ. Есөн янзын гамшиг буусгасны дараа Мосе «Египет улсад Фараоны зарц нар хийгээд ард түмний нүдэнд агуу болов» (Ег 11:3).
Эрдэнэс хайх нь
it-1 78 ¶3-4
Төгс хүчит Нэгэн
Абрахамд «Исаак» гэдэг нэртэй хүүтэй болгож өгнө гэсэн амлалтыг өгөхдөө, өөрөөр хэлбэл Бурхан амлалтаа биелүүлэх хүч чадалтай гэдэгт Абрахамын бат итгэх ёстой байсан тэр амлалтыг өгөхдөө Ехова өөрийнхөө «Төгс хүчит Бурхан» (Эль Шаддай) гэдэг цолоо ашигласан байдаг. Хожим нь Исаак болон Иаковыг Абрахамтай байгуулсан гэрээний өв залгамжлагчид болгон сонгож ивээх Бурхны талаар дурдахад бас энэ цолыг ашигласан байдаг (Эх 17:1; 28:3; 35:11; 48:3).
Тийм учраас хожим нь Ехова Мосед: «Би Абрахам, Исаак, Иаковт Төгс хүчит Бурхан [Бэ-Эль Шаддай]-аар илэрсэн. Харин Ехова гэдэг Өөрийнхөө нэрээр Би Өөрийгөө тэдэнд мэдүүлээгүй» гэж хэлсэн байдаг (Ег 6:3). Энэ нь Мосегийн өвөг болох тэдгээр эртний үйлчлэгчид Ехова гэдэг нэрийг мэддэггүй байсан гэсэн үг биш юм. Яагаад гэвэл тэд болон тэдний өмнө амьдарч байсан хүмүүс ч бас Еховаг нэрээр нь дуудах нь олонтаа байсан (Эх 4:1, 26; 14:22; 27:27; 28:16). Үнэндээ Бурхны эртний үйлчлэгчдийн амьдралыг өгүүлдэг Эхлэл номд «Төгс хүчит» юмуу «Төгс хүчит Нэгэн» гэдэг үг ердөө л 6 удаа гардаг бол «Ехова» гэдэг оноосон нэр нь энэхүү номны еврей хэлний эх бичигт 172 удаа гарсан байдаг. Гэхдээ хэдийгээр эдгээр үйлчлэгчид Бурхан «Төгс хүчит Нэгэн» хэмээн цоллуулах эрхтэй гэдгийг нь амьдралынхаа туршлагаар ойлгож мэдсэн боловч тэдэнд «Ехова» гэдэг нэрийнх нь гүн гүнзгий утга санааг бүрэн ойлгох боломж гараагүй байсан. Энэ талаар «Библийн зурагт тайлбар толь» (I боть, 572-р хуудас)-д (англи): «Бурхан эртний үйлчлэгчдэдээ өгсөн илчлэлүүд нь алс ирээдүйд биелэх амлалтуудтай холбоотой байв. Тиймээс тэд Яавэ бол амлалтуудаа биелүүлэх хүч чадалтай (Шаддай гэдэг үгний бас нэг утга) бурхан (Эль) гэдэгт бат итгэх ёстой байв. Бурхан бутан дундаас илүү дотно сэтгэл хөдлөм илчлэлийг өгсөн бөгөөд тэдний сайн мэддэг Яавэ гэдэг нэрэнд бурхны хүч чадал ба бурхан тэдний яг хажууд үргэлж хамт байдгийн баталгаа бүгд багтсан байдаг».—Ж. Д. Дуглас, 1980 он.
