Dhilebiwe ni Lukaji
14 Labo nimodha, Yesu odhowa ojha vaade vaanamaholela aafarizewu labo na Sabadu, mbwenye aliwa omusugweraga pamadhene. 2 Vano osogolo waye ahikalawo mulobwana dhaala anna oredda wodhibelana moddo ni moono.* 3 Nuwindo, Yesu wakoha aliba wakovelela malamulo ni aafarizewu egihina: “Enowenyeya onvulumusa muthu labo na Sabadu obe naari?” 4 Mbwenye aliwa kimwakunle ethu. Nuwindo oliye omudahinya mulobwana ole onvulumusa ni omuruma wihina adhowege. 5 Vano oliye wakoha egihina: “Ahere mmodha wa nyu mwanaye obe ng’ombe yaye emorela mutxelani labo na Sabadu, nerege kaavenyihemo mowaguva?” 6 Mbwenye aliwa kiyamwakunle ethu.
7 Vano oliye nuwawoona wihina athu ale yithaniwe yadhiveliwa okarati mburo dhathima, oliye wawaddela nladdaniho nimodha egihina: 8 “Mwithaneliwa mathanga amatelo, kamukarati mburo wathimaya. Podi wera muthu athima wupitha we ohithaneliwavo. 9 Vano ole uwithanileni aneere owoga ni we egihina: ‘Kamwihiyedhe mburo ola muthu mmodha.’ Vano we onere ovenyavo amanyazwene odhowe wakarati mburo wogomihedha wa mundduli. 10 Mbwenye we withaniwa odhowe wakarati mburo wogomihedha wihina mulobwana ole uwithanile afiya awoge egihina: ‘Mulobwana, kadhowa wakarati niburo nathima.’ Vano we onere okanna thima vamentoni vaathu aatene yithaniwe. 11 Mwaha muthu yoole anithukule aneere ototiwa manyazo, mbwenye ole aniyevihe aneere wunnuwihiwa.”
12 Voharela oliye owoga ni mulobwana ole amwithanenle mathanga egihina: “Wamwithanela muthu vamathangani, kuwawithanelevo akwawo, addibilo, amudhawo newene amwanddamanawo ooreela. Mwaha naaliwaya yeere wuwithanela mathanga ewa, ndo yakale makalelo owuhogolosela. 13 Mbwenye wawegeredha mathanga awo wawithane athu oohaawa, ooragala, ookwethenkwa* ni oohoona; 14 mowindo onere ohagalala, mwaha aliwa kinna ethu yowuhogolosela. Mbwenye onere wawakela mareeliho mudhidhi athu owogowa* yavenyihiwaga.”
15 Mmodha wa athu yaale yithaniwe nuwawiwa madhu awonge Yesu oliye owoga egihina: “Oohagalala diyole ithaneliwe mathanga* Oomwene wa Mulugu.”
16 Yesu owoga nuliye egihina: “Mulobwana dhaala wawegeredha mathangaye, vano wawithanelavo athu owinjhiva. 17 Numala wawegeredha mathanga ale oliye omuruma mudharaaye wihina awaddele athu awithanniye egihina: ‘Mudhe, gihimala wegeredha dhaatedhene.’ 18 Mbwenye aatene okoodda elobaga nikurumuwelo. Oobajha owoga egihina: ‘Gigunle munddaga ovanene ginaya goone. Gilevelele.’ 19 Mmodha owoga egihina: ‘Gigunle ng’ombe kumi ovanene. Vevala ginaya goone. Gilevelele.’ 20 Mbwenye mmodha owoga egihina: ‘Gitenle ovanene bumwahaya kadhinenyeye.’ 21 Nuwindo mudhaari ole ohogolowa ni odhowa omwaddela dhaatedhene nabwiye. Nabwiye onyanyuwa vanlubale ni owoga ni mudharaaye egihina: ‘Kathamagela murampani ni dila dhing’ono dha muluwani, wawithane athu oohaawa, ooragala, oohoona ni ookwethenkwa.’ 22 Voharela mudhaari ole owoga egihina: ‘Nabwiya dhaatedhene mwagirumminyu dhihereya, mbwenye ohuhalave mburo.’ 23 Nuwindo nabwiye owoga ni mudharaaye egihina: ‘Kadhowa murampani ni dila dhing’ono, wawaddihedhe edhe wihina nyumba yaatene ela edhaale athu. 24 Miyo ginowuwaddelani gegihina: Kavo newene mmodha wa alobwana yaale araru yithaniwe analawihe mathangaaga.’”
25 Muthithi waathu woomuhara Yesu, vano oliye orugunuwa ni wawaddela egihina: 26 “Ole anafuna odha wa miyo, mbwenye ahawiddaga ababe, amaye mwariye, anaaye, addibile, arogoliye obe ahiiddaga egumaye* kanafwanelela okala namahara aaga. 27 Ole ahinathukula ntxikwa naye na goyi* agiharaga, kanafwanelela okala namahara aaga. 28 Motajhiha, muthu baani wa nyu, ani aafunaga omaga nyumba yotaama, ahirajhiha okarati ahelela konta korowadha, wihina oone akala aneere owedha omaga ofiyedha omala? 29 Ahera ndo, aneere omutibela alisersi mbwenye kanande omariha, vano athu ale enamusugwa enerege omuteya, 30 yegihina: ‘Mulobwana ola ahambela omaga nyumbaye, mbwenye kandile omariha.’ 31 Obe mwene baani, anavenyedha owana koddo ni mwene mmodha, ahirajhihe okarati ni apendda akala aneere owedha naatoropa 10 000 omugonjhiha mwiddani anadha ni atoropa 20 000? 32 Mbwenye oona wihina kanawedhe, aneere waruma anamasogolela* aye wihina edhowe yamulobe murenddele, oliye ahinathi ofiya. 33 Nimakalelo mamodhave, mukanne ebaribari wihina mwahihiya* dhoreela dhenyu, kamunande okala anamahara aaga.
34 “Mwebaribarene, mwinnyu bwapama. Mbwenye mwinnyu wahidhivaga, podi ohogolowela odhiva? 35 Kunakanna mabasa, kunafwanelela orahilela vati newene okala esturume.* Athu enorahilela okwibi. Ole anna mabaru owiwa, avuruwane.”