Dhilibiwe ni Marku
9 Oliye wawaddelave egihina: “Ginowuwaddelani ebaribari ehikalawo amodha eli vevala ehinalawihe okwa ehinathi woona Omwene wa Mulugu odhaga ni kopolo.” 2 Nuuvira malabo matanu nammodha, Yesu omuthukula Peduru, Tiyago ni ddibileya Juwawu waadhowana mwango dhaala wootaama. Vano oliye osadduliwa vamentoni vewa; 3 dhowara dhaye osadduwa okala dhotxena ni wambela ojerimela, kaawo namafula amwilaboni yavati ande otxeniha ndale. 4 Nuwindo, okumelela Eliyaji ni Moyizeji wambela othapanya ni Yesu. 5 Vano Peduru owoga ni Yesu egihina: “Rabi, yeere owomela nahakalege vevala. Nere wamaga addammwa araru, mmodha eenyu, mmodha a Moyizeji, mmodha a Eliyaji.” 6 Mwebaribarene kaanonne ethu baani afuniye werana, mwaha aliwa yera othabwa woova. 7 Nuwindo, murabo waakunela ni okuma ndhu mmuraboni negihina: “Ola di Mwanaga ginamudhivelimi. Munvuruwanege.” 8 Aliwa osugwa dhipaddi dhaatedhene, kiyamonile muthu mmodhaya ahili Yesu baahi.
9 Ekitaga omwangoni, Yesu wakongomedha wihina ehimwaddele muthu mmodha ethu yoniliwa, ofiyedha Mwaana Muthu ovenyihiwa muukwani. 10 Aliwa wawiwelela madhu aye,* mbwenye yookangana vikaleliwa wodhela yotapulela ya ovenyihiwa muukwani. 11 Nuwindo anamahara aye omukoha yegihina: “Mwahaya bwaddi anamaleba egawoga wihina Eliyaji dinambele odha?” 12 Oliye wawakula egihina: “Mwebaribarene Eliyaji dinambele odha wihina avenyihedhe dhithu dhaatedhene. Kito dhilebeliwe ddi wihina Mwaana Muthu aneere wonihiwa goyi ni dhithu dhowinjhiva ni aneere onyemuliwa? 13 Mowindala, ginowuwaddelani wihina Eliyaji ohudha, mbwenye aliwa omwerela dhithu dhaatedhene yafuniwa ninga dhilebiwiwa wodhela oliye.”
14 Efiyaga mburo vaali anamahara amodha, woona muthithi wowinjhiva waathu wawapele ni yahikalawo anamaleba yakangana naaliwa. 15 Mbwenye muthithi ole nuwawoona aliwa otikina vanlubale, othamaga wihina yaalojhele. 16 Nuwindo, oliye wakoha egihina: “Ethu baani munakanganelinyu naaliwa?” 17 Muthu mmodha a muthithi yoole omwakula egihina: “Namahudhiha, gihimudhana mwanaga mwaha oliye ohukanna muzimu wabure wohuwoga. 18 Mburo bu mburo muzimu oyo onanfwanyiwa, onommoriha ni onokuma nipweru muwano, onowaluma meeno ni kanakanna kopolo. Miyo gihaloba anamahara enyu wihina yigare muzimu oyo wabure mbwenye kiyandile wigara.” 19 Yesu wawakula egihina: “Nyu nlogo nohukanna nroromelo, ginaakale ni nyu ofiyedha alini? Ginuvilelenani ofiyedha alini? Kamudhenani vala.” 20 Aliwa omuthukulela waaliye, vano muzimu ole numoona Yesu ommoriha muzombwe ole. Nuumora, oliye wambela wuburuwa ni okumaga nipweru muwano. 21 Vano, Yesu wakoha ababe egihina: “Ndhadha dhaambele ompadduwela alini?” Aliwa omwakula yegihina: “Obajha ehimaye, 22 teto dila dhowinjhivadhene muzimu oyo wabure onommothihela vamoothoni ni mmanjheni wihina ompe. Nabwiya, dhenyeya neddeleni thagaraga ni nikavihereni.” 23 Yesu omwaddela egihina: “Madhu ala owi: ‘Dhenyeya!’ Mwaha dhaatedhene dhinowenyeya wa ale enna nroromelo.” 24 Mohulegela ababe muzombwe ole omwakula egihina: Miyo gihikanna nroromelo! Gikavihereni vale vinagihalela nroromelo!”
