Дэлгэрүүлэгчийн сургууль
Зорилго: Сайн мэдээг үр өгөөжтэй дэлгэрүүлэх, заах чадвартай болгох
Хугацаа: Тасралтгүй үргэлжилдэг.
Хаана: Тухайн хурлын Хаанчлалын танхимд
Тавигдах шаардлага: Цуглаанд тогтмол явдаг, Библийн сургаалыг хүлээн зөвшөөрч, зарчмуудынх нь дагуу амьдардаг байх
Хэрхэн хамрагдах: Дэлгэрүүлэгчийн сургуулийн харгалзагч суралцах хүсэлтэй хүнийг бүртгэж авна.
Хажуугийн хатангиралт хатуурал өвчнөөс болоод саажсан Шарон: «Дэлгэрүүлэгчийн сургууль надад мэдээлэл хайх, түүнийгээ эвтэйхэн тайлбарлаж таниулах арга ухаанд сургаж байна. Бас энэ сургуулийн ачаар зөвхөн өөрийнхөө биш, бусдын сүнслэг хэрэгцээг анхаардаг болж байна» хэмээн ярьсан юм.
Олон жил явуулын харгалзагчаар үйлчилж буй Арни: «Би хүний өөдөөс харж чаддаггүй, ээрдэг хүүхэд байсан. Өөртөө итгэлтэй, өөрийгөө үнэлдэг болоход энэ сургууль тусалж байна. Ехова тусалж байгаа учраас би амьсгалаа зөв хуваарилж, анхаарлаа төвлөрүүлж сурч байна. Итгэл нэгтнүүд болон бусад хүмүүст Бурхнаа магтаж чадаж байгаадаа үнэхээр их баярладаг» гэжээ.
Шинэ бетелчний сургууль
Зорилго: Үр бүтээлтэй үйлчлэхэд нь Бетелийн шинэ гишүүнд туслах
Хугацаа: Долоо хоногт 45 минутаар, нийт 16 долоо хоног хичээллэнэ.
Хаана: Бетелд
Тавигдах шаардлага: Байнгын бетелчин, түр хугацааны туслагч (Бетелд нэг жилээс илүү хугацаагаар үйлчилсэн байх)
Хэрхэн хамрагдах: Бетелийн гэр бүлийн шинэ гишүүнийг бүртгэнэ.
1980-аад онд энэ сургуульд суралцсан Демитриес: «Энэ сургалтын ачаар Библиэ илүү чанартай судалдаг болсон. Бас Бетелд олон жил үйлчлэхэд бэлтгэгдсэн. Ехова намайг хайрлан халамжилж, Бетелд үр бүтээлтэй үйлчлээсэй гэж хүсдэгийг багш нар, сургалтын хөтөлбөр, амьдралд хэрэглэж болох зөвлөгөөнөөс ойлгосон» хэмээн сэтгэгдлээ хуваалцсан.
Кейтлин: «Анхаарах ёстой хамгийн чухал юм бол сүнслэг хүн байх гэдгийг би ойлгосон. Шинэ бетелчний сургуульд сурсны ачаар Еховад талархаж, өргөөг нь, байгууллагыг нь бүр их үнэлж эрхэмлэх болсон» гэжээ.
Христиан үйлчлэлийн сургууль
Зорилго: Явуулын харгалзагч, ахлагчийг, зарим тохиолдолд, туслах үйлчлэгчийг хурал болон байгууллагын өмнө хүлээсэн үүргээ биелүүлэхэд сургах (Үйлс 20:28); хурлуудын одоогийн байдал, чиг хандлага болон нэн даруй анхаарах шаардлагатай зүйлийн талаар судлах; Энэ сургуулийг хэдэн жил тутамд хичээллүүлэхийг Удирдах Зөвлөл шийднэ.
Хугацаа: Сүүлийн үед явуулын харгалзагчдыг 2–2,5 өдөр, ахлагчдыг 1,5 өдөр, туслах үйлчлэгчдийг 1 өдөр сургадаг болсон.
Хаана: Ихэнхдээ Хаанчлалын юм уу чуулганы танхимд
Тавигдах шаардлага: Явуулын харгалзагч, ахлагч, туслах үйлчлэгч байх
Хэрхэн хамрагдах: Ахлагч, туслах үйлчлэгчийг дүүргийн харгалзагч урьдаг. Явуулын харгалзагчийг салбар урьдаг.
