Karta Noobajha na Juwawu
4 Addibilaga ginuudhivelimini, kamurumedhege dhithu dhaatedhene dhinawogiwa, mbwenye mwabihege opendda wihina moone akala dhithudha dhinawogiwa dhinadhela wa Mulugu, mwaha mwilaboni mwihidhala anamavuhulela owoota.
2 Ni makalelo yaala munere wanda onona akala madhuya enawogiwa enadhela wa Mulugu: madhu aamatene enarumedha wihina Yesu Kiristu adheele omwiilini, enadha wa Mulugu. 3 Mbwenye, madhu aamatene ehinamurumedha Yesu, kinadhela wa Mulugu. Ohiya eyo, ala madhu enawogiwa ni amwiddani a Kiristu, yayo mwiwalinyu wihina yeere okumelela, vano ehifiya eli mwilaboni.
4 Anaaga, nyu mudheele wa Mulugu muhagonjhiha aliwa, mwaha ole ali mwimodhani ni nyu di munlubale omukwaranya ole ali mwimodhani ni elabo. 5 Aliwa edhele mwilaboni; teto dhithu dhinawogiwa dhinadhela mwilaboni, bumwahaya elabo egaavuruwana. 6 Iyo ndhele wa Mulugu. Muthu yoole amunonne Mulugu onoonivuruwana; mbwenye ole ahidheele wa Mulugu kananivuruwana. Nimakalelo yaala nnowanda wahiyaniha madhu ebaribari ni madhu owoota.
7 Addibila ginuudhivelimini, nididele odhivelana mmodha ni mukwaye, mwaha odhivela winadhela wa Mulugu, teto aatene yaale enna odhivela, ahima a Mulugu ni ehimunona Mulugu. 8 Ole ahinna odhivela, kamunonne Mulugu, mwaha Mulugu odhivela. 9 Mowindo, wihoneya odhivela wa Mulugu anniyena ni iyo: Mulugu ohumuruma Mwanaye mmodha mwilaboni wihina naakele egumi wodhela oliye. 10 Odhivela fuula: kahi wihina iyo dibanjhe omudhivela Mulugu, mbwenye oliye dibanjhe onidhivela ofiyedha ompeleka Mwanaye ninga mukutho wofwanelela wihina dhileveleliwe dhoothega dhehu.
11 Addibila ginuudhivelimini, akala Mulugu ohunidhivela nimakalelo yaala, nihiyoya nnofwanelela odhivelana mmodha nimukwaye. 12 Kawo muthu anamoonaga Mulugu. Nadidela odhivelana mmodha ni mukwaye, Mulugu aneere okala nihiyo, teto odhivela waye onere woneya mwigumini mwehu. 13 Nimakalelo yayo, nihinona wihina nilive mwimodhani ni Mulugu teto oliye mwimodhani ni iyo: mwaha oliye ohunivaha muzimu waye. 14 Ohiya eyo, iyo nihoona teto ninna ovaha onamoona wihina Babihu ohumuruma Mwanaye wihina aavuluse athu amwilaboni. 15 Muthu yoole anarumedha wihina Yesu Mwaana a Mulugu, Mulugu onokala mwimodhani ni muthu yoyo teto muthu oyo mwimodhani ni Mulugu. 16 Iyo, nihinona odhivela Mulugu anniyena ni iyo ni nnorumedha odhivela ngo.
Mulugu odhivela, muthu yoole anakannave odhivela anakala mwimodhani ni Mulugu vano Mulugu mwimodhani nuliye. 17 Nimakalelo yaala, odhivela ohoneya mwigumini mwehu wihina nande owoga nihanganyedhaga labo nootoriha, mowindo ninga aliye* nihiyoya nili ndo mwilaboni muna. 18 Vili odhivela, woova kawivo. Mbwenye odhivela webaribari onowigara woova, mwaha muthu oovaga kanakala ootapuwene. Ebaribariya sowi ole anoova odhivela waye kawakwanenle. 19 Iyo nihikanna odhivela, mwaha oliye dibanjhe ondhivela.
20 Akala muthu onowoga egihina: “Miyo ginomudhivela Mulugu” wula amwiiddaga ddibile, muliba woota. Eneriha sowihina muthu ahinamudhivela ddibile anandiye omoona, kanande omudhivela Mulugu, ahinandiye omoona. 21 Teto Nlamulo nakenlihu nuliye nnihina: muthu anamudhivela Mulugu, amudhivelege ddibile.