«Амьдрал, үйл хэрэг цуглаанаар үзэх материал»-ын хавсралт
8-Р САРЫН 3–9
БУРХНЫ ҮГЭН ДЭХ ЭРДЭНЭС | ЕГИПЕТЭЭС ГАРСАН НЬ 13, 14
«Бат зогсож, ЭЗЭНий авралыг харцгаа»
w13 2/1 4
Мосе бат итгэлтэй хүн байсан
Бурхан Улаан тэнгисийг дундуур нь хувааж израйлчуудад зугтах замыг нээж өгнө гэдгийг Мосе төсөөлөөгүй байсан биз ээ. Гэхдээ Бурхныг ард түмнээ хамгаалахын тулд ямар нэгэн зүйлийг заавал хийнэ гэдэгт тэрбээр итгэлтэй байсан. Тиймээс элэг нэгт израйлчуудыгаа өөртэйгөө адилхан итгэл үнэмшилтэй байгаасай гэж хүссэн. Мосе ард түмэнд «Бүү айцгаа! Бат зогсож, ЭЗЭНий авралыг харцгаа. Тэр өнөөдөр үүнийг та нарын төлөө гүйцэтгэх болно» гэж хэлснийг Библиэс уншиж болно (Египетээс гарсан нь 14:13). Мосе израйлчуудынхаа итгэлийг бэхжүүлж чадсан уу? Тийм ээ. Библид зөвхөн Мосегийн тухай биш, бүх израйлчуудын тухай «Итгэлээр, тэд хуурай газраар явж байгаа юм шиг Улаан тэнгисийн дундуур гарсан юм» гэж бичсэн байдаг (Еврей 11:29). Мосегийн итгэлээс зөвхөн тэр өөрөө гэлтгүй, тэрнээс үлгэр дуурайл авсан хүн бүр ач тусыг нь хүртсэн.
w09 3/15 7 ¶2-3
Чи Еховаг мартах ёсгүй
Египетчүүдийг тулааны морин тэрэгнүүдээ урагшлуулах гэж зовж байх зуур бүх израйлчууд зүүн эрэг рүү хүрчээ. Тэгэхэд Мосе Улаан тэнгисийн дээгүүр гараа сунгав. Тэгээд Ехова хонгилон замын хоёр талд хана болж байсан усыг нураалаа. Сая сая тонн ус фараон болон цэргүүдийг нөмөрч, бүгдийг нь живүүлжээ. Дайснуудаас хэн ч амьд гарсангүй. Израйл чөлөөлөгдлөө! (Ег. 14:26–28; Дуу. 136:13–15).
Ойр хавийн үндэстнүүд энэ мэдээг дуулаад олон жилийн туршид айдастай үлдсэн хэвээрээ байлаа (Ег. 15:14–16). 40 жил өнгөрсний хойно Иерихогийн Рахаб хоёр израйл эрд «Та нараас айх айдас биднийг нөмөрснийг ... би мэдэж байна. Учир нь Египетээс та нарыг гарахад ЭЗЭН хэрхэн Улаан тэнгисийн усыг та нарын өмнө ширгээснийг ... бид сонссон билээ» гэж хэлжээ (Иош. 2:9, 10). Хиймэл бурхдыг шүтдэг үндэстнүүд ч Еховаг ард түмнээ хэрхэн аварсныг мартаагүй байв. Израйлчууд Бурхнаа мартахгүй байх ноцтой олон шалтгаантай байжээ.
Эрдэнэс хайх нь
it-1 1117
Зам харгуй
Эрт дээр үеэс Палестин нутгийн хотууд ба хаант улсууд нь олон зам харгуй болон хэдэн том худалдааны жимээр холбогдож байлаа (То 20:17–19; 21:21, 22; 22:5, 21–23; Иош 2:22; Шү 21:19; 1Са 6:9, 12; 13:17, 18). Египетээс филистийн хотууд болох Газ болон Ашкелон хүрээд зүүн хойшоо Мегиддо руу хөтөлдөг замыг тэр үеийн гол зам байсан гэж одоо үздэг. Тэгээд цаашаагаа Галил тэнгисийн хойд талын Хазор хотоор дайрч Дамаск руу ордог байлаа. Филистээр дайрдаг энэ зам Египетээс Амласан газар луу хүргэх хамгийн дөт зам байжээ. Гэхдээ Ехова израйлчуудыг филистчүүдийн довтолгооноос болж зориг нь мохохгүй байгаасай гээд тэднийг өөр замаар хөтөлж нинжин сэтгэл гаргасан (Ег 13:17).
it-1 782 ¶2-3
Египетээс гарсан нь
Израйлчуудыг гатлах үед Улаан тэнгис хаана хуваагдсан бэ?