«Богинохон хугацаанд маш их мэдээлэл өгдөг энэ сургуулийн ачаар ахлагчид баяр баясгалангаа алдалгүй, „эр хүн шиг“ үйлчлэх тэнхээтэй болдог. Үйлчлээд удаагүй юм уу эсвэл олон жилийн туршлагатай ахлагчдын хэн хэн нь сүргийг сайн хариулахад, „адил бодол дотор нягт нэгдэхэд“ суралцдаг»—Күин(доор).
«Энэ сургууль сүнслэг зүйлийг сайн ойлгуулахдаа, аюулаас сэрэмжлүүлэхдээ, сүрэгт яаж санаа тавих талаар практик зөвлөгөө өгөхдөө нэгийг нь илүүдүүлж, нөгөөг нь орхигдуулдаггүй. Ехова бидэнд ямар их энэрэнгүй сэтгэлээр тусалдаг юм бэ!»—Майкл.
Эхлэгчийн сургууль
Зорилго: Эхлэгчдэд «үйлчлэлээ гүйцээхэд» нь туслах (2 Тим. 4:5)
Хугацаа: 2 долоо хоног
Хаана: Салбар шийднэ. Ихэнхдээ Хаанчлалын танхимд
Тавигдах шаардлага: Нэг ба түүнээс олон жил эхлэгчээр үйлчилсэн байх
Хэрхэн хамрагдах: Шаардлага хангасан эхлэгчийг шууд бүртгэнэ. Энэ тухай дүүргийн харгалзагч тухайн эхлэгчид мэдэгдэнэ.
«Энэ сургууль дэлгэрүүлэх ажил болон амьдрал дээр гардаг бэрхшээлийг давахад тусалсан. Судлах, заах, Библи ашиглах арга минь илт сайжирсан. Би хүмүүст туслах, ахлагчдыг дэмжих, хурлын ахиц дэвшилд хувь нэмэр оруулахад маш сайн бэлэн болсон» гэж Лили ярьсан юм (баруун).
Энэ сургуульд хоёр удаа суралцсан Бренда: «Би мөс чанараа сайн сургаж, бусдад туслахыг үргэлж бодож явахын тулд сүнслэг зүйлд анхаарлаа 100 хувь хандуулдаг болсон. Ехова үнэхээр өгөөмөр сэтгэлтэй юм аа!» хэмээн ярьжээ.
Ахлагчийн сургууль
Зорилго: Хуралд хүлээсэн үүргээ биелүүлэхэд нь ахлагчид туслах, Еховаг шүтэхэд юу шаардлагатайг илүү сайн ойлгуулах
Хугацаа: 5 хоног
Хаана: Салбар шийднэ. Ихэнхдээ Хаанчлалын юм уу чуулганы танхимд
Тавигдах шаардлага: Ахлагч байх
Хэрхэн хамрагдах: Ахлагчийг салбар урьдаг.
АНУ-д зохион байгуулсан Ахлагчийн сургуулийн 92-р анги төгсөгчдийн сэтгэгдлийг сонирхъё.
«Энэ сургалт надад их тус болсон. Би өөрийгөө олж харсан. Еховагийн хоньдод яаж санаа тавих хэрэгтэйг ойлгосон».
«Библийн зүйлийн гол санааг онцолж байгаад бусдыг илүү сайн урамшуулахад бэлэн боллоо».
«Эндээс сурсан зүйлээ насан туршдаа санаж явна».
Явуулын харгалзагчид ба эхнэрүүдэд нь зориулсан сургууль
Зорилго: Дүүргийн болон мужийн харгалзагчийг хуралд илүү үр өгөөжтэй үйлчлэн «үг ба сургаал дотор шаргуу ажиллах» чадвартай болгох (1 Тим. 5:17; 1 Петр 5:2, 3)
Хугацаа: 2 сар
Хаана: Салбар шийднэ
Тавигдах шаардлага: Дүүргийн юм уу мужийн харгалзагч байх
Хэрхэн хамрагдах: Явуулын харгалзагчийг эхнэрийнх нь хамт салбар урьдаг
«Байгууллагыг удирддаг Есүст улам их талархдаг болсон. Ах дүүсийнхээ урмыг сэргээж, хурал бүрийн эв нэгдлийг бэхжүүлэх хэрэгтэйг ойлгосон. Явуулын харгалзагч итгэл нэгтнүүддээ зөвлөгөө өгөхдөө, ялангуяа, хатуу зэмлэх хэрэг гарвал Ехова тэднийг хайрладгийг ойлгуулах гол зорилгоо хэзээ ч мартаж болохгүйг энэ сургалтын үеэр онцолж байсан»—Жоэл, 1-р анги, 1999 он.
