Karta Noobajha na Juwawu
3 Kasugwani makalelo enidhivele Ababa, ofiyedha iyo withaniwaga ahima a Mulugu! Iyo nili ndo. Bumwahaya elabo kinonne mwaha aliwa kimunonne. 2 Addibilaga ginuudhivelimini, vano nili ahima a Mulugu, mbwenye kannaddeliwe nnafunihu okala. Nihinona wihina oliye oonihiwa nnerege oligana nuliye mwaha nnerege omoona makalelo aliye. 3 Muthu yoole anna ejhehedhelo ela nuliye onowitxeniha, mowindo ninga oliye ali oweela.
4 Muthu yoole anerana yoothega anna walupa malamulo, mwaha yoothega fuwalupa malamulo. 5 Nyu muhunona wihina oliye ohoneyihiwa wihina athimihe dhoothega dhehu teto oliye kanna yoothega. 6 Muthu yoole ali mwimodhani nuliye kanerana yoothega teto kawo muthu anerana yoothega amoonile newene afiyedhile omunona. 7 Anaaga, ahikalewo muthu anuholoseni. Muthu yoole anerana dhithu dhowogowa* dowogowa, mowindala ninga oliye ali owogowa.* 8 Muthu yoole anerana yoothega anadhela wa Ddiyabo. Mwaha Ddiyabo anna othegave obajha kale. Mwaha wa yeyo Mwaana a Mulugu ohoneyihiwa wihina aagujhule mabasa a Ddiyabo.
9 Muthu yoole ali mwaana a Mulugu, kaneerana yoothega mwaha bewu* yaye elive ni muthu yoyo teto oliye kaneerana yoothega mwaha mwaana a Mulugu. 10 Nimakalelo yaala nihanona ahima a Mulugu ni ahima a Ddiyabo: muthu yoole ahinerana dhithu dhowogowa ni ahinamudhivela ddibile kanadhela wa Mulugu. 11 Mwaha ola bu muthenga mwiwalinyu okuma omambelelo wihina: ndhivelanege mmodha ni mukwaye; 12 mohiyana ni Kayini adheele wa Mbure ni ampile ddibile. Mwahaya bwaddi adhe ampege? Mwaha dhowera dhaye dhaali dhabure mbwenye dha ddibile dhaali dhapama.
13 Addibila, kamutikine akala elabo enowuwiddani. 14 Iyo nihinona wihina nihobowa muukwani ni nihikanna egumi mwaha nnowadhivela addibila. Ahinna odhivela kanoobowe muukwani. 15 Muthu yoole anamwidda ddibile mpanga teto nyu muhunona wihina kaawo mpanga anaakele egumi yohimala. 16 Mwaha wa yeyo nihifiyedha okanna odhivela: oliye ohupeleka egumaye mwaha iyo, nihiyoya nnofwanelela opeleka egumi yehu mwaha wa addibilihu. 17 Akala muthu ohukanna dhoreela dha elabo yeela teto ohumoona ddibile arabulelaga ethu-siithu mbwenye oliye kanafuna omweddela thagaraga, muthu yoyo anna odhivela ni Mulugu ni makalelo baani? 18 Anaaga, kanadhivelege athu amodha ni madhu obe ni nlumive baahi, mbwenye ni dhowera dhehu ni ebaribari.
19 Nerana ndo, nnere onona wihina nikumile mwibaribarini ni nnere okurumusa murima wehu, vamentoni va Mulugu. 20 Malabo aamatene murima wehu wanitorihaga, nnone wihina Mulugu dili munlubale opitha murima wehu ni ohunona dhithu dhaatedhene. 21 Addibila ginuudhivelimini, akala murima wehu kunantoriha, nnakala ootapuwene wihina niwoge vamentoni va Mulugu, 22 teto dhithu dhaatedhene nnalobihu nnakela mwa oliye mwaha nnowawiwelela malamulo aye ni nnowerana dhithu dhofwanelela vamentoni vaye. 23 Mwebaribarene nna thi nlamulo naye: wihina nikanne nroromelo ni ndina na mwanaye Yesu Kiristu ni ndhivelanege mmodha ni mukwaye mowindala ninga oliye anirumiliye. 24 Ohiya eyo, muthu yoole anawiwelela malamulo a Mulugu ali mwimodhani ni Mulugu teto Mulugu mwimodhani ni muthu yoyo. Wodhela muzimu anivahiliye nihinona wihina oliye ali mwimodhani ni iyo.