Тэднийг хоёр дахь буудаллах газар буюу «цөлийн захад байх» Етамд ирэхэд Бурхан Мосед «Эргэж ... Пи-хахиротын өмнө ... далайн эрэгт буудалла» гэж тушаасныг анхаарууштай. Энэ үйлдэл нь израйлчуудыг «төөрсөн» хэмээн фараонд итгүүлэх зорилготой байсан (Ег. 13:20; 14:1–3). Израйлчуудыг Эль Хаж замаар явсан гэж боддог эрдэмтэд «буцаж эргэх» гэдэг еврей үйл үгийг тайлбарлахдаа энэ нь тодорхой утга илэрхийлдэг бөгөөд зүгээр нэг «зүгээ өөрчлөх» юм уу «хажуугаар нь өнгөрөх» биш, харин буцаж явах юм уу нэлээн холоор тойрч явна гэсэн утга агуулдаг гэж үздэг. Тэднийхээр бол израйлчууд Суэцийн булангийн үзүүр хэсгийн хойд талд хүрч очоод зүгээ бүрмөсөн өөрчлөн булангийн баруун талд буй Иебел Атага уул нурууны зүүн талд нь гарсан. Иймээс тэднийг хойд зүгээс мөшгөвөл израйлчууд шиг үй олон ард түмэн тэндээс зугтах гарцгүй, замд нь тээглэсэн тэнгис саад болж тэд гацаанд орох байлаа.
1-р зууны иудейчүүдийн уламжлалт үзэл бодол үүнтэй бас адилхан. Гол нь дээрх дүр зургийн тайлбар нь олон эрдэмтний үзэл бодолтой зөрдөг ч, Библид өгүүлсэн нөхцөлтэй нийцдэг нь илүү чухал (Ег 14:9–16). Гаталсан хэсэг нь Суэцийн булангийн (Улаан тэнгисийн баруун салааны) үзүүрээс хол байсан учраас фараоны цэргүүд Суэцийн булангийн үзүүрийг шулуухан тойроод израйлчууд руу довтлох боломжгүй байсан нь тодорхой (Ег 14:22, 23).
8-Р САРЫН 10–16
БУРХНЫ ҮГЭН ДЭХ ЭРДЭНЭС | ЕГИПЕТЭЭС ГАРСАН НЬ 15, 16
«Еховад магтуу дуулагтун»
w95 10/15 11 ¶11
Жинхэнэ Бурхнаас одоо эмээхийн учир юу вэ?
11 Ехова Египетийн цэргүүдийг устгахад шүтэн бишрэгчид нь түүнийг өргөмжилж, алдар нэр нь өргөн тархсан (Иошуа 2:9, 10; 4:23, 24). Тийм ээ, Еховагийн нэр Египетийн хүчин мөхөс, сүсэгтэн олноо аварч чадаагүй хуурамч бурхдаас хамаагүй дээгүүр өргөмжлөгдсөн. Египетчүүд хиймэл бурхдадаа, мөхөс хүмүүст, бас цэргийн хүчиндээ найдаж байснаас болж итгэл нь тийн хөсөрдсөн (Дуулал 146:3). Израйлчуудын сэтгэл хөдөлж тэд ард түмнээ аврах чадалтай, амьд Бурхандаа магтуу дуулж, бишрэн эмээдгээ харуулсан нь ойлгомжтой.
w95 10/15 11-12 ¶15-16
Жинхэнэ Бурхнаас одоо эмээхийн учир юу вэ?