Ганц бие эрчүүдэд зориулсан Библийн сургууль
Зорилго: Ганц бие ахлагч, туслах үйлчлэгчийг Еховагийн байгууллагад нэмэлт үүрэг хүлээхэд сургаж бэлтгэх; Төгсөгчдийн зарим нь эх орондоо, хэрэгцээтэй газар үйлчлэх томилолт авна. Гадаадад үйлчлэх боломжтойгоо мэдэгдсэн зарим хүнийг өөр улсад томилно. Зарим төгсөгчийг төвөөс алслагдсан газар дэлгэрүүлэх ажлын эхлэлийг тавих, цар хүрээг нь өргөжүүлэх зорилгоор түр хугацааны тусгай эхлэгчээр томилно.
Хугацаа: 2 сар
Хаана: Салбар шийднэ. Ихэнхдээ Хаанчлалын юм уу чуулганы танхимд
Тавигдах шаардлага: Дэлгэрүүлэгчийн хэрэгцээ ихтэй газар үйлчлэх хүсэлтэй, 23–62 насны, эрүүл чийрэг, ганц бие эрэгтэй байх (Марк 10:29, 30); байнгын эхлэгчээр доод тал нь 2 жил үйлчилсэн, ахлагч юм уу туслах үйлчлэгчээр наанадаж 2 жил тасралтгүй үйлчилсэн байх
Хэрхэн хамрагдах: Суралцах хүсэлтэй хүмүүст мэдээлэл өгөх зорилгоор дүүргийн чуулганы үеэр уулзалт зохиодог.
АНУ-д зохион байгуулагдсан тус сургуулийн 23-р ангийг төгсөгч Рик: «Еховагийн сүнсийг чөлөөтэй нэвтрүүлж өөрийгөө өөрчлөхөд минь энэ сургууль тус болсон. Ехова даалгавар өгөөд орхичихдоггүй, даалгавраа биелүүлэхэд тусалдаг. Өөрийнхөө бус, Бурхны хүслийг анхаарвал Ехова надад хүч өгнө гэдгийг ойлгосон» гэж хэлсэн.
Германд үйлчилдэг Андреас: «Би Бурхны байгууллагыг орчин үеийн гайхамшиг гэж үнэлдэг болсон. Энэ сургалт намайг ирээдүйн ажилд бэлтгэсэн. Библид гардаг олон жишээнээс нэг чухал зүйлийг ойлгосон. Еховад болон ах дүүстээ үйлчилбэл жинхэнэ ёсоор жаргалтай болдог юм билээ» хэмээн ярьжээ.
Христиан хосуудад зориулсан Библийн сургууль
Зорилго: Еховад болон байгууллагад нь илүү үр өгөөжтэй үйлчлэхэд туслах зорилгоор нөхөр эхнэр хоёрыг тусгайлан сургадаг. Зарим төгсөгч эх орондоо, дэлгэрүүлэгчийн хэрэгцээ ихтэй газар үйлчлэх томилолт авна. Гадаадад үйлчлэх боломжтойгоо мэдэгдсэн зарим хүнийг өөр улсад томилно. Төвөөс алслагдсан газар дэлгэрүүлэх ажлын эхлэлийг тавих, цар хүрээг өргөжүүлэх зорилгоор төгсөгчдийг түр хугацааны тусгай эхлэгчээр томилж болно.
Хугацаа: 2 сар
Хаана: Энэ сургуулийг АНУ-д хичээллүүлж байна. 2012 оны 9 дүгээр сараас эхлэн салбарын харьяа нутаг дэвсгэрүүдэд хичээллүүлнэ. Гол төлөв Хаанчлалын юм уу чуулганы танхимд
Тавигдах шаардлага: 25–50 насны, эрүүл чийрэг, хэрэгцээтэй аль ч газар үйлчлэх боломжтой, «Би энд байна. Намайг явуулаач» гэсэн сэтгэлгээтэй нөхөр эхнэр хоёр байх (Ис. 6:8); гэрлээд доод тал нь 2 жил болсон, бүрэн цагаар наад зах нь 2 жил тасралтгүй үйлчилж байгаа; нөхөр нь ахлагч юм уу туслах үйлчлэгчээр дор хаяж 2 жил дараалан үйлчилсэн байх
Хэрхэн хамрагдах: Сургалтад хамрагдах хүсэлтэй хүмүүст мэдээлэл өгөх зорилгоор мужийн чуулганы үеэр уулзалт зохиодог. Хэрэв танай оронд чуулганы үеэр ийм уулзалт болдоггүй бол салбартаа захидал бичиж, дэлгэрэнгүй мэдээлэл авч болно.
