Dhilebiwe ni Lukaji
21 Nuwindo Yesu nuwavenyiha mento wawoona aliba oreela evokedhaga korowa dhewa mukofirini ya mutempulu. 2 Omoona maamukwele dhaala oohaawa opwehamo korowa biili dhahanna muthengo munlubale* 3 oliye owoga egihina: “Ginowuwaddelani ebaribari: Maamukwele ola oohawa divokedhilemo korowa dhowinjhiva mukofirini wakwaranya athu aatene. 4 Mwaha aatene evokedhilemo ndhe yahanliwana, mbwenye maamukwele ola nuhaawa waye avokedhilemo dhithu dhaatedhene anniyena wihina akalewo.”
5 Vasogolova athu amodha ewogaga wodhela makalelo yaamagiwe tempulu ni mabwe oojerimela ni nvaho dhaveleliwa wa Mulugu, 6 oliye owoga egihina: “Wodhela dhithu ndha munooninyu, onere ofiya mudhidhi wahinadha wikala nibwe vadhulu va nibwe nikwaye nihindha nigujhuliwa.” 7 Anamaharaye omukoha yegihina: “Namahudhiha, kanaddeleni, dhithu ndha dhinereye alini, ki yintelelo enoonihege wihina dhithundha dhinere wereya siivi?” 8 Oliye wawaddela egihina: “Pole-pole ahikalewo muthu anuleketheni, owinjhiva enerege odha ni ndina naaga, yegihina: ‘Dimiyene,’ teto munone wihina mudhidhiya ohaddamela.’ Mbwenye kamuyewo. 9 Ohiya eyo, “Mwiwa dhiwogiwaga wodhela koddo ni ohiwanana, munoove. Mwaha dhithu ndha dhinere opadduwa mbwenye omakuthulo kunaafiye mudhidhi yoyo.”
10 Nuwindo oliye wawaddela egihina: “Mwaha nlogo nnerege ovenyedhana nlogove, omwene omweneve. 11 Winere okala oddiginyeya weelabo, mburo dhohiyana-iyana, winere orameya dhoojha ni winere okala dhiredda; athu enerege woona dhithu dhowopiha ni dhintelelo dhinlubale odhulu.
12 “Mbwenye dhithundha dhihinapadduwe, munere omagiwa ni munere oharahariwa, opelekiwa mmasinagoga mwewa ni mukambura ni munere othukuleliwa vamentoni vamamwene ni vaanamathonga mwaha wa ndina naaga. 13 Eyo enere wuvahani ofuru woovaha onamoona. 14 Mowindala, eyo ehinupadduweleni kamuthuwathuwele makalelo munafuninyu wibarela, 15 mwaha miyo ginere wuwaddelani madhu munafuninyu wawoga ni thotho dhinukavihereni wihina amwiddani enyu ehande wugonjhihani newene wuwakulani ethu. 16 Ohiya eyo, munerege opelekiwa ni abaabinyu, addibilinyu, amudhinyu, akwinyu, teto aliwa enere wapeleka amodhaya wa nyu wihina yuupeni, 17 ni munere widdiwa naathu aatene mwaha wa ndina naaga. 18 Mbwenye newene nthithi nimodha nammuruni mweenyu kannarimele. 19 Mwaha woovilela weenyu munere ovulusa eguminyu.*
20 “Mowindala mwamoona Jeruzale agarijhiwe ni anyakoddo, munone wihina ahanle vang’ono wihina agujhuliwe. 21 Vano, ale enaakale oJudeya ethawele omwangoni, ale enaakale muJeruzale ethawemo, teto ale enaakale omundda ehivolowemo, 22 mwaha ala enaakale malabo ootoriha,* wihina dhakwanele dhithu dhaatedhene dhilebiwe. 23 Ginowakubanyedha ahiyana enaakanne wari ni enamwihege malabo yayo! “Mwaha athu eelabo yavati enere osimwela vanlubale teto Mulugu onere wanyanyuwela. 24 Aliwa enere opiwa ni supadda ni enere othukuleliwa dhilabo dhaatedhene ninga adhaari; vano Jeruzale aneere onyingaleliwa ni malogo,* ofiyedha wakwanela mudhidhi othomiwe wa malogo.
25 “Ohiya eyo, winerege woneya dhintelelo onduwani, omwerini, othendderini ni veelaboni yavati, malogo enerege wikubanyedha ni kinoonege yowera mwaha wumba ni otekuma wa niya. 26 Athu enerege okomowavo* mwaha woova, ekubanyaga dhithu dhinafuna wereya elabo yavati mwaha kopolo dhodhulu dhinere oddiginyeya. 27 Vano munere omoona Mwaana Muthu adhaaga mmuraboni ni kopolo ni nthithimiho ninlubale. 28 Mbwenye, dhithu ndha dhabajha opadduwa, mukale txithi ni mwiimese musolo weenyu, mwaha woboliwa weenyu wihaddamela.”
29 Nuwindo wawaddela yoladdaniha egihina: “Musugwe nfigera ni muthanko dhaatedhene. 30 Dhambela opweta makupu, mwaannya munowona ni muhunona wihina elimwe enna waddamela. 31 Nimukalelo mmodhave, moonaga dhithu dhendha dhereyaga, munone wi Omwene wa Mulugu ohaddamela. 32 Miyo ginowuroromelihani wihina nlogo nna kannafiyedhe otolowa dhithu dhaatedhene dhihinapadduwe. 33 Elabo yodhulu ni elabo yavati enere omala mbwenye madhu aaga kinadha emala.
34 “Mudidele wiisugwera wihina mwahinyemelihe murima weenyu mwaha wothabwa othuwathuwela ojha, ong’wa, ni dhithu munahowelinyu kadda labo, wihina nlabo nno nnufwanyeni morurumusa, 35 ninga murako. Woona wi nlabo nna, nnaadhele athu aatene enakala elabo yavati. 36 Mowindala, mukale mento, mudidele olobela wihina nvuluwe mwadhaatedhene dhinafuna opadduwa, ni mwande wimela txithi vamentoni va Mwaana Muthu.”
37 Ni mutana Yesu oohudhiha mutempulu mbwenye vati variba akala omwangoni Woolivera. 38 Vati vasa muthithi waatene waathu wodhowa ogumana nuliye mutempulu wihina onvuruwane.