Aalebeliye Akudda 1 Korintiyu
10 Addibila, ginafuna munone wihina makolwihu aatene yaheedda vati va murabo teto aatene yahaabuwa niya, 2 aatene yahibaddiziwa mwa Moyizeji, wodhela murabo nniya, 3 aatene yahijha yoojha emodhave Mulugu aavahiliye 4 teto aatene yowang’wa manjhe mamodhave Mulugu aavahiliye. Mudhidhi waamutene yowang’wa manjhe yakuma vanibweni naahara, teto nibwe nno namutonyihedha Kiristu. 5 Naarive dhigaali ndo, owinjhiva waaliwa kiyamuhagalase Mulugu, bumwahaya edhe ekwege mwiddeddereni.*
6 Dhithu ndha dhotajhiha wa iyo, wihina nihifunege werana dhithu dhabure, ninga aliwa. 7 Kamwebedhege dhikwamuthu ninga amodha waaliwa yebedha dhikwamuthu; ndala ninga Dholebela dhinawogiwa dhegihina: “Athu yoojha, yong’wa ni yohagalala.” 8 Teto kanaweregena mararuwo* ninga amodha waaliwa yaweriwana mararuwo, enoopiwa athu owakwana 23 000 nlabo nimodha baahi. 9 Newene kanimwehe Yehova,* ninga amodha waaliwa yamwehile, vano enookwa mwaha wolumiwa nowa. 10 Teto kamukale athu owaaba ninga amodha waaliwa yaaliwa owaaba ni yafiyedhe opiwa nnamatolosa.* 11 Dhithu ndha dhapadduwele ninga dhotajhiha ni dhilebeliwe wihina dhinihudhihe iyo nnakala malabo ookuthula.
12 Mowindo, muthu yoole anubuwela wi ali owimelene, akale pasope wihina anaamore. 13 Dhoweha dhaatedhene dhinufwanyani dhinowafwanya athu aatene. Mbwenye Mulugu dororomeleya, ni kanuhiyeni wehiwa ni dhithu muhunandinyu ovilelana, mbwenye yadha yowehaya, oliye aneere wukaviherani wihina mwande ovilela.
14 Mowindala addibila oofuneya, muthawe webedha dhikwamuthu. 15 Ginawoga ni nyu ninga athu eenonelo; mutorihe yekinyu dhithu ndha giwogilimi. 16 Kopo ya mareeliho nnalobelelihu kinakosa epaddi ya nikame na Kiristu? Pawu nnagwaddanyihu kinakosa epaddi ya mwiili wa Kiristu? 17 Woona wi eliwo pawu modha, iyo, naarive niginjhivane nili mwiili mmodha, mwaha aatene nnagawana pawu modhave.
18 Kaasugweni amwaana Ezarayeli oomwiilini: Ale enadhowa waltareni epelekaga mukutho, kinajha dhithu dhimodhave dhinapelekiwa waltareni? 19 Vano ginafuna giwoge ddi? Wihina dhithu dhinapelekeliwa dhikwamuthu dhihikanna thima, obe dhikwamuthudha sinna thima? 20 Naari; mbwenye ethu ginafunimi owoga sowihina ndhe athu amalogo enakutheliwa mukutho dhikwamuthu, enaakuthela ademoniyu, omuhiya Mulugu. Miyo kaginafuna wihina mukale epaddi yaademoniyu. 21 Kamung’welege kopo ya Yehova* ni kopo yaademoniyu. Teto kamujhege “vameza va Yehova” ni vameza vaademoniyu. 22 Neragana ndo ‘kannamukuula Yehova’?* Nerege iyo nihikanna kopolo ompitha oliye?
23 Dhithu dhaatedhene dhinowenyiwa,* mbwenye kahi wihina dhaatedhene dhinonikavihera. Dhithu dhaatedhene dhinowenyiwa, mbwenye kahi wihina dhaatedhene dhinolibiha. 24 Kadda muthu kasayelege opama waye baahi, mbwenye asayelege opama waathu amodha.
25 Mujhege nyama dhaatedhene dhinagulihiwa vamerkadu, muhaweragana makoho mwaha wa mubuwelo weenyu, 26 mwaha “elabo ni dhithu dhaatedhene dhilimo sa Yehova.”* 27 Muthu ahili mukiristawu uwithanani wihina mwajhe vamodha, teto nyu mwarumedha oyawo, mujhe dhithu dhaatedhene anuvahiyeni, kinahoweleya omukoha mwaha mubuwelo weenyu. 28 Mbwenye oliye uwaaddelani egihina: “Nyama ela ehikutheliwa mukutho,” kamujhe, mwaha oliye ohuwaddelani teto mwaha mubuwelo weenyu. 29 Kaginaagana mubuwelo weenyu, mbwenye mubuwelo waathu amodha. Ofuru ginnimina wowerana ethu-siithu onaatorihiwele ddi ni mubuwelo waathu amodha? 30 Akala miyo ginowerana nlobelo gaafunaga ojha, yeere okala yapama odidela ojha wula athu amodha egitorihaga?
31 Bumwahaya, akala munoojha, akala munong’wa, obe akala munerana ethu sithu, mweregena dhaatedhene wi mmuthithimihe Mulugu. 32 Kamukale nibwe nookwakwathusa wa maJudewu, wa aGerego newene wa mulogo wa Mulugu, 33 mowindala ninga miyo ginaxiximi wahagalasa athu aatene mwa dhithu dhaatedhene, kaginasayela dhofuna dhaaga baahi mbwenye dhaathu owinjhiva wihina evuluwe.