Alebeliye Akudda Romanu

13 Athu* aatene, yawiwelelege anamathonga avadhulu, mwaha kaawo onamathonga ohirumedhiwe ni Mulugu; anamathonga aatene ekaratile vampaddoni, othonga wewa wenyiwe ni Mulugu. 2 Mowindala, muthu yoole anaavanyiha anamathonga, anavanyiha nlamulo na Mulugu teto athu yayo enavanyiha nlamulo nenno enere otorihiwa. 3 Athu enawoova anamathonga, kahiyo ale enerana dhithu dhapama mbwenye baale enerana dhithu dhabure. We onofuna wihina ohawovege anamathonga? Weregena dhithu dhapama malabo aamatene, windo aliwa enere wuthithimiha; 4 anamathonga ayo erumiwe ni Mulugu wihina dhawo dhuweddelege pama. Mbwenye akala we onowerana dhithu dhabure, wawovege, mwaha aliwa ehikanna kopolo* wihina yusinyuse teto aliwa kivaheliwe ebewene. Aliwa enaapara mabasa a Mulugu wihina yaasinyuse ale enerana dhithu dhabure.

5 Bumwahaya, sapama wawiwelela, kahiyo mwaha wawoova wihina enadha yusinyuseni, mbwenye mwaha wa mubuwelo weenyu. 6 Teto bumwahaya mugaliva musoko; mwaha aliwa enaapara mabasa a Mulugu ni enowapara mabasa ayo malabo aamatene. 7 Mwavahege aatene ele enafwaneleliwa: mwalive musoko ale enakukusa musoko, anakukusa sokela, musokelege, analoba wooviwa mmoovege; ole analoba othithimihiwa, mmuthithimihege.

8 Kamukanne mangawu ni muthu ehili odhivelana mmodha ni mukwaye, mwaha ole anamudhivela mukwaye onowiwelela Nlamulo. 9 Malamulo eni: “Kukume mba,* kumpe muthu, kuwiye, kukalele nrima ethu yamwinnya,” teto malamulo maatene eliwo enafuna yeere: “Omudhivelege mwanddamani awo ninga onidhiveliwe.” 10 Ole anna odhivela kanawerela ethu yabure akwaye, mbwenye ole anna odhivela onowawakwaneliha malamulo.

11 Mweregena eyo mwaha muhunona wi mudhidhi ola nilihu kahiyo wogonelavo, mbwenye bookala mento, mwaha ovulusiwa wehu wihithabwa waddamela okwaranya mudhidhi nibajhagawene okanna nroromelo. 12 Emahiyu enaaja ovira; vati vihanle vang’ono nuusa. Bumwahaya naarabele mabasa enapariwa oyiihini vano niware dhipano dhinawariwa mutana. 13 Mweeddelo wehu okale wofwanelela ninga athu enedda mutana. Kanivolosihege nfestani dhohidhuwanyeya, olezela, oraruwa, mweeddelo wabure,* okangana ni okalelana ajhe. 14 Mbwenye mmuware* Nabwiya Yesu Kiristu teto kamubuwelege makalelo owerana dhofuna dhomwiilini.