Dhilebiwe ni Lukaji

4 Yesu nudhaleliwa muzimu* wotxena, okuma oJordawu, vano othukuleliwa ni muzimu yola mwiddeddereni 2 numala malabo 40, oliye wehiwa ni Ddiyabo. Malabo yaale oliye kajhile ethu, bumwahaya, numala malabo ale oliye ovoliwa dala. 3 Vano Ddiyabo owoga nuliye egihina: “Akala we oli mwaana a Mulugu, kaasaddule mabwe ala wihina ekale pawu.” 4 Mbwenye Yesu omwaakula: “Dholebela dhinawoga dhegihina, ‘Muthu kanakalelawo ni yoojhave baahi.’”

5 Nuwindo, oliye omuthukulela mwango wootama, omooniha omwene waatene wa elabo yavati, mudhidhi vang’ono. 6 Vano Ddiyabo owoga nuliye egihina: “Miyo ginere wuvaha omwene watewene ni nthithimiho na onamathongawa, mwaha oli mmadani mwaaga ni ginanvaha ole ginanfunimina. 7 Bumwahaya wagikokorela vang’ono, dhaatedhene dhinakala dhawo.” 8 Yesu omwaakula egihina: “Dholebela dhinawoga dhegihina, ‘Omwebedhege Yehova* Mulugu awo ni omparele mabasa ootaleleya oliyeene baahi.’”

9 Nuwindo, Ddiyabo omuthukulela oJeruzale, omugweliha mburo wootama otempulu ni owoga nuliye egihina: “Akala we oli mwaana a Mulugu kivokedhe vati, 10 mwaha dholebela dhinawoga dhegihina, ‘Mulugu aneere waruma angero aye wihina yukapule,’ 11 teto, ‘Aliwa enere wuthukula mmadani, wihina nnyalo nawo nihivade nibwe.’” 12 Yesu omwakula egihina: “Dholebela dhinawoga dhegihina: ‘Kumwehe Yehova* Mulugu awo.’” 13 Vano Ddiyabo agamanle omweha mwamakalelo aamatene, oliye omwihiya omujhehedhaga mudhidhi mmodhene.

14 Nuwindo, Yesu ohogolowela oGalileya ni kopolo dha muzimu wotxena. Ni muthenga dhapama wodhela oliye ovuwa murudda dhaatedhene dhowaddamela. 15 Ohiya eyo, oliye obajha ohudhiha musinagoga mwewa, ni athu aatene yomuthithimiha.

16 Nuwindo, oliye odhowa oNazare, wengo waleliwiye, ninga elemelelo yaye labo na Sabadu, oliye ovolowa musinagoga ni ovenya wihina ileri. 17 Vano oliye ovahedhiwa rolu ya namavuhulela Izayiya, nuwindo oliye ofugula ni ofwanya mburo valebiwe madhu yawoga yegihina: 18 “Muzimu wa Yehova* oli ni miyo, mwaha oliye ohugisakula wihina gaalaleye athu oohawa muthenga dhixa. Ohugiruma wihina gawobole athu enonihiwa goyi, gaavulumuse athu ehinona ni gawobole athu eli owukuuwa, 19 wihina gilaleye yaka yofwanelela* ya Yehova.”* 20 Numala, oliye okunyanya rolu ele, onvahedhela namakavihera, oliye okarati; mbwenye athu aatene yaali musinagoga mune omusugwaga oliyene baahi. 21 Voharela, oliye wambela wawaddela egihina: “Peeno epaddi ela ya yolebela mmanlinyu wiwa ehakwanela.”