it-2 435 ¶5
Мосе
Мосе өөртөө итгэлгүй байсан ч Ехова түүнийг сонгосон. Мосе өөртөө итгэлгүй байгаагаа харуулж өөрийгөө уран цэцэн ярьж чадахгүй гэжээ. Одоо тэрээр өөрийгөө Израйлын аврагч гэж бодож байсан 40 жилийн өмнөх тэр Мосе биш болжээ. Тэр дахин дахин татгалзаж, эцэст нь өөрийг нь энэ үүргээс чөлөөлж өгөхийг Еховагаас хүсжээ. Үүнд нь Бурхны уур хүрсэн боловч Мосегийн оронд өөр хүн томилсонгүй, харин ах Аароныг нь түүний үгийг дамжуулагч болгов. Ийнхүү Мосе Бурхныг төлөөлж байсан тул Аароны хувьд «Бурхан» шиг болж, Аарон Мосег төлөөлөн ярих болжээ. Израйлын ахмадуудтай уулзахад, мөн хожим нь Фараонтой уулзах үед Бурхан Мосед заавар тушаал өгсөн ба Мосе түүнийг нь Ааронд дамжуулахад, үнэн хэрэгтээ Аарон Фараон (40 жилийн өмнө Мосег Египетээс зугатах үед захирч байсан Фараоны үе залгамжлагч)-ы өмнө ярьсан байж болох юм (Ег 2:23; 4:10-17). Хожим нь Ехова Аароныг Мосегийн «зөнч» гэсэн ба энэ нь Мосе Бурхны зааврыг авдаг Бурхны зөнч байсны адилаар Аарон ч бас Мосегийн зааврыг дагах ёстой байсан гэсэн үг байлаа. Бас Ехова Мосед өөрийг нь «Фараонд Бурхан шиг» болгосон гэж хэлсэн. Энэ нь Бурхан Мосед Фараоноос илүү хүч чадал ба эрх мэдэл хайрласан учраас Мосе Египетийн тэр хаанаас айж сүрдэх хэрэггүй болсон гэсэн утгатай байсан (Ег 7:1, 2).
7-Р САРЫН 13–19
БУРХНЫ ҮГЭН ДЭХ ЭРДЭНЭС | ЕГИПЕТЭЭС ГАРСАН НЬ 8, 9
«Бардам Фараон өөрийн мэдэлгүй Бурхны санаа зорилгыг биелүүлсэн нь»
it-2 1040-1041
Зөрүүд зан
Ехова Бурхан хүн төрөлхтөнтэй харьцахдаа үхлийн ял авах нь зохих хүн юмуу улс үндэстэнд үргэлжлэн оршин тогтнохыг нь зөвшөөрснөөр тэвчээр гэдэг зан чанараа харуулсан (Эх 15:16; 2 Пе 3:9). Зарим хүн Бурхны энэ сайхан зан чанарт сэтгэл нь хөдлөн амьдралаа өөрчилснөөр өршөөл энэрэл хүртсэн байдаг (Иош 2:8-14; 6:22, 23; 9:3-15). Нөгөөтэйгүүр, сэтгэлээ хатууруулж Ехова болон түүний ард түмнийг эсэргүүцэн дайсагнадаг хүмүүс ч бас байсан (Ху 2:30-33; Иош 11:19, 20). Ехова хүмүүсийн зөрүүд занг хүчээр хорьдоггүй. Тийм учраас библид Бурхан «тэднийг хатууруулсан» гэж бичсэн байдаг. Библид заримдаа Бурхан хүмүүсийг зүрх сэтгэлийг зөрүүд байхыг зөвшөөрдөг юмуу хүний сэтгэлийг хатууруулдаг гэж байдаг нь хэн нэгэн хүн зөрүүдлэн зүрх сэтгэлээ хатууруулахад Бурхан түүнийг хүчээр хорьдоггүй гэсэн үг юм. Эцэст нь тэдгээр зөрүүд хүмүүсийг шийтгэх цаг болоход Бурхан агуу хүчээ үзүүлж, өөрийн нэрийг дэлхий дахинд тунхагладаг (Ег 4:21; Ёох 12:40; Ро 9:14-18-тай харьцуулна уу).
it-2 1181 ¶3-5
Ёс бус байдал
Үүнээс гадна, Ехова Бурхан муу хүмүүс өөрийн мэдэлгүй Бурхны санаа зорилгыг биелүүлэхэд хувь нэмэр оруулах нөхцөл байдлыг чадварлагаар ашиглах тохиолдол байдаг. Бурхан өөрийг нь дайсагнан эсэргүүцдэг муу хүмүүсээр үнэнч зарц нараа үндсээр нь устгуулахгүй байж, тэдгээр муу хүмүүсийн хийдэг бузар үйлсээр өөрийн шударга гэдгийг харуулахын тулд нөхцөл байдлыг бүрэн захирч гартаа авдаг (Ро 3:3-5, 23-26; 8:35-39; Ду 76:10). Ийм санааг Сургаалт үгс 16:4-т: «[Ехова] юм бүхнийг тус тусын зорилготойгоор бүтээжээ. Тэр ч байтугай хар санаатнууд хорон муугийн өдөрт зориулагддаг аж» хэмээн бичсэн байдаг.