15 Хэрвээ бид аюулаас аврагдан Мосегийн дэргэд зогсож байсан бол сэтгэл маань хөдөлж ийн дуулах байсан: «Өө, ЭЗЭН, бурхдын дунд Тан шиг хэн байна вэ? Ариун байдалдаа сүр жавхлантай, магтаал дотор аймшиг төрүүлмээр, гайхамшгуудыг бүтээгч Тан шиг хэн байна вэ?» (Египетээс гарсан нь 15:11). Сэтгэл хөдөлгөм энэ үйл явдал үүнээс хойш олон зууны турш магтан дуулагдсан. Элч Ёохан Библийн сүүлчийн номд Бурхны үнэнч тослогдогсдоос бүрдсэн бүлэг хүмүүсийн тухай бичихдээ «Тэд Бурхны боол Мосегийн дуу болон Хурганы дууг дуулж байлаа» хэмээжээ. Агуу энэ дуунд юуны тухай өгүүлдэг вэ? «Төгс хүчит Ехова Бурхан, таны үйл хэрэг агуу бөгөөд гайхамшигтай. Мөнхийн Хаан, таны зам шударга сайн бөгөөд үнэн. Ехова, танаас эмээхгүй, нэрийг тань алдаршуулахгүй хэн байх вэ? Учир нь ганцхан та үнэнч билээ» гэж бичигдсэн байдаг (Илчлэл 15:2–4).
16 Өнөөдөр ч гэсэн Бурхны зөвхөн гардан бүтээснийг нь гэлтгүй хуулийг нь ч өндөр үнэлдэг, чөлөөлөгдсөн шүтэгч олон байна. Орон бүрээс гаралтай энэ хүмүүс Бурхны шударга хууль тушаалыг сонсоод хүлээн зөвшөөрч, ажил хэрэг болгодог учраас сүсэг бишрэлийн хувьд чөлөөлөгдөж, бузартсан энэ ертөнцөөс тусгаар байдаг. Жил бүр олон зуун мянган хүн энэ бузар ертөнцийн нөлөөнөөс салж, Еховаг шүтдэг хүмүүсээс бүрдэх цэвэр, зөв шударга байгууллагад нэгддэг. Удахгүй хуурамч шашнууд болон энэ ёс бус тогтолцооны бусад хэсгийг Бурхан уур хилэнтэйгээр шүүж устгасны дараа тэд зөв тогтолцоотой шинэ ертөнцөд мөнх амьдарна.
it-2 454 ¶1
Дуу хөгжим
Израйлын найрал дуунд харилцан дуулах тохиолдол их байсан бололтой. Найрал дуучдыг хоёр бүлэг болгон хувааж ээлжлэн дуулуулах, эсвэл гоцлол дуучин ба түүнтэй харилцан дуулах дуучид ээлжлэн дуулдаг байлаа. Библид бичсэн «хариулах» гэдэг үгээр үүнийг өгүүлсэн бололтой (Ег 15:21). Дуулал 136 болон өөр хэдэн дууллыг бичсэн арга барилыг үзвэл дээрх найрал дууны хэлбэрийг тэндээс олно. Нехемиагийн үед талархал өргөх дуучдын хоёр том бүлгийг дурдсаныг, бас Иерусалимын хэрмийг Бурханд зориулах ёслолд эдгээрийг хэрхэн оролцсоныг уншвал дуучдын хоёр бүлэг дээрх аргаар дуулсныг мэдэж болно (Не 12:31, 38, 40–42).
it-2 698
Зөнч эмэгтэй
Мириам бол зөнч [эш үзүүлэгч, АББН] хэмээн Библид дурдагдсан анхны эмэгтэй. Бурхан зарим мэдээгээ Мириамаар хүргүүлсэн нь тодорхой. Ингэхдээ түүнийг агуу хүчээрээ удирдан дуулуулж мэдээгээ хүргүүлж байсан бололтой (Ег 15:20, 21). Тиймээс Мириам Аарон хоёр Мосед «[Ехова] биднээр ч гэсэн дамжуулан яриагүй юу?» хэмээснийг Сударт бичсэн байдаг (То 12:2). Ехова ч гэсэн өөрөө Микагаар хэлүүлэхдээ, израйлчуудыг Египетээс авчрах үед тэдний өмнө «Мосе, Аарон, Мириам нарыг» илгээсэн гэж дурдсан (Ми 6:4). Мириам Бурхны мэдээ дамжуулах завшаантай байсан хэдий ч түүний Бурхантай харилцах нь Мосегийнхыг бодвол сул дорой байсан. Мириам байр сууриа зохистой хэмжээнд баримтлаагүй учраас Бурхнаас сахилга батын хатуу арга хэмжээг авсан (То 12:1–15).
Эрдэнэс хайх нь
w11 9/1 14
Таны мэдлэгт
Бурхан цөлд байсан израйлчуудыг яагаад бөднө шувуугаар хооллосон бэ?
