Ажил хэргийн маргааныг шийдвэрлэх нь

1 Коринт 6:1–8-ыг үзвэл, элч Паул Коринтын зарим христианыг бие биетэйгээ заргалдаж, шүүхэд хандсан талаар бичсэн байдаг. Тэднийг «зөвт бус хүмүүсийн өмнө шүүлгэхийг зүрхэлсэнд» Паулын сэтгэл зовжээ (1-р зүйл). Тэгээд бие биетэйгээ заргалдан, шүүхэд хандахын оронд христиан хуралд баримталдаг зарчмаар маргаанаа шийдэх ёстой байсныг нь тодорхой тайлбарласан. Бурхны ариун сүнсээр удирдуулан Паулын бичсэн энэ зөвлөгөөг баримтлах ёстойн учрыг товч ярилцъя. Дараа нь энэ зарчимд шууд хамаарахгүй хэдэн тохиолдлыг авч үзье.

Христиануудын дунд ажил хэргийн маргаан гарлаа гэ⁠хэд тухайн асуудлыг хувийн үзэмжээр бус, хамгийн гол нь, Еховагийн үзэл бодолд нийцүүлэн шийдэхийг хи⁠чээх хэрэгтэй (Сургаалт үгс 14:12). Есүсийн хэлснээр, маргааныг даамжрахаас нь өмнө шийдэх нь хамгийн ухаалаг арга юм (Матай 5:23–26). Гэтэл зарим христиан маргааныг эв зүйгээр шийдэхийн оронд итгэл нэгтнээ шүүхэд өгч, заргалддаг нь тоогүй. Паул: «Та нар бие биетэйгээ заргалдаж буй нь та нарын хувьд аль хэдийн сүйрэл мөн» гэж хэлжээ. Учир нь ийм явдлаас болж христиан хурал болон Бурхны нэр хүндэд сэв суух аюул учирдаг. Тиймээс, «Хуурагдах нь дээр биш үү?» хэмээн Паулын асуусныг бодож үзэх нь зүйтэй (7-р зүйл, ШГ).

Түүнээс гадна, элдэв маргааныг шийдэхэд тусалж чадах хүмүүсийг Бурхан христиан хуралд өгснийг Паул тайлбарласан. Түүний хэлснээр, Библийн мэдлэгийнхээ ачаар мэргэн ухаанд суралцсан христиан ахлагчид бол «ах дүүсийнхээ хоорондхыг», тэр тусмаа, «энэ амьдралын аар саар хэргийг» «шийдэх чадвартай» хүмүүс юм (3–5-р зүйл). Гүтгэлэг, залилан гэх мэтийн ноцтой хэргийг шийдэхэд гурван алхам хийж болохыг Есүс хэлсэн байдаг. Нэгдүгээрт, тухайн хэрэгт холбогдсон хүмүүс өөрсдөө учраа олох хэрэгтэй. Хэрэв энэ алхам амжилтгүй болбол хоёрдугаар алхмыг хийнэ. Энэ нь нэг юм уу хоёр гэрчийг байлцуулан, асуудлаа шийднэ гэсэн үг. Энэ алхам нь бүтэмжгүй болбол хурлын ахлагчдад мэдэгдэх гуравдугаар алхмыг хийнэ (Матай 18:15–17).

Христиан ахлагчид хуульч юм уу бизнесмен хүмүүс биш бөгөөд тийм байх ч албагүй. Тэд итгэл нэгтнүүдийнхээ ажил хэргийн маргааныг шийдэх үүрэг хүлээдэггүй боловч Библийн зарчмыг хэрэгжүүлэн, эв зүйгээ олоход нь хэн хэнд нь туслахыг зорьдог. Их ээдрээтэй асуудал гарвал дүүргийн харгалзагч юм уу салбараас зөвлөгөө авдаг. Гэхдээ зарим тохиолдолд Паулын зөвлөгөө шууд хамаарахгүй байж болохыг үгүйсгэх аргагүй. Ямар тохиолдол байж болох вэ?

Зарим асуудлыг хувийн сонирхолд авталгүй, зүй ёсоор нь шийдэхийн тулд шүүхээр шийдүүлэх зайлшгүй шаардлага гардаг. Тухайлбал, гэрлэлт цуцлуулах, хүүхдийг асрамждаа авах, хүүхдийн тэтгэлэг, даатгалын нөхөн төлбөр авах, дампуурсан байгууллагаас өмнө нь олгосон зээлээ буцааж авах, өв залгамжлах эрхээ баталгаажуулахын тулд хуулийн байгууллагад хандахаас өөр аргагүй байж болох юм. Түүнээс гадна, эрх ашгаа хамгаалахын тулд маргааныг арга буюу шүүхээр шийдүүлэх хэрэгтэй байж мэднэ.a

Иймэрхүү асуудлыг, гол нь, зүй ёсоор нь шийдэх зорилгоор шүүхэд хандах нь Паулын зөвлөгөөг зөрчсөн хэрэг биш ээ.b Гэхдээ христиан хүн, юуны түрүүнд, Еховагийн нэрийг ариусгаж, христиан хурлаа эв нэгдэлтэй, амар тайван байлгахад анхаарал тавих ёстой. Христийн дагалдагчдын хамгийн гол шинж нь хайр бөгөөд «хайр ... өөрийнхийг эрдэггүй» (1 Коринт 13:4, 5; Иохан 13:34, 35).