Aamulebeliye Titu

1 Miyo Pawulo mudhaari a Mulugu ni murumiwi a Yesu Kiristu, gihikanna nroromelo nimodhave ninna athu esakuliwe ni Mulugu ni enonelo yowakwanela yeebaribari, eniwanana ni omwebedha Mulugu, 2 ni enadhela wa ejhehedhelo ya egumi yohimala yeyo Mulugu ahinoota, apaganyiliye malabo amundduli 3 mbwenye nuwakwana mudhidhi waye ogilabihedha miyo wihina gaalaleye athu madhu aye, mowindala ninga Nabwiya Mulugu agirumiliye 4 ginamulebela Titu mwanaga eebaribari anna nroromelo nimodhave ninga naaga:

Opama wohinifwanelela ni murenddele wa Mulugu Baabihu ni wa Kiristu Yesu nvulusi ehu, okale ni we.

5 Miyo guhiyile oKereta wihina wogolele dhithu dhinahoweleya owomihedhiwa teto waathome anamaholela mulogo a kadda luwani onaafiyegiwe mowiwanana ni dhoholela guvahilimi: 6 namaholela mulogo ahikanne ethu yowinkedhiwana, akanne muhiyana mmodha baahi, anaayeya ekanne nroromelo, ekanne mweeddelo wapama ni ekale owiwelela. 7 Namaholela ahikanne ethu yowinkedhiwana teto ninga namasogolela athomiwe ni Mulugu, kakale muthu owithukula, oonyanyuwa bure-bure, mulezeli,* oowali newene kaaparege mabasa ajhehaga oliviwa, 8 mbwenye akale muthu owawakela aleddo, oodhiveliwa opama, anubuwela ni makalelo apama, owoogowa, oororomeleya, owihiha,* 9 aaparele pamadhene madhu oororomeleya mowiwanana ni makalelo aye oohudhiha pama, wihina andege olibiha wodhela ohudhiha dhithu dhowooneleyamo ni wasumulula ale enaviriganiha.

10 Mwaha ehikalawo athu owinjhiva oohiwelela, enawoga dhithu dhohukanna mabasa ni eli anamaleketha thabwa-thabwa athu yaale enalibana muselu wowineliwa. 11 Enohoweleya wafuga mulomo, mwaha athu ayo enna ononga murala dhaatedhene, ehudhihaga dhithu dhohufwanelela, ejhehedhaga oliviwa ethu-siithu. 12 Namavuhulela ewa mmodha, ohuwoga egihina: “Akudda Kereta aliba woota, anenyama owoopiha, anamajha bure ni amangonya.”*

13 Onamoona ola bwebaribari. Bumwahaya, wasumululaga kuwawovelelege, wihina aliwa yande okanna nroromelo nooliba 14 ni ehipwaasedhege ovuruwana thalako dha maJudewu vamodha ni malamulo aathu enasukuma ebaribari. 15 Waathu yaale eli oweela, dhithu dhaatedhene soweela; mbwenye waathu ootakala ni yahinna nroromelo, waaliwa kayiwo ethu yoweela, mwaha mubuwelo wewa vamodha ni murimadhiwadha dhihimala otakala. 16 Aliwa enodandana nlumi* vathaddovene yegi nihimunona Mulugu, mbwenye mabasiwa enowoniha wihina kinamurumedha, mwaha bonyakavala, woona wi aliwa kiniwelela ni kinarumedhiwa wapara mabasa maatene apama.