Үүнийг харуулах нэг жишээ бол эртний Египетийн Фараон юм. Ехова Мосе Аарон хоёрыг Фараон руу илгээж боолчлогдож буй Израйлчуудыг чөлөөлөхийг шаарддаг. Бурхан Египетийн захирагчийн сэтгэлийг бузар муу болгоогүй. Тэрээр Фараонд зөвхөн оршин тогтнохыг нь л зөвшөөрсөн. Ингэснээр Фараон муу бодол санаануудаа илчлэн өөрийгөө үхэх нь зохистой гэдгээ батлахад хүргэсэн. Египетээс гарсан нь 9:16-д Ехова зорилгынхоо талаар: «Харин Би Өөрийн хүчийг чамд үзүүлж, Өөрийн нэрийг бүх дэлхий даяар тунхаглахын тулд, үүний төлөө чамайг босгосон юм» гэж хэлсэн байдаг.
Ехова Египетэд арван гамшиг буулган, эцэст нь Фараон болон түүний армийг Улаан тэнгист живүүлснээр өөрийн хүч чадлаа гайхалтайгаар харуулсан (Ег 7:14–12:30; Ду 78:43-51; 136:15). Түүнээс хойш олон жилийн турш эргэн тойрны улс үндэстнүүд тэрхүү явдлын талаар ярьсаар байсан бөгөөд Бурхны ариун нэр дэлхий даяар тунхаглагдав (Иош 2:10, 11; 1Са 4:8). Хэрэв Ехова Фараоныг тэр даруй устгасан бол ийм сүрлэг аргаар хүч чадлаа үзүүлэн, нэрээ алдаршуулж, ард түмнээ аврах боломжгүй байх байсан.
Эрдэнэс хайх нь
it-1 878
Морин хэдгэнэ (gadfly) [Еврей хэлээр Аров]
«Аров» бол Египетэд буусан дөрөв дэх гамшиг байсан. Гэхдээ энэ нь яг ямар төрлийн шавьж байсан нь хараахан тогтоогдоогүй байна. Өмнөх гурван гамшгуудаас ялгаатай нь энэ гамшиг зөвхөн Египетчүүдэд буусан бөгөөд Гошен дахь Израйлчууд ямар ч аюулгүй амар тайван байсан (Ег 8:21, 22, 24, 29, 31; Ду 78:45; 105:31). Библийн янз бүрийн орчуулгад «Аров»-ыг «морин хэдгэнэ» (JB, NW, Ro), «цох хорхой» (Yg), «ялаа» (AS, KJ, RS), «батгана» (AT) болон «нохой ялаа» (LXX) гэх зэргээр орчуулсан байдаг.
Англи хэлний «gadfly» [гэдфлай] гэдэг үг янз бүрийн төрөл зүйлийн хөх түрүү болон морин хэдгэнэ гэсэн утгыг агуулдаг. Эм хөх түрүү нь хүн юмуу амьтны арьсийг цоолж, цусыг нь сорж иддэг. Морин хэдгэний авгалдай нь амьтан юмуу хүний биед шимэгч хорхой хэлбэрээр амьдардаг бөгөөд энэхүү шимэгч нь халуун орны хүмүүст илүү их халдварладаг. Тиймээс морин хэдгэний гамшиг нь Египетчүүд болон тэдний мал төлд асар их зовлон учруулж, зарим тохиолдолд бүр үхэлд хүргэсэн байж болох юм.
w04 3/15 25 ¶9
Египетээс гарсан нь номын онцлох санаа
8:26, 27—Мосе яагаад Израйлын тахил «Египетчүүдийн жигшдэг» юм болно гэж хэлсэн бэ? Египетчүүд олон төрлийн амьтдыг шүтдэг байв. Тиймээс Мосе тахилын талаар дурдсан нь Израйлчуудыг Еховад тахил өргүүлэхээр явуулаач гэсэн түүний тууштай хүсэлтийг шалтгаан ба үндэслэлтэй болгосон.