25 Yesu nuwoona muthithi waathu omwaddamelaga mowaguva, oliye osumulula muzimu ole wabure egihina: “Muzimu wohuwoga ni woohiwa miyo ginowuwaddela omuhiye muzombwe ola ni onamuhogolowele dila biili!” 26 Numala okuwa ni kopolo dhaye dhaatedhene otalatala vanlubale, vano muzimu ole wabure omwihiya, muzombwe ole okalaga ninga eere okwa, athu owinjhiva wambela owoga yegihina: “Muzombwe ola ohukwa!” 27 Mbwenye Yesu omparela nlada onvenyiha, oliye wimela. 28 Vano nuuvolowa mba egaalivo yekiwa, anamahara aye omukoha yegihina: “Mwahaya bwaddi iyo nidhe nihandege wigara?” 29 Oliye wawakula egihina: “Munyamuzimu ola onigariwa ni nlobelo.”
30 Okuma vevale aliwa wabuwela oGalileya, mbwenye oliye kafunne wihina muthu di muthu anone, 31 mwaha oliye eera wahudhiha anamahara aye ni awaddelaga egihina: “Mwaana Muthu aneere opelekiwa mmadani mwaathu ni aneere opiwa, mbwenye naarive agapiwe aneere ovenyihiwa yavira malabo mararu.” 32 Mbwenye aliwa kiyonelamo ndhe awaddeliye ni yowoova omukoha.
33 Aliwa ofiya oKafarnawu. Vano nuuvolowa mba, oliye wakoha egihina: “Ndhaaga mudila mwakanganela ddi?” 34 Aliwa kuhakula ethu mwaha mudila yera okangana vikaleliwa wodhela baani aali munlubaleya. 35 Nuwindo oliye okarati, wawithana anamahara aye kumi nabiili ni wawaddela egihina: “Ole anafuna okala oobajha, akale oogomihedhaya ni akale mudhaari aathu aatene.” 36 Nuwindo oliye omuthukula mwaana ompweha vaari vewa; oliye omukubarela ni wawaddela egihina: 37 “Anamwakela mmodha wa anamwani yaala ni ndina naaga anogakela nimiyowa; ni kanagakela miyo baahi mbwenye Nuleya agirumile.”
38 Juwawu omwaddela egihina: “Namahudhiha, nihimoona muthu dhaala awigaraga ademoniyu alabihedhaga ndina nenyu vano iyo oxixa ommaaliha mwaha oliye keeddesa ni iyo.” 39 Mbwenye Yesu wakula egihina: “Kamuxixe ommaaliha, mwaha kaavo anawerana matikiniho manlubale ni ndina naaga wula agiwogaga obure. 40 Mwaha muthu yoole ahinaniharahara ali epaddi yehu. 41 Miyo ginowuroromelihani wihina yoole anuvaheni kopo modha ya manjhe oong’wa, mwaha wokala anamahara a Kiristu, kanadha ayelela mareeliho. 42 Mbwenye ole anaamukwakwathuse mmodha waathu yaala ang’ono enagiroromela, yakale yapama ommagelela mukohini mwaaye nibwe ninlubale amusilana buuru tirigu, vano avokedhiwe muniya.
43 “Akala nlada naawo nnowukwakwathusa, ogwaddewo. Sapama ovolowa ni egumi ooragalene ohiya ovokedhiwa ni malada awo aamenlene oJehena,* omoothooni ohunathima. 44* —— 45 Teto akala nnyalo nawo nnowukwakwathusa, ogwaddewo. Sapama ovolowa ni egumi ogaddibwaga ohiya ovokedhiwa oJehena* ni manyalo awo aamenlene. 46* —— 47 Akala ninto nawo nnowukwakwathusa, ovenyihemo orahilele wolapela. Sapama ovolowa Mumweneni mwa Mulugu nninto nimodha ohiya ovokedhiwa oJhehena* ni mento awo aamenlene. 48 Wengo anamungu yahinakwiwa ni mootho wahinathimiwa.
49 “Mwaha aatene enere osaringiwa ni mootho. 50 Mwinnyu bwapama, mbwenye mwinnyuya wahidhivaga onere ddi wihina ohogolowele odhiva? Mukanne mwinnyu mwigumini mweenyu ni mukanne murenddele mmodha ni mukwaye.”