Ovuhulela wa Juwawu
3 “Wa mungero a mulogo woSarde olebe wegihina: Anawoga dhithu ndha duule anna muzimu 7 dha Mulugu ni thendderi 7: ‘Gihinona dhowera dhawo ni gihinona wi onofwanelela okalawo, mbwenye weya oli ookweene. 2 Wisugwerege ni olibihedhe dhithu dhendho ohanliwena ni dhahanle vang’ono nuukwa, mwaha gihoona wihina kuwapanre pama mabasa awo vamentoni va Mulugu aaga. 3 Mowindala kuddiwale dhithu wakenliwe ni wiwaliwe, okoyegeve ni othwaruwe. Mwebaribarene wahikala mento ginere wururumusa ninga mbava, mwaha kunaanone mudhidhi ginafunimi odha.
4 “‘Mbwenye we ohukanna athu* amodha ooSarde ehitakalihe dhoowara dhewa, teto aliwa enerege weedda ni miyo egawanre dhoowara dhewa dhotxena mwaha wi enoofwanelela. 5 Ole anaagonjhihe aneere owara dhowara dhotxena,* teto miyo kaginadha githimiha ndina naye mulivuruni neegumi, mbwenye gineere wubuwela ndina naye vamentoni va Ababa ni va angero ewa. 6 Ole anna mabaru owiiwa avuruwane ele muzimu onawogiwa ni mulogo.’
7 “Wa mungero a mulogo woFiladelfiya olebe wegihina: Anawoga dhithu ndha duule ali oweela, eebaribari, ole anna xavi dha Davidi ni anafugula mwamakalelo muthu ahinandiye ofuga ni anafuga mwa makalelo muthu ahinandiye ofugula: 8 ‘Gihinona dhowera dhawo, kasugwa gihufugulela musiwo muthu ahinandiye ofuga. Teto gihinona wihina we ohukanna kopolo vang’ono, onowakoya madhu aaga ni kuhiyile okala oororomeleya wodhela ndina naaga. 9 Kasugwa, athu a musinagoga ya Saddana yayo enoota yegi nili maJudewu wula ehili, gineere waweriha wihina yukokorele ni enone wi ginowudhivela. 10 Woona wihina ohakoya madhu enawoga wodhela ovilela waaga, ni miyoya gineere wukoya mudhidhi wa yoweha enaadhe veelaboni yaatene yavati wihina yaweehe athu aatene. 11 Ginoodha ovanene. Odidele opareela pamadhene ele onniwena wihina ahikalewo muthu anuwake kara yawo.
12 “‘Ole anaagonjhihe gineere omweriha wihina akale ntxikwa mutempulu ya Mulugu aaga, teto oliye kanadha avenyagamo. Gineere omuleba ndina na Mulugu aaga ni ndina na luwani ya Mulugu aaga ali Jeruzale muxa, anakita odhulu wa Mulugu aaga ni ndina naaga nixa. 13 Ole anna mabaru owiiwa avuruwane ele muzimu onawogiwa ni mulogo.’
14 “Wa mungero a mulogo woLawudiseya olebe wegihina: Anawoga dhithu ndha di Amem, namoona oororomeleya ni eebaribari ali oobajha opaddusiwa ni Mulugu: 15 ‘Gihinona dhowera dhawo, teto gihinona wihina we kunaridha newene kunapaha. Miyo gere odhiveliwa wahakale ooridha obe oopaha. 16 Mowindala, woona wi kuli oopaha newene ooridha, ginere wuthapika muwano mwaaga. 17 Woona wi onawoga wegi: “Gihireela, gihikanna dhoreela ni kaginahowela ethu” mbwenye kunonne wihina kunahagalala, onoweddiha thagaraga, uuhaawa, kunna ethu, oli muliba oohoona teto oli madave, 18 miyo ginowukongomedha wihina odhe gugulihedhe woru yoosiwe ni mootho wihina okale muthu ooreela; dhoowara dhotxena wi oware ni waakunele manyazo onniwena mwaha okala madave; murombwe wa mwintoni wihina odholihemo ni wandege woona.
19 “‘Miyo ginowasumulula ni ginowalaga aatene yaale ginaadhivelimi. Bumwahaya okale ooviheya ni othwaruwe. 20 Nvuruwane! Gili owimelene vamulago ni ginna ogogodda musiwo. Muthu iiwa ndhu naaga ni afugula musiwo gineere ovolowa mba mwaaye ni gineere omujha jantari nuliye, vano oliye ajhe ni miyo. 21 Muthu yoole anaagonjhihe, gineere onvaha ofuru wihina akarati vamodha ni miyo vampaddoni vaaga woomwene, ndala ninga miyo gigonjhihilimi ni ginookarati vamodha ni Ababa vampaddoni vewa woomwene. 22 Ole anna mabaru owiiwa avuruwane ele muzimu onawogiwa ni mulogo.’”