22 Athu aatene wambela omuwoga opama ni watikina madhu oothukula murima aawogiliye, ni yowoga yegihina: “Ola kahi mwaana a Juze?” 23 Mwaha wa yeyo oliye wawaddela egihina: “Mohanganyedha, munere ogiwogela madhu owihina, ‘Mediku, kivulumuse-to weeka. Ni munere owoga mwegihina keerana wuno wibaliwiwe dhithu dhimodhave niwalihu ni weriliwena oKafarnawu.’” 24 Mbwenye oliye wawaddela egihina: “Miyo ginowuwaddelani ebaribari kaawo namavuhulela anarumedhiwa elabwaaye. 25 Ginowuwaddelani ebaribari wihina malabo a Eliyaji, Wizarayeli yahikalawo amaamukwele owinjhiva, yaka tharu ni mweri mitanu nammodha odhulu wigaali wofugeyawene, yahikalawo dala elabo yaatene. 26 Naarive dhigaali ndo, Eliyaji karumiwe newene wahiyana yaala, mbwenye aarumiwe wa maamukwele ooSarefa elabo yoSidoni. 27 Teto malabo a namavuhulela Elizewu, Wizarayeli yahikalawo aliba maranya owinjhiva, mbwenye newene mmodha kaavulumusiwe,* aavulumusiwe di Naama ooSiriya.” 28 Vano athu aatene yaali musinagoga yawiwale madhu aawogiliye onyanyuwa vanlubale, 29 vano aliwa ovenya mowaguva, omutxetxeresela ode wa sidadi* ele ni omudhowana sere-sere ya mwango woneya sidadi yaye wihina envokedhe vati. 30 Mbwenye oliye watixuwa vaari vewa, othukula dila yaye odhowaga.

31 Oliye okitela oKafarnawu, sidadi dhaala yoGalileya. Wengo owahudhiha athu ni maSabadu, 32 aliwa otikina vanlubale mwaha makalelo aye oohudhiha, mwaha oliye ahudhiha oonihaga wi arumiwe ni Mulugu. 33 Mudhidhi yoole musinagoga mwewa ahikalamo mulobwana dhaala oonihiwa goyi ni muzimu wabure, oliye okuwa ni ndhu nootama egihina: 34 “Aah! Yesu Munazarenu onafuna ddi ni iyo? Wadhela onitolosa? Miyo gihunona pamadhene wihina oli oweela a Mulugu.” 35 Mbwenye Yesu omusumulula egihina: “Kamalawo, kakumamo mmwiilini mwaaye.” Vano numala ommothiha mulobwana ole vaari vaathu, muzimu ole wabure omuhiya wahimporose. 36 Mwaha wa yeyo aatene otikina ni wambela owoga vikaleliwa yegihina: “Alaya munyamadhu baani? Oliye ohukanna kopolo ni onamathonga wowigarana muzimu dhabure ni enokumamo!” 37 Nuwindo, dhithu dhaatedhene eriliyena ovuwa murudda dhaatedhene dhowaddamela.

38 Vano numala okuma musinagoga oliye odhowa vaade va Simawu. Mbogohaye Simawu aali muredda, mwaha nipanddawe* neere omusegedha, aliwa omuloba wihina amukavihere.* 39 Vano Yesu oworoma onvulumusa, mudhidhi yoole oliye ovenya odhowa wapiyela yoojha.

40 Mbwenye, vati nuuriba, aatene yaale yanna areddiwa, a dhiredda dhohiyana-iyana wadhana vaaliye. Oliye owatapulela nlada naye ni owavulumusa. 41 Ohiya eyo, ademoniyu yookuma mmwiilini mwaathu owinjhiva ni yokuwa yegihina: “We oli mwaana a Mulugu.” Mbwenye Yesu owasumulula ni kaawenya wihina ewoge ethu mwaha yahinona wihina oliye di Kiristu.

42 Vati nuusa, oliye odhowa mburo wahaali athu. Muthithi waathu, wambela omusayela, ni ofiya mburo vaaliye, ni aliwa omuwadelela wihina anaahiye. 43 Mbwenye Yesu wawaddela egihina: “Ginohowela olaleya muthenga Womwene wa Mulugu sidadi dhimodha mwaha girumiwe wihina gaapare mabasa yaala.” 44 Nuwindo, oliye odhowa olaleyaga musinagoga dhooJudeya.