Ехова бол хамгийн агуу ууч сэтгэлтэй Нэгэн

1. Номлогчийн үгс 7:20-ыг үзвэл Соломон хаан ямар үнэнийг хэлсэн бэ?

СОЛОМОН хаан: «Үнэнээр газар дэлхий дээр үйлдээд, нүглийг ер үйлддэггүй зөв шударга хүн гэж үгүй бөлгөө» гэж бичжээ (Ном. 7:20). Ямар үнэн үг вэ! Бид бүгд нүгэлтэй (1 Ёох. 1:8). Тиймээс Бурхнаар ч, бусдаар ч уучлуулах хэрэгтэй байдаг.

2. Дотнын найз тань уучлахад ямар санагддаг вэ?

² Та дотнын найзаа гомдоож байсан байх аа. Тэгээд сайдах гээд чин сэтгэлээсээ уучлалт гуйсан биз ээ. Найз тань уучлахад ямар санагдсан бэ? Сэтгэл амарсан уу? Бүр баярласан нь лавтай!

3. Энэ өгүүллээс ямар ямар асуултын хариуг авах вэ?

³ Бид Еховатай дотно байхыг хүсдэг. Гэвч заримдаа үгээрээ, үйлдлээрээ түүнийг гомдоочихдог. Харин Ехова уучлахад бэлэн гэдэгт яагаад итгэлтэй байж болох вэ? Ехова биднийг уучлах нь бид нэг нэгнээ уучлахаас ялгаатай гэхийн учир юу вэ? Ехова ямар хүнийг уучилдаг вэ?

ЕХОВА УУЧЛАХАД БЭЛЭН

4. Ехова уучлахад бэлэн гэдэгт яагаад итгэлтэй байж болох вэ?

⁴ Ехова гэмшсэн нүгэлтнийг уучлахад бэлэн гэдгээ Үгэндээ бичүүлж баталсан. Мосег Синаи уулан дээр байхад тэрбээр тэнгэрийн элчээ илгээж өөрийнхөө талаар ийнхүү хэлүүлдэг. «[Ехова, Ехова] Бурхан өрөвч, нигүүлсэнгүй, уурлахдаа удаан ба энэрэл хайр, үнэнээр бялхам билээ. Тэр энэрэл хайрыг мянган үеийн турш хадгалж, гэмт хэрэг, гэм буруу, нүглийг уучилдаг» (Ег. 34:6, 7). Ехова гэмшсэн нүгэлтнийг дуртайяа уучилдаг сайхан сэтгэлтэй, өршөөнгүй Бурхан юм (Нех. 9:17; Дуу. 86:15).

5. Дуулал 103:13, 14-т бичсэнээр Ехова хүмүүсийг сайн мэддэг учраас яадаг вэ?

⁵ Ехова Бүтээгч учраас дэлхий дээрх хүн бүрийг нэгд нэгэнгүй мэддэг гээд бод доо! (Дуу. 139:15–17). Төгс бус өвөг дээдсээсээ юу өвлөж авсныг ч ойлгодог. Түүнчлэн өнөөг хүртэл хэрхэн амьдарч ирсэн, одоогийн «би» хэрхэн бий болсныг ч харж л байдаг. Ехова хүн нэг бүрийг арван хуруу шигээ мэддэг учраас өрөвдөж, өршөөнгүй ханддаг (Дуу. 78:39; Дуулал 103:13, 14-ийг уншина).

6. Ехова уучлах хүсэлтэйгээ хэрхэн баталсан бэ?

⁶ Ехова уучлах хүсэлтэйгээ баталсан. Адамын буруу үйлдлээс болж хүн төрөлхтөн нүгэл, үхлийн боол болсныг тэрбээр ойлгодог (Ром 5:12). Бидний хэн нь ч өөрийгөө ч, өрөөлийг ч энэ боолчлолоос чөлөөлж чадахгүй (Дуу. 49:7–9). Тиймээс хайр халамжтай Бурхан биднийг өрөвдөөд чөлөөлөх арга хэмжээ авсан. Яасан бэ? Ёохан 3:16-д бичсэнээр Ехова цорын ганц Хүүгээ илгээж, бидний төлөө амийг нь золиосолсон (Мат. 20:28; Ром 5:19). Есүс ч өөрт нь итгэдэг хүн бүрийг аврахын тулд амиа дуртайяа өгсөн (Евр. 2:9). Хайртай Хүү нь доромжлогдон тарчилж үхэхийг хараад Ехова ямар их зовж, зүрх нь шимширсэн бол оо! Биднийг уучлах хүсэлгүй байсан бол Хүүгээ ингэж үхэхийг зөвшөөрөхгүй байх байсан.