«Үйлчлэлээ өргөжүүлэхийг хүсдэг хосуудад сайхан боломж олгож, амьдралыг маань өөрчилсөн 8 долоо хоног байлаа! Бид цагаа ухаалаг ашиглахын тулд шинэ амьдралын хэвшлээ өөрчлөхгүй байхаар шийдсэн» —Эрик Корина хоёр, (доор), 1-р анги, 2011 он.
Харуулын Цамхаг Нийгэмлэгийн «Гилеад» Библийн сургууль
Зорилго: Суралцагчийг хүн ам шигүү суурьшсан газар миссионер, явуулын харгалзагч, бетелчнээр үйлчлэхэд сургаж бэлтгэх; Энэ нь дэлгэрүүлэх ажил болон салбарын үйл ажиллагааг дэмжих, тогтворжуулах зорилготой.
Хугацаа: 5 сар
Хаана: АНУ-ын Нью-Йорк мужийн Паттерсон дахь Харуулын Цамхаг Нийгэмлэгийн сургалтын төвд
Тавигдах шаардлага: Гилеад сургуульд сурч байгаагүй миссионер, тусгай эхлэгч, явуулын харгалзагч, бетелчин гэх зэргийн тусгай бүрэн цагийн үйлчлэгч нөхөр эхнэр хоёр байх; хамтдаа наад зах нь 3 жил тасралтгүй үйлчилсэн байх; англиар чөлөөтэй ярьдаг, уншдаг, бичдэг байх
Хэрхэн хамрагдах: Анкет бөглөх хосыг Салбарын хороо сонгоно.
Ладей Моник хоёр АНУ-аас Африкт томилогдон үйлчилж байна. Ладей: «Гилеад сургуулийн ачаар дэлхийн аль ч орны ах дүүстэйгээ мөр зэрэгцэн ажиллахад бэлтгэгдлээ» гэж ярив.
Моник: «Бурхны Үгнээс сурсан зүйлээ хэрэгжүүлэх тусам томилогдсон газартаа илүү их баяр хөөртэй үйлчилдэг болсон. Үүнийг Еховагийн хайрын бас нэг илрэл гэж бодож байна» хэмээн нэмж хэлсэн.
Салбарын хорооны гишүүд ба эхнэрүүдэд нь зориулсан сургууль
Зорилго: Бетелийг удирдан зохицуулах, хурлуудын дэлгэрүүлэх ажилд хамаатай асуудлыг анхаарч үзэх, дүүрэг, мужийг харгалзахад нь Салбарын хорооны гишүүдэд туслах; Түүнчлэн, орчуулах, хэвлэх, хэвлэл илгээх ажлын талаар зааж сургана.
Хугацаа: 2 сар
Хаана: АНУ-ын Нью-Йорк мужийн Паттерсон дахь Харуулын Цамхаг Нийгэмлэгийн сургалтын төвд
Тавигдах шаардлага: Салбарын ба Орон нутгийн хорооны гишүүн юм уу гишүүнээр томилогдсон байх
Хэрхэн хамрагдах: Шаардлага хангасан эрчүүдийг гэргийнх нь хамт Удирдах Зөвлөл урьдаг.
25-р ангид суралцсан Лоуелл Кара хоёр Нигерид үйлчилдэг. Лоуелл: «Хэчнээн ч завгүй байсан, ямар ч даалгавар авсан, Еховаг баярлуулдаг гол нууц нь сүнслэг байдал гэдгийг энэ сургалт сануулсан. Бас бусдад хандахдаа хамгийн гол нь үйлчлэгчдэдээ хайраа илэрхийлдэг Еховаг дууриах ёстойг онцолж байсан» гэв.
Кара: «Ямар нэг зүйлийг ойлгомжтой тайлбарлаж чадахгүй бол тэр зүйлийг бусдад заахаасаа өмнө өөрөө сайн судлах хэрэгтэй гэсэн үг сэтгэлд минь хоногшсон» хэмээн нэмж хэлсэн юм.