Израйлчуудыг Египетээс гарсны дараа Бурхан хоёр удаа бөднө шувууг тэдэнд илгээж хангалттай хэмжээний мах өгсөн (Египетээс гарсан нь 16:13; Тооллого 11:31).
Бөднө бол ойролцоогоор 18 см урттай, 100 орчим грамм жинтэй жижиг шувуу юм. Нүүдлийн энэ шувуу Азийн өрнөд хэсэг болон Европын ихэнх нутагт зусдаг бөгөөд хойд Африк болон Арабт өвөлждөг. Нүүдэллэх цаг болоход том сүргээр цугларч Газрын дундад тэнгисийн зүүн эргээр дайрч Синайн хойг дээгүүр ниснэ.
«Вестминстер Библийн толь бичиг»-т «[Бөднө шувуу] сайн, хурдан нисдэг бөгөөд салхины урсгалыг ашигладаг хэрнээ салхины чиглэл өөрчлөгдөх юм уу удаан ниссэнээс болж хэт ядарсан тохиолдолд сүрэг тэр чигээрээ газар унаж ухаан алдсан мэт хэвтдэг» гэж тайлбарласан байдаг. Энэ нөхцөлд нэгээс хоёр хоног амарч байгаад цаашаа нисдэг болохоор анчдад амархан баригддаг. 20-р зууны эхээр Египетээс жил болгон 3 сая бөднө шувууг хүнсний бүтээгдэхүүн болгон экспортолдог байжээ.
Бурхан израйлчуудыг бөднө шувуугаар хоёр удаа хооллосон нь хоёулаа хавар байсан. Хэдийгээр бөднө шувуу хавраар Синайн дээгүүр нисдэг ч Израйлын хуаранд аваачихын тулд Ехова «салхи гаргаж» шувуудыг туусан юм (Тооллого 11:31).
w06 1/15 31
Уншигчдын асуулт
Египетээс аврагдаад удаагүй байтал израйлчууд хоол хүнсний талаар гомдоллож эхэлсэн. Тиймээс Ехова тэдэнд Манна өгсөн (Египетээс гарсан нь 12:17, 18; 16:1–5). Тэр цагт Мосе Ааронд «Ваар авч, дотор нь нэг бүтэн омер манна хий. Түүнийг ЭЗЭНий өмнө тавьж, үе уламжлан хадгал» гэж зааварчилсан. Библид цааш нь «ЭЗЭНий Мосед тушаасан ёсоор Аарон Гэрчлэлийн [чухал бичиг баримтыг хадгалдаг хайрцаг] өмнө түүнийг тавьж хадгалав» гэж бичсэн байдаг (Египетээс гарсан нь 16:33, 34). Энэ үед Аарон ваарт маннаг хийсан нь дамжиггүй. Гэхдээ уг ваарыг Гэрчлэлийн өмнө тавья гэхэд Мосег гэрээний авдрыг хийтэл, мөн дотор нь хавтангуудаа байршуулах хүртэл хүлээх ёстой байжээ.
8-Р САРЫН 17–23
БУРХНЫ ҮГЭН ДЭХ ЭРДЭНЭС | ЕГИПЕТЭЭС ГАРСАН НЬ 17, 18
«Даруу хүн бусдыг сургаж ажлаа хуваалцдаг»
w13 2/1 6
Мосе хайр илэрхийлдэг хүн
Мосе элэг нэгт израйлчуудад хайраа илэрхийлсэн. Ехова Мосегоор дамжуулан ард түмнээ удирдаж байгааг ойлгосон израйлчууд төрөл бүрийн асуудлаа Мосегоор шийдүүлэхээр ирдэг. Библид «ард түмэн өглөөнөөс орой хүртэл Мосегийн өмнө зогсов» гэж бичсэн байна (Египетээс гарсан нь 18:13–16). Хүмүүсийг санаа зовоосон асуудлаа дэлгэхэд үүнийг тасралтгүй сонсож байсан Мосе ямар их ядарсныг төсөөл дөө! Гэхдээ Мосе хайртай хүмүүстээ тусалсандаа баяртай байжээ.