7. Еховагаар уучлуулсан хэн хэний жишээ Библид байдаг вэ?

⁷ Ехова хүмүүсийг дуртайяа уучилсан жишээ Библид олон байдаг (Эф. 4:32). Таны санаанд хэн орж ирж байна вэ? Магадгүй Манассе хааны тухай бодсон байх. Хорон муу тэрбээр Еховагийн эсрэг ноцтой олон нүгэл үйлдсэн. Хуурамч бурхдыг шүтэж, бусдыг ч уруу татсан. Төрсөн хүүхдүүдээ харийн бурхдад тахил болгон өргөсөн. Бүр давраад Еховагийн ариун сүмд сийлмэл хөрөг тавьсан. Библид түүний тухай «ЭЗЭНий мэлмийд үлэмж их бузар мууг үйлдсэнээрээ тэрбээр ЭЗЭНийг уурлахад хүргэжээ» гэж байдаг (Ш.дэд 33:2–7). Гэхдээ Манассег үнэн голоосоо гэмшихлээр нь Ехова уучилдаг. Бас түүнийг дахин хаан болгодог (Ш.дэд 33:12, 13). Түүнчлэн завхайраад зогсохгүй, хүний аминд хүрч Еховагийн эсрэг ноцтой нүгэл үйлдсэн Давид хаан таны санаанд орсон байх. Гэвч Давидыг алдаагаа хүлээж, чин зүрхнээсээ гэмшихэд Ехова бас уучилдаг (2 Сам. 12:9, 10, 13, 14). Тийм ээ, Ехова үнэхээр уучлах дуртай. Одоо, Ехова хүмүүсийг уучлахыг хүн хүнээ уучлахтай харьцуулбал өвөрмөц онцлогтойг ярилцъя.

ЕХОВАГИЙН УУЧЛАЛ ХҮНИЙХЭЭС ЯЛГААТАЙ

8. Ехова хамгийн сайн Шүүгч учраас уучилдаг гэдгийг тайлбарлана уу.

⁸ Ехова «Газар дэлхийн Шүүгч» билээ (Эх. 18:25). Ер нь хуулиа маш сайн мэддэг хүн сайн шүүгч болдог. Ехова яг л ийм шүүгч юм. Учир нь тэрбээр Шүүгч төдийгүй Хууль тогтоогч билээ (Ис. 33:22). Зөв буруугийн талаар Ехова л яг таг хэлж чадна. Өөр хэн ч чадахгүй. Сайн шүүгч өөр яадаг вэ? Шийдвэр гаргахаасаа өмнө тухайн хэрэгтэй холбоотой бүх баримт нотолгоог мэдсэн байдаг. Харин Ехова бүхнийг мэддэг учраас хамгийн сайн Шүүгч юм.

9. Ехова уучлах эсэхээ шийдэхдээ ямар ямар мэдээллийг үндэс болгодог вэ?

⁹ Хүмүүн шүүгчээс ялгаатай нь Ехова ямар ч хэргийн талаар бүх баримтыг баараггүй мэддэг (Эх. 18:20, 21; Дуу. 90:8). Хүмүүсийн харсан, сонссон мэдээллээс гадна хараагүй, сонсоогүйг ч мэддэг. Хүнд удамшил, хүмүүжил, хүрээлэн буй орчноос гадна сэтгэц болон сэтгэл хөдлөл нөлөөлдгийг Ехова сайн ойлгодог. Тэрбээр хүний зүрхийг ч хардаг. Хүн бүрийн сэдэл хандлага, санаа зорилго, хүсэл эрмэлзлийг нэгд нэгэнгүй мэддэг. Еховад мэдэх боломжгүй юм гэж нэг ч байхгүй (Евр. 4:13). Тиймээс Ехова тухайн хэргийн бүх баримтыг мэдэж аваад түүнд үндэслэн уучлах эсэхээ шийддэг.

10. Ехова дандаа зөв шударга шүүдэг гэхийн учир юу вэ? (Дэд хууль 32:4).

¹⁰ Ехова дандаа зөв шударга шүүдэг. Хэнийг ч алаг үздэггүй. Хүнийг уучлах эсэхээ шийдэхдээ гадаад байдал, эд хөрөнгө, нэр алдар, авьяас чадварыг хардаггүй (1 Сам. 16:7; Яак. 2:1–4). Хэн ч Еховаг дарамталж чадахгүй, хахуульдаж ч чадахгүй (Ш.дэд 19:7). Тэрбээр шийдвэр гаргахдаа сэтгэл хөдлөлдөө автдаггүй (Ег. 34:7). Ехова биднийг болон нөхцөл байдлыг маш сайн мэддэг учраас хамгийн сайн Шүүгч юм (Дэд хууль 32:4-ийг уншина).