7-Р САРЫН 20, 26
БУРХНЫ ҮГЭН ДЭХ ЭРДЭНЭС | ЕГИПЕТЭЭС ГАРСАН НЬ 10, 11
Мосе Аарон хоёр агуу зориг гаргасан нь
Есүсийг дуурайн зоригтой дэлгэрүүлэгтүн
6 Фараонтай уулзаж ярилцах даалгавар авсан Мосе хэр зэрэг зоригтой байх ёстой байсныг бодож үзье. Египетчүүдийн боддогоор, фараон бурхдын төлөөлөгч төдийгүй бүр нарны бурхан Рагийн хүү ажээ. Мосегийн уулзсан фараон бусад фараоны адилаар өөрийнхөө хөргийг шүтдэг байсан байж болох юм. Фараоны үг хууль байлаа. Хүссэнээрээ шийдвэр гаргадаг, эрх мэдэлтэй, ихэмсэг бардам, зөрүүд гөжүүд тэрбээр юу хийхээ хэнээр ч заалгадаггүй байжээ. Гэтэл ийм хүний өмнө жирийн нэг хоньчин Мосе урилга заллагагүйгээр дахин дахин очоод, гамшиг болно гэж зөгнөж, түүгээр зогсохгүй, хэдэн сая боолоо чөлөөлж явуулах хүсэлт гаргасан гээд бод доо. Мосед эр зориг хэрэгтэй байсан нь гарцаагүй (То 12:3; Ев 11:27).
it-2 436 ¶4
Мосе
Мосе Аарон хоёр өмнөө байгаа хэцүү үүрэг даалгавраа зөвхөн Еховагийн өгөх хүч чадал болон агуу хүчний нөлөөний тусламжтайгаар л биелүүлж чадах байлаа. Та тухайн үеийн дэлхийн хүчирхэг гүрэн Египетийн хаан байсан Фараоны ордныг төсөөлөөд үз дээ. Юутай ч зүйрлэшгүй тансаг орчинд бурхан гэгддэг бардам Фараон өөрийн зөвлөгч, жанжид, хамгаалагчид, зарц боолуудаараа хүрээлүүлсэн байна. Түүгээр зогсохгүй Мосег эсэргүүцэгчдийн дотор гол эзэд нь болох шашны удирдагчид, ид шид үйлддэг тахилчид бас байх ба тэд бол Египетэд Фараоны дараа орох хамгийн хүч нөлөөтэй хүмүүс ажээ. Эдгээр бүх хүмүүс сүрлэгээр эгнэн зогсоод Фараон болон түүний шүтдэг Египетийн бурхдуудыг дэмжиж байна. Мөн Мосе Аарон хоёр Фараоны өмнө нэг бус удаа дахин дахин очиж уулзсан бөгөөд Фараон үнэ цэнэтэй еврей боолуудаа захирсаар байхаар шийдсэн байсан тул тэднийг тийнхүү очих болгонд зүрх сэтгэл нь аажимдаа улам зөрүүд болсоор байсан. Үнэндээ Мосе Аарон хоёр найм дахь удаагаа гамшиг болохыг тунхагласныхаа дараа Фараонд хөөгдөж явсан бөгөөд ес дэх гамшиг болсны дараа Фараон тэдэнд өөртэйгөө дахин нүүр тулахаас болгоомжлохыг, эс бөгөөс үхнэ шүү гэдгийг сануулсан (Ег 10:11, 28).
Эрдэнэс хайх нь
w95 9/1 11 ¶11
Хуурамч бурхадтай тэмцсэн гэрчүүд
11 Израйлчуудыг Египетэд боолчлогдож байх үед Ехова Мосег Фараон руу илгээхдээ: «Фараон уруу оч. Учир нь Би түүний зүрх болон зарц нарынх нь зүрхийг хатууруулсан. Ингэснээр Би Өөрийн эдгээр тэмдгүүдийг тэдний дунд тавьж, мөн Би египетчүүдийг хэрхэн элэг доог болгож, Би тэдний дунд хэрхэн тэмдгүүдээ тавьсныг та нар үр хүүхэд, ач нарынхаа чихэнд сонордуулна. Ингэснээр та нар Намайг Ехова мөн гэдгийг мэдэх болно» хэмээн хэлжээ (Египетээс гарсан нь 10:1, 2). Дуулгавартай Израйлчууд үр хүүхдүүддээ Еховагийн хүчирхэг үйлсийн талаар ярьж өгөх ёстой байв. Тэгвэл үр хүүхдүүд нь бас эргээд өөрсдийн үр хүүхдүүддээ ярьж өгөн, үеэс үед үргэлж ингэж дамжуулах ёстой байжээ. Ингэж хүмүүс Еховагийн үйлдсэн хүчирхэг үйлсийг санасаар байх байв. Үүний нэгэн адилаар өнөө үеийн эцэг эхчүүд ч бас үр хүүхдэдээ гэрчлэх үүрэгтэй байдаг (Дэд хууль 6:4-7; Сургаалт үгс 22:6).