w03 11/1 6 ¶1
Аз жаргалтай амьдаръя гэвэл итгэл хэрэгтэй
Тэд хариуцлагатай байр суурьтай болохоос өмнө Бурханд таалагддаг зан чанарыг илэрхийлж ирсэн хүмүүс юм. Тэд бурхнаас эмээдгээ, Бүтээгчээ хүндэтгэн шүтдэгээ, бас түүний дургүйг хүргэх вий гэж зүрхшээдгээ хэдийнээ харуулсан ажээ. Бурхны тогтоосон ёс журмыг сахихын тулд тэд чадах бүхнээ хийсэн гэдэг нь бусдад тодорхой байсан. Шударга бусаар ашиг олохыг жигшдэг нь эрх мэдлээ урвуулан ашиглахаас сэргийлэх тэдний ёс суртахууны өндөр хэм хэмжээг харуулдаг. Тэд өөрсдийнхөө эсвэл хамаатан садан, найз нөхдийнхөө ашгийн төлөө хүмүүсийн итгэлийг урвуулан ашиглахгүй.
w02 5/15 25 ¶5
Шударга зан цэх шулуун хүмүүсийг удирддаг
Мосе ч бас даруу дөлгөөн хүн байсан. Бусдын асуудлыг шийдэх гэж ядарч байхад нь хадам эцэг Иетро нь зарим үүргээ шаардлага хангасан хүмүүст даатга хэмээн ач тустай зөвлөгөө өгчээ. Мосе хэр чадлаа мэдээд уг зөвлөгөөг дагасан нь ухаалаг хэрэг байв (Египетээс гарсан нь 18:17–26; Тооллого 12:3). Даруу хүн бусдад эрх мэдлээ даалгахдаа дурамжхан байдаггүй, зарим үүргээ шаардлага хангасан хүмүүстэй хуваалцвал эрх мэдлээ алдах вий гэж санаа зовдоггүй (Тооллого 11:16, 17, 26–29). Харин ч бусдадаа Бурхны үйл ажилд ахиж дэвшихэд тусалъя гэсэн чин хүсэлтэй (1 Тимот 4:15). Бид ч гэсэн ингэж болно биз дээ!
Эрдэнэс хайх нь
it-1 406
Бурхны агуу хүчээр удирдуулсан Судрууд
Мосегийн бичээсүүдийн дотоод зохицлыг шинжвэл эдгээр нь Бурхнаас ирсэн бөгөөд түүгээр удирдуулан бичүүлсэн, Ариун Судрын нэг хэсэг бөгөөд цэвэр шүтлэгийн удирдамж болдог гэдэгт эргэлзэх юмгүй. Мосе израйлчуудын манлайлагч ба удирдагч болсон нь өөрийнх нь хүсэл биш юм. Тэр бүү хэл, эхэндээ Мосе уг саналыг авахаас татгалзсан (Ег 3:10, 11; 4:10–14). Бурхан өөрөө Мосег сонгож түүнд гайхамшиг үйлдэх хүч өгсөн учраас Фараоны шидтэн тахилчид хүртэл Мосегийн үйлдсэн бүхэн Бурхантай холбоотой гэдгийг арга буюу хүлээн зөвшөөрсөн (Ег 4:1–9; 8:16–19). Тиймээс илтгэгч бас бичээч болох нь Мосе нэр алдар хүссэнээс биш юм. Харин ч Мосе Бурхны тушаалын дагуу, Бурхны агуу хүчээр удирдуулсан учраас эхлээд Ариун Судрын тодорхой хэсгийг ярьж, дараа нь бичсэн (Ег 17:14).
8-Р САРЫН 24–30
БУРХНЫ ҮГЭН ДЭХ ЭРДЭНЭС | ЕГИПЕТЭЭС ГАРСАН НЬ 19, 20
«Арван тушаал таны хувьд»
w89 11/15 6 ¶1
Арван тушаал бидэнд ямар хамаатай вэ?
Эхний дөрвөн тушаал нь Еховагийн өмнө бид ямар үүрэг хүлээдгийг онцолно. (Нэгдүгээр тушаал) Ехова зөвхөн өөрт нь үнэнч байхыг одоо ч гэсэн шаарддаг Бурхан юм (Матай 4:10). (Хоёрдугаар тушаал) Түүнийг шүтэхийн тулд хэн ч шүтээн хэрэглэх ёсгүй (1 Ёохан 5:21). (Гуравдугаар тушаал) Бид Бурхны нэрийг зохистойгоор, хүндэтгэн дуудах ёстой бөгөөд хайхрамжгүй дуудаж болохгүй (Ёохан 17:26; Ром 10:13). (Дөрөвдүгээр тушаал) Бидний амьдрал бүхэлдээ Бурхны ажилтай холбоотой байх ёстой. Энэ нь бидэнд өөрийгөө зөвтгөх үйлсээс холдож «амрах» боломж өгдөг (Еврей 4:9, 10).
w89 11/15 6 ¶2-3
Арван тушаал бидэнд ямар хамаатай вэ?