11. Ехова хүнийг уучлах нь хүн хүнээ уучлахаас өвөрмөц гэхийн учир вэ?

¹¹ Ехова хүнийг уучлах нь хүн хүнээ уучлахаас ялгаатай гэдгийг Еврей Судрыг бичигчид мэддэг байсан. Тийм учраас тэд нэг еврей үгийг заримдаа бичдэг байв. Энэ үгний тухай нэг номд ийнхүү тайлбарлажээ. «Бурхан нүгэлтнийг уучлахыг [энэ үгээр] илэрхийлдэг. Харин хүн хүнээ Бурхан шиг уучилж чадахгүй учир энэ үгийг хэрэглэдэггүй». Гэмшсэн нүгэлтнийг бүрмөсөн уучлах эрх зөвхөн Еховад бий. Еховагаар уучлуулсан хүн яадаг вэ?

12, 13. а) Еховагаар уучлуулсан хүн яадаг вэ? б) Ехова нэгэнт уучилсан бол яадаг вэ?

¹² Ехова биднийг уучилсныг мэдрэхлээрээ бид «сэргэдэг». Өөрөөр хэлбэл сэтгэл санаа тайвширч, мөс чанар цэвэр байна. Хүнээр бус, Еховагаар уучлуулсан үед л үүнийг мэдэрнэ (Үйлс 3:19). Ехова биднийг уучлахлаараа өөртэй нь тогтоосон харьцааг маань сэргээж, ерөөсөө нүгэл үйлдээгүй хүнтэй харьцдаг шиг бидэнтэй харьцана.

¹³ Ехова биднийг нэгэнт уучилсан бол тэр нүглээс болж дахин хэзээ ч буруутгахгүй, шийтгэхгүй (Ис. 43:25; Иер. 31:34). Ехова бидний нүглийг «өрнө дорноос хол байдаг шиг ... биднээс тийн холдуулдаг» (Дуу. 103:12). Еховагийн уучлал хэчнээн агуу болохыг эргэцүүлэн бодвол бид түүнээс эмээнэ, талархах сэтгэлээр бялхана (Дуу. 130:4). Гэхдээ Ехова ямар хүнийг уучилдаг вэ?

ЕХОВА ЯМАР ХҮНИЙГ УУЧИЛДАГ ВЭ?

14. Ехова юунд үндэслэн нүгэлтнийг уучлах эсэхээ шийддэг вэ?

¹⁴ Ехова нүгэлтнийг уучлах уу, үгүй юү гэдэг нь үйлдсэн нүгэл нь хэр ноцтой байснаас хамаарахгүй гэдгийг үзлээ. Бас Ехова Бүтээгч, Хууль тогтоогч, Шүүгч учраас мэдлэгтээ үндэслэн уучлах эсэхээ шийддэгийг мэдэж авлаа. Гэхдээ юуг харгалзан үздэгийг одоо ярилцъя.

15. Лук 12:47, 48-д бичсэнээр Ехова юуг харгалзан үздэг вэ?

¹⁵ Нүгэлтэн буруу юм хийж байгаагаа мэдэж байсан болов уу? Энэ нь Еховагийн харгалзан үздэг зүйлийн нэг нь юм. Есүс энэ тухай Лук 12:47, 48-д тодорхой хэлж өгсөн (уншина). Ехова гомдоно гэдгийг мэдсээр байж бузар мууг санаатайгаар үйлдсэн бол энэ нь ноцтой хэрэг юм. Ийм хүнийг Ехова уучлахгүй байж болох юм (Марк 3:29; Ёох. 9:41). Гэхдээ бид ч заримдаа буруу гэдгийг нь мэдсээр байж хийчихдэг шүү дээ. Тэгвэл Ехова хэзээ ч уучлахгүй гэсэн үг үү? Үгүй ээ! Яагаад гэвэл Ехова дараах зүйлийг бас харгалзан үздэг.

16. Гэмшинэ гэж яахыг хэлдэг вэ? Еховагаар уучлуулъя гэвэл гэмших нь яагаад чухал вэ?