it-1 783 ¶5
Египетээс гарсан нь
Үүний адилаар Ехова агуу хүч чадлаараа өөрийн нэрийг дуурьсгаж, Израйлийг аварсан. Израйлчууд Улаан тэнгисийн зүүн эрэгт аюулгүй хүрч очоод Мосе Израйлын хөвгүүдийг дагуулан Еховад дуу дуулмагц түүний эгч зөнч Мириам гартаа хэнгэрэг барин, хэнгэрэг бариад бүжиглэж байгаа бүх эмэгтэйчүүдийг дагуулан эрчүүдийн дуутай хоршин дуулжээ (Ег 15:1, 20, 21). Бурхан Израйлчуудыг дайснуудаас нь бүрмөсөн ангижруулжээ. Тэднийг Египетээс гарах үед Бурхан тэдэнд хор хүргэхийг ямар ч хүн амьтанд зөвшөөрөөгүй. Тэр байтугай Израйлчуудын эсрэг хуцаж боргох нохой ч байгаагүй (Ег 11:7). Египетээс гарсан нь номд Фараон цэргийнхээ хамт өөрөө тэнгист ороод сүйрсэн гэж дурдаагүй боловч Дуулал 136:15-д Ехова «Фараон ба түүний их цэргийг Улаан тэнгист сүйрүүлсэн» гэж тодорхой бичсэн байдаг.
7-Р САРЫН 27—8-Р САРЫН 2
БУРХНЫ ҮГЭН ДЭХ ЭРДЭНЭС | ЕГИПЕТЭЭС ГАРСАН НЬ 12
«Дээгүүр өнгөрөх баяр Христийн дагалдагчдад ямар ач холбогдолтой вэ?»
«Сэтгэл дүүрэн баярла»
4 Есүс МЭ 33 оны нисан сарын 14-нд амиа алдсан билээ. Бүр МЭӨ 1513 оны нисан сарын 14-нд Еховагийн тэнгэр элч египетчүүдийн ууган хүүхэд, ууган төл бүрийн амийг хөнөөж, израильчуудынхыг амьд үлдээхэд хурганы цус чухал үүрэгтэй байсныг израиль айл болгон санан дурсаж, жил бүрийн яг энэ өдөр Дээгүүр өнгөрөх баярыг тэмдэглэн, согоггүй хурганы мах иддэг байв (Египетээс гарсан нь 12:1–14). Баярын хурга нь Есүсийн үлгэр загвар байсныг элч Паул: «Бидний Дээгүүр өнгөрөх баярын хурга болох Христ ... тахил болсон юм» хэмээн бичжээ (1 Коринт 5:7). Хурганы цус хүмүүсийн аминд орсны адил, Есүсийн асгаруулсан цус олон хүнд аврагдах боломж олгодог (Ёохан 3:16, 36).
it-2 583 ¶6
Дээгүүр өнгөрөх баяр
Дээгүүр өнгөрөх баярын зарим онцлог шинжүүд Есүс дээр биелсэн. Нэг биелэл нь Израйлчууд Египетэд гэрийн хаалган дээрээ цус түрхсэнээр устгагч тэнгэр элчийн гарт ууган хүүхэд анхны төлөө алуулалгүй аврагдсан үйл явдалтай холбоотой. Паул христийн тослогдсон дагалдагчдыг уугануудын хурал (Ев 12:23) бөгөөд Христийн цусаар аврагдсан гэжээ (1 Те 1:10; Эф 1:7). Дээгүүр өнгөрөх баярын хурганы нэг ч ясыг хугалахгүй байх ёстой байсан. Үүний адилаар Есүсийн нэг ч яс хугарахгүй гэж зөгнөсөн байсан бөгөөд түүнийг үхэх үед энэ зөгнөл биелсэн (Ду 34:20; Ёох 19:36). Олон зууны тэртээгээс Иудейчүүд Дээгүүр өнгөрөх баярыг тэмдэглэсээр иржээ. Энэ баяр бол библид зөгнөсөн ирээдүйд ирэх сайн юмсын сүүдрүүдийн нэг байсан бөгөөд «Бурхны Хурга» Есүс Христийг онцлон заасан байдаг (Ев 10:1; Ёох 1:29).
