Dhowera Dhaarumiwi
1 Mukwaaga Teyofilu, livuru naaga noobajha, gihulebela wodhela dhithu dhaatedhene Yesu eriliyena ni ahudhihiye, 2 okuma labo aathukuleliwiye odhulu ni nuumala wavaha dhoholela wodhela muzimu wotxena arumiwi aasakunliye. 3 Nuumala wonihiwa goyi, ogumana ni anamaharaye dila dhowinjhivadhene wihina ekanne ebaribari wi oliye ohukalawo. Nuwindo wooniwa naaliwa muwari mwa malabo 40 ni wawaddela wodhela Omwene wa Mulugu. 4 Vano agatugumane ni anamaharaye, oliye waruma egihina: “Kamukumewo oJeruzale mbwenye mujhehedhege wongo ele Ababa yupaganyiwani, mowindala ninga gawogilimi ni nyu. 5 Mwebaribarene Juwawu ohubaddiza ni manjhe, mbwenye nyu yavira malabo vang’ono, munere obaddiziwa ni muzimu wotxena.”
6 Vano, aliwa nutugumana nuliye, omukoha yegihina: “Nabwiya, omwene woWizarayeli munatikitere ovanene?” 7 Oliye wawakula egihina: “Kamunna oneeti wihina munone mudhidhiya ni nsakana Ababa esakuliwa wihina yerena efunelo yewa 8 Mbwenye, mwaakela muzimu wotxena, munere ovahiwa kopolo ni munere okala anamoona aaga okumana oJeruzale, oJudeya watewene ni oSamariya ofiyedha wigomele elabo.” 9 Nuumala wawoga madhu yaala, oliye othukuleliwa odhulu wula anamaharaye emusugwaga, nuwindo murabo omukunela ofiyedha aliwa ohandaga omoona. 10 Esugwagave odhulu mudhidhi oliye adhowaga, vohilegela ofiya mburo yoole alobwana abiili yawanre guwo* dhotxena 11 aliwa wakoha yegihina: “Nyu alobwana ooGalileya, nvova mwimelelevo ddi musugwaga odhulu? Yesu oyo athukuliwe vaari veenyu adhowiwana odhulu, anaadhe ni makalelo mamodhave ninga mmoonilinyu adhowaga odhulu.”
12 Nuwindo aliwa ohogolowela oJeruzale ekumaga omwangoni Woolivera onakala waddamela oJeruzale, olenddo weddiwa labo nimodha na Sabadu.* 13 Aliwa nuufiya, ogwela nyumba yodhulu yaakeliwiwa ninga aleddo. Vaakaleliwa ahikalavo Peduru, Juwawu, Tiyago, Andere, Filipi, Tome, Bartolomewu, Matewuji, Tiyago mwaana a Alfewu, Simawu ooviheya ni Judasi mwaana a Tiyago. 14 Mowiwanana, aliwa yodidela olobela vamodha, ni ahiyana amodha vamodha ni Mariya amaye Yesu ni addibile.
15 Malabo yaale, Peduru ovenya vaari vaaddibila (athu yalivo yahakwana 120) oliye owoga egihina: 16 “Addibilaga, yaali yofuneya wihina muzimu wotxena wakwanihedhe dhovuhulela wodhela Davidi ni Dholebela dhawoga wodhela Judasi aasogolele athu yaale yammagile Yesu. 17 Oliye aali vamodha ni iyo ni ahisakuliwa wihiha aapare mabasa ala oolaleya. 18 (mulobwana oyo ohugula mundda ni dhowera dhohogowa* vano nuumora ni musolo oliye otaala* erugulu, marubo okumela ode. 19 Athu aatene oJeruzale onona yapadduwe vano mburo ole ni ewogelo yewa withaniwaga Aseldama enatapulela Mundda wa Nikame.) 20 Mwaha mulivuruni na Salmo muhulebiwa mwegihina: ‘Nyumba yaye esadduwe ekale nddebe ni mwahikaliwege.’ Ohiya eyo, ‘mutholo waye avahiwe muthu mmodhaya.’ 21 Teto ohoweleya muthu aniharesa mudhidhi wamutene Nabwiya Yesu aaparaga mabasaye ni iyo 22 (obajha labo abaddiziwiye ni Juwawu ofiyedha labo athukuliwiye vaari vehu adhowiwana odhulu) akale namoona vamodha ni iyo wodhela ovenyihiwa waye muukwani.”
23 Nuwindo, osakuliwa athu abiili: Juze ithaniwa Barsaba aanoniwe ni ndina na Justu ni Matiyaji. 24 Nuumala, aliwa olobela yegihina: “Yehova,* nyu dinonne murima dhaathu aatene, muthomeni ole mmusakunlinyu wa alobwana yaala abiili 25 wihina athukule mutholo ola wolaleya ni akale murumiwi, mutholo dhendha Judasi ahiiliye wihina adhowe mburo onfwanelele.” 26 Nuwindo, aliwa ovokedhana gari wihina alobwana yaale abiili emusakulevo muthu mmodha, vano gari ele ommorela Matiyaji, oliye otaganyihedhiwa ni arumiwi ale 11.*