(Тавдугаар тушаал) Хүүхдүүд эцэг эхдээ дуулгавартай байх явдал нь өнөөдөр ч гэсэн гэр бүлийн эв нэгдлийн суурь болдог бөгөөд ингэснээр Еховагаас ивээл авчирдаг. Түүнээс гадна энэ «амлалт бүхий эхний тушаал» үнэхээр гайхалтай найдвар өгдөг! Зөвхөн «сайн сайхан амьдарна» гээгүй, «дэлхий дээр урт насална» гэж амласан байдаг (Эфэс 6:1–3). Одоо бид эцсийн өдрүүдэд амьдарч байгаа учраас, Бурхны тушаалын дагуу эцэг эхийн үгэнд ордог хүүхэд залуучууд үхлийг үзэхгүй байх боломжтой (2 Тимот 3:1; Ёохан 11:26).
Хөршөө хайрлах явдал нь түүндээ хор хөнөөл учруулахаас сэргийлдэг. Үүнд: (зургаадугаар тушаал) хүн алах, (долоодугаар тушаал) завхайрах, (наймдугаар тушаал) хулгай хийх, (есдүгээр тушаал) худлаа гэрчлэх гэх зэрэг явдлууд багтна (1 Ёохан 3:10–12; Еврей 13:4; Эфэс 4:28; Матай 5:37; Сургаалт үгс 6:16–19). Тэгвэл бидний хүсэл эрмэлзлийн талаар юу гэж байдаг вэ? (Аравдугаар тушаал) Шунахайрахыг хориглосон тушаалыг үзвэл Ехова бидний хүсэл эрмэлзлийг өөрийнх нь зарчимд нийцсэн байгаасай гэж шаарддагийг мэдэж болно (Сургаалт үгс 21:2).
Эрдэнэс хайх нь
it-2 687 ¶1-2
Тахилч
Христийн дагалдагчдын үед. Хэрэв Израйлд өөртэй нь тогтоосон гэрээг сахивал тэд өөрт нь «тахилч нарын хаанчлал, ариун үндэстэн» болно гэж Ехова амласан (Ег 19:6). Гэсэн ч Аароны үр удам тахилчаар үйлчлэх арга хэмжээ бол агуу тахилчийг ирэхийг бэлгэдэж зөвхөн тэр хүртэл үргэлжлэх байв (Ев 8:4, 5). Өөрөөр хэлбэл Хуулийн гэрээ цуцлагдаж шинэ гэрээ хүчинтэй болох цаг хүртэл үргэлжлэх байсан (Ев 7:11–14; 8:6, 7, 13). Бурхны амласан Хаант төрд Еховагийн тахилчид болж үйлчлэх боломжийг эхлээд зөвхөн израйлчуудад өгсөн. Цаг нь болоход Бурхан энэ боломжийг бас өөр үндэстнүүдэд олгожээ (Үй 10:34, 35; 15:14; Ро 10:21).
Иудейчүүдээс зөвхөн цөөн хэдэн үлдэгсэд нь Христийг хүлээн авсан. Ингээд Израйл үндэстэн жинхэнэ ёсоор тахилчдын хаант төр болон ариун үндэстнийг бүрдүүлэх гишүүдийг бэлдэж чадсангүй (Ро 11:7, 20). Израйл үнэнч байгаагүй учраас Бурхан хэдэн зуун жилийн өмнө зөнч Хосеагаар дамжуулан «Та нар мэдлэгээс татгалзсан учир Би ч бас та нарыг Миний тахилч байхаас татгалзах болно. Та нар Бурхныхаа хуулийг мартсан болохоор Би ч бас та нарын хүүхдүүдийг мартах болно» хэмээн сануулсан (Хо 4:6). Үүнтэй адилаар Есүс Иудейн удирдагчдад хэлэхдээ «Бурхны Хаант төрийн ивээлийг та нарт хүртээхгүй. Харин Бурхны хүслийг биелүүлдэг хүмүүст хүртээнэ» гэсэн (Мт 21:43). Хэдий тийм боловч, Есүс Христийг дэлхий дээр байхад Хууль хүчинтэй байсан учраас тэрбээр Аароны үр удмын тахилчийн эрх мэдлийг хүлээн зөвшөөрч, уяман өвчтэй хүнийг эдгээгээд тахилч дээр очиж зохистой өргөл өргө гэж захисан (Мт 8:4; Мр 1:44; Лу 17:14).