Энэ нь «Та нарын хувьд дурсгал болох» ёстой
13 Израильчууд Дээгүүр өнгөрөх баярын учир холбогдлыг хойч үедээ хэлж тайлбарлан, олон чухал зүйлийг ойлгуулдаг байв. Тухайлбал, Ехова үйлчлэгчдээ хамгаалдгийг хэлж өгөх ёстой байлаа. Ингэснээр хүүхдүүд Еховаг бодитойгоор оршин байдаг, хүмүүст санаа тавьдаг, авран хамгаалдаг амьд Бурхан гэж ойлгодог байсан. Үнэхээр ч, Ехова Египетэд арав дахь гамшиг учруулахдаа израильчуудын ууган хүүхэд, анхны төл болгоныг амьд үлдээн хэн болохоо харуулсан билээ.
14 Христиан эцэг эхчүүд Дээгүүр өнгөрөх баярын утга учрыг охид хөвгүүддээ жил болгон хэлэх шаардлагагүй нь үнэн. Гэхдээ Бурхан өөрийнхөө хүмүүсийг хамгаалдгийг эцэг эхчүүд та бүхэн энэ түүхээс ярьж өгдөг үү? Ехова орчин үеийн үйлчлэгчдээ ч хамгаалдаг гэдэгт та үнэхээр итгэдэг үү? Энэ тухайгаа хүүхдүүддээ хэлдэг үү? (Ду 27:11; Ис 12:2). Ингэхдээ «лекц» уншдаг уу эсвэл харилцан ярилцдаг уу? Гэр бүлээрээ Еховад улам бүр итгэдэг болохын тулд энэ талаар сайтар ярилцаж байгаарай.
Эрдэнэс хайх нь
it-2 582 ¶2
Дээгүүр өнгөрөх баяр
Египетэд буулгасан арван гамшиг нь бүгдээрээ Египетийн бурхдад буулгасан шийтгэл байсан бөгөөд ялангуяа хүн малын бүх уугануудыг алсан арав дахь гамшиг нь үүнийг бүр тодорхой баталсан (Ег 12:12). Египетчүүдийн Ра бурхны хувьд хуцыг ариун гэж үздэг байсан тул Дээгүүр өнгөрөх баярын хурганы цусыг гэрийнхээ хаалганд түрхэнэ гэдэг нь Египетчүүдийн хувьд доромжлол байсан. Бухыг ч мөн ариун гэж үздэг байсан бөгөөд бухны анхны төлийг алсан нь Осирис бурханд цохилт болсон нь тодорхой. Фараон өөрөө бас Ра бурхны хүү хэмээгдэн хүндлэгддэг байсан. Тиймээс Фараоны ууган хүү алуулсан нь Ра, Фараон хоёрын чадваргүй дорой болохыг харуулсан.
it-1 504 ¶1
Цуглаан
Эдгээр «ариун цуглаан»-уудын нэг өвөрмөц онцлог нь тийм цуглааны үеэр ард түмэн ямар ч ажил хийж болохгүй байсан. Жишээ нь, исгээгүй талхны баярын эхний болон долоо дахь өдөр бас «ариун цуглаан» хийдэг байсан бөгөөд энэ талаар Ехова: «Энэ өдрүүдэд хүн бүрийн идэх юмыг л бэлдэхээс өөр ямар ч ажил та нар бүү хий» гэж хэлжээ (Ег 12:15, 16). Гэхдээ «ариун цуглаан»-ы үеэр тахилчид Еховад тахил өргөөд завгүй байдаг байсан (Ле 23:37, 38) бөгөөд үүнийг нь өдөр тутмын ажил бүү хий гэсэн тушаалыг зөрчсөнд тооцдоггүй байв. Ариун цуглааны үеэр жирийн ард иргэд юу ч хийлгүй залхуурч өнгөрөх бус Еховатай илүү ойртож дотносох боломжтой байсан. Долоо хоног бүрийн амралтын өдөр хүмүүс Бурхнаа шүтэж сургаал сонсохоор хамт цугладаг байжээ. Хожим нь синагогт болдог байсны адилаар тэдэнд Бурхны үгийг уншиж, утга санааг нь тайлбарлаж байгааг сонсох боломж гардаг байв (Үй 15:21). Ингэж хүмүүс амралтын өдөр болон «ариун цуглаан» явагддаг бусад өдрүүдэд ажил хийлгүй залбирч, бүтээгч болон түүний санаа зорилгыг эргэцүүлэн бодоход зүрх сэтгэлээ зориулдаг байжээ.—ХУРАЛ, ЦУГЛААН-ыг үзнэ үү.