Karta Noobajha Naakudda Tesalonisense
5 Addibila, vano wodhela mudhidhi ni masaka kinahoweleya wulebelani ethu. 2 Mwaha nyu muhunona pamadhene wi nlabo na Yehova* nnadha ninga mbava anadha ni mahiyu. 3 Athu yambela owoga yegihina: “Murenddele ni obareleya!” vano otolosiwa wewa oneere ofiya mowaguva ni morurumusa, ndala ninga widdela onanfwanyiwa muhiyana anna wari anafuna obaala, mbwenye kinaavuluwe. 4 Mbwenye nyu addibila kamuli muyihini ofiyedha labo nno wururumusani ninga labo nnadha mbava, 5 mwaha nyu aatene muli ahima a waara ni ahima a mutana. Iyo kanili a mahiyu newene kanili a yiihi.
6 Mowindala, kanigonelevo ninga eneerana athu amodha, mbwenye nikale mento ni nlabihedhege pama mubuwelo weehu. 7 Mwaha ale enagona, enagona ni mahiyu teto ale enalezela enadhiveliwa olezela ni mahiyu. 8 Mbwenye iyo nili a mutana, nlabihedhege pama mubuwelo weehu, ohiya eyo, niware nroromelo ni odhivela oli ninga yowibarelana ya vathimarimani ya mujhila ni ejhehedhelo yovulusiwa eli ninga kapaseti; 9 mwaha Mulugu kanisakunle wihina noone owali waye, mbwenye wihina nivulusiwe wodhela Nabwiya ehu Yesu Kiristu. 10 Oliye anikwele iyo wihina nikale mento, naarive nigonaga* nikalewo vamodha nuliye. 11 Bumwahaya, mudidele otodolana ni olibihana mmodha ni mukwaye, mowindala ninga munerinyuna.
12 Vano addibila, nnowulobani wihina mwaariihege ale enaapara mabasa ooviheya vaari veenyu, enuhudhihani mwa Nabwiya ni enuulagani; 13 ni mwaariihege vanlubale nuudhivela, mwaha wa mabasa enaapariwa. Mukanne murenddele mmodha ni mukwaye. 14 Ethu emodha nnafunihu wukongomedhani addibila siila, mwaalage aliba ohiiwelela, mwaatodole ale yukuuwile, mwaalibihe ale ekwerebeye ni mwavilelegena athu aatene. 15 Pole-pole wihina munahogolose obure ni obure, mbwenye malabo maatene muthuwathuwelege werelana opama mmodha ni mukwaye vamodha ni athu aatene.
16 Muhagalalege malabo aamatene. 17 Mudidele olobela. 18 Mmutamalelege Mulugu mwa dhithu dhaatedhene. Mwaha ela sifunelo ya Mulugu wa nyu wodhela Kiristu Yesu. 19 Kamuthimihe mootho wa muzimu wotxena. 20 Kampwazege* dhovuhulela. 21 Murajhihege opendda dhithu dhaatedhene; mwamala mparele ele eli yapama. 22 Muthawe obure oli watewene.
23 Mulugu a murenddele uutxeniheni mowakwana. Vano wihina muzimu weenyu, egumi* ni mwiili weenyu, okoyiwe ohunna muladdu ni ohunna nihonya mwamakalelo aamatene, mudhidhi yoola anooneya Nabwiya ehu Yesu Kiristu. 24 Ole anuwithanani dororomeleya, mwebaribareene aneere werana eyo.
25 Addibila, mudidele onilobelela.
26 Mulojhelanege ni beju yoddibila.*
27 Ginowulobani mwa ndina na Nabwiya wihina karta nna niilereliwe addibila aatene.
28 Opama wohinifwanelela wa Nabwiya ehu Yesu Kiristu, okale ni nyu.