Aamulebeliye Titu

2 Mbwenye we odidele owoga ndhe dhiniwanana ni dhohudhiha dhapama. 2 Alobwana eli anakalaba enonege opimelela dhithu dhinaadhivela, ewogege ebaribari, yubuwelege pama, ekale ooliba nroromelo, oodhivela ni oovilela. 3 Emodhave, ahiyana eli anakalaba ekanne mweeddelo wapama onamuthithimiha Mulugu, kikale owaaba, kikale adhaari a vinyu, mbwenye ekale athu enahudhiha dhithu dhapama, 4 wihina yandege walaga anamwali wi ekanne odhivela naamamuniwa vamodha ni aniiwa, 5 ekanne mubuwelo wapama, ekale ooviheya ni mabasa a vaade vewa, ekale athu apama, owawiwelela amamuniwa, wihina madhu a Mulugu ehiwogiwege obure.

6 Nimakalelo mamodhave, kuselele wakongomedha azombwe wihina ekanne mubuwelo wapama 7 teto we okale yotajhiha ya mabasa apama mwa dhaatedhene. Ohudhihege dhithu dhoweela ni ebaribari yaatene, 8 madhu awo ekalege apama* wihina ahikalewo muthu anafuna waavanyiha teto wihina amwiiddani ekanne manyazo ni yahikanne ethu yaathukulele aliwa oniwoga obure. 9 Adhaari yawiwelelege anabwiyiwa mwa dhaatedhene, esayelaga wahagalasa ohiya wawakulaga ni makalelo abure, 10 kiyawiyelege, mbwenye ekale oororomeleya, wihina mwa dhaatedhene yonihe wi dhohudhiha dha Nvulusi ehu Mulugu, soowoma.

11 Mwaha opama wohinifwanelela wa Mulugu ohoneyihiwa, wathukulelaga athu aatene ovulusiwa. 12 Opama oyo, ononixagiha wihina nrabele obure ni munigwa waamalabo ni wihina nikanne ekalelo yapama, woogowa* ni nandege omulabela Mulugu elabo yeela,* 13 mowindala ndidele ojheha wakwanela wa ejhehedhelo yehu yohagalasa ni ovuwihiwa wa Mulugu munlubale ni Nvulusi ehu, Yesu Kiristu. 14 Oliye ohupeleka egumaye wihina anoobole mwa dhithu dhaatedhene dhinaaviriganiha malamulo ni ohunitxeniha wi nikale nlogo naye nathima, wihina nandege waapara mabasa apama ni murima waatene.

15 Odidele wawaddela dhithu dhendha, wakongomedha* ni wasumulula ni kopolo dhaatedhene. Kuwenye wihina muthu uupwaze.*