Alebeliye Akudda Romanu
5 Mowindala, woona wihina vano nnowoniwa ninga athu owogowa mwaha wa nroromelo, njhevo murenddele* wa Mulugu wodhela Nabwiya ehu Yesu Kiristu, 2 nroromelo ninnihuna ni Yesu nnonaddameliha ni Mulugu ni okanna opama wohinifwanelela; bumwahaya nnohagalala mwaha wa ejhehedhelo yowakela nthithimiho nnadhela wa Mulugu. 3 Kahi yeyove baahi, mbwenye nihagalale naafwanyiwaga makathamiho, mwaha nihinona wihina makathamiho enodhana ovilela; 4 ovilela winonthukulela orumedhiwa ni Mulugu; vano orumedhiwa ni Mulugu winodhana, ejhehedhelo, 5 teto ejhehedhelo, kinanthukuliha manyazo, mwaha odhivela wa Mulugu ohuheliwa mmurimani mwehu wodhela muzimu wotxena, nivahiwihu.
6 Naarive nigamanle othega, Mulugu ohusakula mudhidhi wofwanelela wihina Kiristu anikwele. 7 Kahi ethu yokweya omukwela muthu owogowa; mbwenye akala muthu apama podi oxixa okwa mwaha waye. 8 Mbwenye Mulugu ohoniha odhivela waye anniyena ni iyo, mwaha Kiristu onikwela wula nigaali athu oothega. 9 Woona wi vano nihimala wooniwa ninga athu owogowa wodhela nikame naye, kannanganyedha wihina nnere ovulusiwa Mulugu adhana owali waye. 10 Akala mudhidhi iyo naalihu amwiddani a Mulugu, nihifiyedha wandanihiwa nuliye mwaha okwa wa Mwanaye, vano kannanganyedha wihina nnere ovuluwa mwaha wa egumi yaye woona wi vano nihandana. 11 Kahi yeyove baahi, mbwenye nnohagalala ni Mulugu mwaha wa Nabwiya ehu Yesu Kiristu, wodhela oliye nifiyedhilihu wandana ni Mulugu.
12 Mwaha wa yoothega ya muthu mmodha, yoothega ehivolowa mwilaboni teto okwa ohuvolowa mwaha wa yoothega. Nimukalelo mmodhave okwa ohafwanya athu aatene mwaha wi aatene ehithega. 13 Mwaha Nlamulo nahinakalewo, mwilaboni mwahikala yoothega, mbwenye nlamulo naahikalawo, kawo muthu aninkedhiwa wihina oherana yoothega. 14 Mbwenye okwa ohulamulela ninga namathonga okuma mudhidhi wa Adawu ofiyedha mudhidhi wa Moyizeji, naarive athuya yahithegile ninga Adawu. Mowindala Adawu ooligana nuule afuna odha osogolo.
15 Mbwenye nvaho wa Mulugu ohuhiyana ni yoothega.* Akala mwaha wa yoothega ya muthu mmodha athu owinjhiva ehikwa, ki wera opama wohinifwanelela wa Mulugu ni nvaho waye. Wodhela opama wohinifwanelela wa muthu mmodha ali Yesu Kiristu, athu owinjhiva ehawakela mareeliho. 16 Mareeliho edhiile mwaha wa nvaho wamahala, kinaligana ni makathamiho aatotile muthu mmodha. Eyo ehereya, mwaha yoothega ya muthu mmodha ehaathukulela athu aatene otorihiwa, mbwenye Mulugu ohavaha mahala athu owinjhiva naarive egaathegile, bumwahaya Mulugu agawoona athu aatene ninga owogowa. 17 Akala muthu mmodha atheegile ohuhiya okwa olamulela ninga namathonga, kannanganyedha wihina athu enere wakela egumi ni enere othonga mwaha wa muthu mmodha baahi, Yesu Kiristu. Eyo enere wereya mwaha aliwa ojhavo opama winlubale wa Mulugu.
18 Mowindala ninga otheega wa muthu mmodha wathukulele athu aatene otorihiwa, ni makalelo mamodhave mwaha muthu mmodha werana dhithu dhowogowa, ohathukulela aatene wooniwa ninga athu owogowa wihina yaakele egumi. 19 Mwaha wa yoothega ya muthu mmodha baahi athu aatene ehithega, mwamakalelo mamodhave, mwaha wiwelela wa muthu mmodha, athu owinjhiva enowooniwa okala owogowa. 20 Nlamulo ndhele otonyihedha wihina athu ehithabwa otheega. Teto woona wi dhoothega dhihithabwa winjhiva, opama wohinifwanelela othabwa wenjhedhedheya. 21 Mwahaya bwaddi? Mwaha, mowindala ninga othega ni okwa wilamunliwa vamodha ninga namathonga, nimakalelo mamodhave opama wohinifwanelela olamulege wodhela wogowa ni wathukulele athu wakela egumi yohimala wodhela Yesu Kiristu, Nabwiya ehu.