Dhowera Dhaarumiwi
3 Peduru ni Juwawu yadhowa otempulu wihina yaliganyedhe mudhidhi wolobela, wereyesa mudhidhi wa 15 wora,* 2 labo nenne mulobwana dhaala aabaliwe ooragalene eera othebiwa. Malabo aamatene apwehiwesa waddamela vamusiwoni wotempulu, withaniwa Musiwo Wowoma, wihina emukweyihedhe waaloba ethu-siithu* ale yavolowa mutempulu. 3 Mulobwana ole numoona Peduru ni Juwawu evolowaga mutempulu, oliye waaloba ethu. 4 Mbwenye, Peduru ni Juwawu omusugwa pamadhene mulobwana ole, vano Peduru owoga egihina: “Kanisugwe.” 5 Nuwindo, oliye wasugwa pamadhene, ubuwelaga wihina yeere onvaha ethu. 6 Vano, Peduru owoga egihina: “Kaginna parata newene oru, mbwenye ginere wuvaha yeele ginnimina. Mwa ndina na Yesu Kiristu Munazarenu, kavenya weeddege!” 7 Nuwindo, oliye ompareela moono woojha ni onvenyiha. Vohilegela, manyalo aye ni ddoddobwa dhaye woogowa, 8 oliye olupa wiimela, obajha weedda vano ovolowa vamodha naaliwa mutempulu eeddaga ni alupaga nuuhagalala wula anvuwihaga Mulugu. 9 Athu aatene omoona eeddaga ni anvuwihaga Mulugu. 10 Athu yaalivo, numoona wihina di mulobwana yoole akaratesa Musiwo Wowoma wotempulu alobaga ethu-sithu, aliwa otikina vanlubale ni ethu yampadduwele.
11 Mulobwana ole omuwadelela Peduru ni Juwawu wula muthithi ole waathu ogaali wotikineene, vano muthithi ole othamaga odhowa ogumana naaliwa mukodde mwa Salomawu. 12 Peduru nuwoona muthithi ole waathu, owoga egihina: “Nyu athu oWizarayeli mwahaya bwaddi mugatikina dhithu ndha ni muganisugwa ndo ekalaga ninga di iyo amukavihere muthu ola weedda ni kopolo dhehu obe mwaha wamakalelo ehu oomwebedha Mulugu? 13 Mulugu Aabaraawu a Izaki ni a Jako, Mulugu a makolo ehu, ohumuthithimiha mudhaari aye Yesu, yoole mumpelekinyu ni mmukoddilinyu vamentoni va Pilatu, naarive oliye afunaga omutapula. 14 Hee, nyu muhumukoodda mulobwana ole oweela ni owogowa;* nyu oloba wihina atapuliwe mulobwana aali mpanga, 15 teto nyu ompa Namasogolela Munlubale eegumi. Mbwenye Mulugu onvenyiha muukwani, peeno iyo nili anamoona. 16 Wodhela nroromelo ninnihuna ni ndina naye, fivala mulobwana ola mmunonninyu teto munamooninyu eeddaga. Ni nroromelo wodhela Yesu, dhihenyeya wihina mulobwana ola avulumusiwe vaari vaathu aatene. 17 Addibilaga, gihinona wihina dhithu mweerinyu kamoona, ninga anamaholela eenyu. 18 Mbwenye ni makalelo yaala ehakwanela madhu a Mulugu aawaddenliye anamavuhulela egihina: Kiristu aye eere woonihiwa goyi.
19 “Muthwaruwe ni musaddule murima dhenyu wihina dhoothega dhenyu dhileveleliwe, vano Yehova uvaheni malabo a murenddele* 20 wihina amurume Kiristu amusakunliye, yoyo ali Yesu. 21 Yoyo, odhulu wihinvita ofiyedha mudhidhi othomiwe wihina dhivenyihedhiwe dhithu dhaatedhene, dhithu dhendho Mulugu awogiliye ni mulomo waye wodhela athwaye oweela a mudhidhi wa kale. 22 Mwebaribarene Moyizeji ohuwoga egihina: ‘Yehova* Mulugu awo, aneere omukumeleliha vaari veenyu ni vaaddibilinyu, namavuhulela ooligana ni miyo. Munvuruwane dhithu dhaatedhene dhinuwaaddeliyeni. 23 Hee, muthu yoole* ahinanvuruwane Namavuhulela ola aneere otolosiwa vaari va nlogo neenyu.’ 24 Teto, anamavuhulela aatene yambele owoga obajha Samuweli odhowaga osogolo, naaliwaya ehilaleya wodhela malabo yaala. 25 Nyu muli ahima aanamavuhulela ni anipangano Mulugu enriyena ni makolo eenyu, numwaddela Abaraawu egihina: ‘Athu a emudhi yaatene ya elabo yavati enere oreelihiwa mwaha wa odhuulu wawo.’* 26 Vano numala onvenyiha muukwani Mudhaari aye, vobajhavene Mulugu omuruma wa nyu wihina uureeliheni ni amukavihere kadda muthu othwaruwa wodhela dhowera dhaye dhabure.”