w04 3/15 27 ¶1
Египетээс гарсан нь номын онцлох санаа
20:5—Ехова «эцгүүдийнх нь нүглийн шийтгэлийг» ирээдүйн үр удамд нь буулгана гэсэн нь ямар учиртай вэ? Хүн насанд хүрч үүрэг хүлээх чадвартай болоход хийсэн хэрэг, зан үйлдлийнхээ л дагуу шүүгддэг. Гэхдээ израйл үндэстэн хиймэл шүтээн шүтэхэд дараах хэдэн үеийнхэн үүний хор уршгийг амссан. Үнэнч израйл хүмүүс ч үүний нөлөөг мэдэрсэн. Өөрөөр хэлбэл, үндэстний шүтлэгийн гажуудлаас болж үнэнч байдлаа хадгалахад тэдэнд хэцүү болсон байлаа.
8-Р САРЫН 31—9-Р САРЫН 6
БУРХНЫ ҮГЭН ДЭХ ЭРДЭНЭС | ЕГИПЕТЭЭС ГАРСАН НЬ 21, 22
«Амийн талаар Еховатай адил үзэл бодолтой байгаарай»
it-1 271
Зодох, саваадах
Боол эзэмшигч еврейчүүд эрэгтэй эсвэл эмэгтэй боолыг дуулгаваргүй юм уу тэрслүү загнахад саваагаар зодох эрхтэй байжээ. Гэхдээ боол нь зодуулж байхдаа амь алдвал эзэн нь шийтгүүлэх ёстой байв. Харин үүнээс хойших нэг хоёр хоногийн турш боол амьд хэвээрээ байсан бол эзэн нь санаатайгаар алаагүйн баталгаа болдог байжээ. Яагаад гэвэл, боол нь «эзний өмч» болохоор эзэн нь боолоо сахилгажуулахын тулд шийтгэх эрхтэй, мөн өмч хөрөнгөө бүрмөсөн устгаж өөрөө хохирол амсдаг хүн гэж ер байдаггүй. Түүнээс гадна, хэрвээ боол нэг юм уу хэдэн хоногийн дараа үхвэл зодуулснаас уу эсвэл өөр шалтгаанаар үхсэн үү гэдгийг тодорхойлох боломжгүй байсан. Тиймээс боол нь цаашид нэг юм уу хоёр өдөр амьд байсан бол эзэн нь шийтгүүлдэггүй байжээ (Ег 21:20, 21).
w10 4/15 29 ¶4
Ехова биднийг аюулгүй, эрүүл саруул байлгахыг хүсдэг
Мал хүнд гэмтэл учруулсан тохиолдолд бас Хуулийн заалтууд байдаг байжээ. Хэрэв бух хэн нэгэн хүнийг мөргөж алсан бол түүний эзэн бусад хүний аюулгүй байдлыг бодож уг бухыг устгах ёстой байсан. Махыг нь идэх юм уу бусдад зарах боломжгүй учраас тэр амьтныг устгах нь их гарз хохиролтой байжээ. Тэгвэл хүн гэмтээсэн бухыг эзэн нь цаашид хашиж, хянахгүй бол юу болж болзошгүй вэ? Цаашдаа уг бух хүний амийг хохироовол зөвхөн бухыг биш, эзнийг нь ч бас алах ёстой байлаа. Малаа хяналтгүй орхих зуршилтай хүн бүрд Хуулийн энэ заалт хатуу сануулга өгчээ (Ег 21:28, 29).
Эрдэнэс хайх нь
it-1 1143
Эвэр, эвэр бүрээ
Египетээс гарсан нь 21:14-т тахилч хүн ч гэсэн хүн алсан тохиолдолд үхлийн ял авах ёстойг заасан бололтой. Эсвэл санаатайгаар хүний амийг хороосон хүн тахилын ширээний эврийг барилаа гээд аврагдахгүй гэсэн утгатай байж болох юм (Х.дээ 2:28–34-тэй харьцуулаарай).