¹⁶ Нүгэлтэн чин сэтгэлээсээ гэмшиж байна уу гэдгийг Ехова бас харгалзан үздэг. Гэмшинэ гэж яахыг хэлэх вэ? Гэмших гэдэг нь «бодол, хандлага юм уу зорилгоо өөрчлөхийг» хэлдэг. Бас буруу юм хийсэндээ, эсвэл зөвийг үйлдэх ёстойгоо мэдсээр байж үйлдээгүйдээ чин сэтгэлээсээ харамсаж, буруугаа хүлээхийг хэлнэ. Гэмшиж буй хүн зөвхөн нүгэл үйлдсэндээ бус, бас Еховатай дотно биш болсноосоо болоод алдаа гаргасандаа үнэн сэтгэлээсээ харамсдаг. Ноцтой нүгэл үйлдсэн Манассе болон Давид хааныг санаарай. Үнэн голоосоо гэмшсэн учраас Ехова тэднийг уучилсан (Х.дээд 14:8). Тийм ээ, Ехова гэмшсэн гэдгийнх нь нотолгоог хараад уучилдаг. Бид нүгэл үйлдсэндээ харамсаад л зогсохгүй, бас үйл хэргээрээ харуулах ёстой.b Тиймээс Еховагийн харгалзан үздэг бас нэг зүйлийг ярилцъя.

17. Өөрчлөгдөнө гэж яахыг хэлэх вэ? Үйлдсэн нүглээ давтахгүй байх нь яагаад чухал вэ? (Исаиа 55:7).

¹⁷ Өөрчлөгдөж байгаа эсэх нь Еховагийн харгалзан үздэг бас нэг зүйл юм. Өөрчлөгдөх гэдэг нь «эргэх» гэсэн утгатай. Өөрөөр хэлбэл муу юм хийхээ больж, Еховагийн таалалд нийцүүлэн амьдарна гэсэн үг (Исаиа 55:7-г уншина). Еховатай адил бодож сэтгэдэг болохын тулд үзэл бодлоо өөрчлөх хэрэгтэй (Ром 12:2; Эф. 4:23). Муу юм бодож, хийхээ болихоор бат шийдэх ёстой (Кол. 3:7–10). Мэдээж Есүсийн золиосонд итгэх итгэл маань Еховагаар уучлуулах үндэс болдог. Гэхдээ биеэ авч явах байдлаа өөрчлөх гэж чин сэтгэлээсээ хичээж байгаа хүнийг Ехова уучилна (1 Ёох. 1:7).

ЕХОВА УУЧИЛНА ГЭДЭГТ ИТГЭЭРЭЙ

18. Ууч сэтгэлтэй Еховагийн талаар юу мэдэж авсан бэ?

¹⁸ Үзсэнээ товчхон давтацгаая. Ехова бол орчлонт ертөнц дэх хамгийн агуу ууч сэтгэлтэй Нэгэн юм. Яагаад ингэж хэлж болох вэ? Нэгдүгээрт, тэрбээр уучлахад хэзээд бэлэн байдаг. Хоёрдугаарт, биднийг нэвт шувт хардаг. Биднийг хамгийн сайн мэддэг учраас үнэн голоосоо гэмшсэн эсэхийг маань хэлж чадна. Гуравдугаарт, Ехова биднийг нэгэнт уучилсан бол бичсэн юмыг баллуурдсан мэт нүглийг маань арилгадаг. Тиймээс бид цэвэр мөс чанартай болдог, Еховагийн сайшаалыг хүртэх боломжтой болдог.

19. Бид төгс бусын гайгаар нүгэл үйлддэг ч яагаад жаргалтай байх боломжтой вэ?

¹⁹ Төгс бус бид нүгэл үйлдэх нь ойлгомжтой. Харин «Судрыг ойлгох нь» толийн (англи) 2-р ботийн 771-р хуудсанд бичсэн үг биднийг тайвшруулдаг. Тэнд «Энэрэнгүй Ехова үйлчлэгчдийнхээ сул доройг ойлгодог. Тиймээс тэд төгс бусын гайгаар алдаж энддэг ч цаг үргэлж шаналаад байх шаардлагагүй (Ду 103:8–14; 130:3). Хэрэв Бурхны хүсэл тааллын дагуу амьдрахын тулд чадах бүхнээ хийдэг бол жаргалтай байна (Флп 4:4–6; 1Ёо 3:19–22)» гэжээ. Урам хайрласан ямар сайхан үг вэ!

20. Дараагийн өгүүллээр юу үзэх вэ?

²⁰ Нүгэл үйлдсэн ч чин сэтгэлээсээ гэмшвэл Ехова уучлахад бэлэн гэдгийг бодохоор үнэхээр талархах сэтгэл төрдөг. Тэгвэл ууч сэтгэлтэй Еховаг бид хэрхэн дуурайх вэ? Ехова биднийг уучлах бид бусдыг уучлах хоёр юугаараа адил, юугаараа ялгаатай вэ? Энэ ялгааг мэдэх нь яагаад чухал вэ? Дараагийн өгүүлэлд эдгээр асуултад хариулна.