Ovuhulela wa Juwawu

2 “Wa mungero a mulogo woEfezu olebe wegihina: Anawoga dhithu ndha duule aparenle thendderi 7 nlada na moono woojha ni aneedda vaari va panti 7 dha woru: 2 ‘Gihinona dhowera dhawo, mabasa awo ooviheya ni ovilela wawo, gihinona wihina kunaadumera athu abure ni uhaweeha ale enihina nili arumiwi wula ehili, ni uhawoona wihina aliwa aliba woota. 3 We onna woniha ovilela wawo ni uhawanana makathamiho owinjhiva wahigomile mwaha wa ndina naaga. 4 Mbwenye gihoona ethu ginafunimi wusumululana: We ohuhiya odhivela wanniwena omambelelo.

5 “‘Mowindala, wubuwele dila ngasi omothiliwe, bumwahaya othwaruwe ni weregena dhithu weresiwena omambelelo. Waahithwaruwa, ginere odha wihina givenyihevo panti yawo mburo viliwa. 6 Mbwenye ehikalawo ethu oneriwena pama: we onowidda dhithu dhinerana nikuuru na Nikolawu teto nimiyoya ginowidda dhithu ndho. 7 Ole anna mabaru owiiwa avuruwane ele muzimu onawogiwa ni mulogo wegihina: Muthu yoole anaagonjhihe, ginere omurumedha wihina ajhe dhowiima dha muthanko onavaha egumi yoyo oli mparayizu a Mulugu.’

8 “Wa mungero a mulogo woEsmirna olebe wegihina: Dhithu ndha anawoga duule ali ‘Oobajha ni Oogomihedha’ yoole aakwile vano anoohogolowela okalawo: 9 ‘Gihanona makathamiho ni ohawa wawo, mbwenye we ohureela. Ohiya eyo, gihinona wihina vaari vawo ehikalavo athu enaruwana dhithu dhootaleleya yegihina nili maJudewu wula ehili: mbwenye aliwa sinagoga ya Saddana. 10 Kuwoove mwaha wa makathamiho enafuna wufwanya osogolo. Ddiyabo anerege wuvokedhani mukambura* wihina mwehiwe, ni munere woona goyi muwari mwa malabo kumi. Okale oororomeleya ofiyedha okwa wawo, miyo ginere wuvaha kara ya egumi. 11 Ole anna mabaru owiiwa avuruwane ele muzimu onawogiwa ni mulogo wegihina: Muthu yoole anaagonjhihe, kanadha alawiha okwa wanabiili.’

12 “Wa mungero a mulogo wo Pergamu olebe wegihina: Dhithu ndha anawoga duule anna supaadda nolapa ni nowirwa dhipaddi dhaabilidhene: 13 ‘Gihinona mburo onakaliwe obe geere, vili mpaddo wa onamathonga wa Saddana. Naarive dhigaali ndo we ohudidelave opareela pamadhene ndina naaga ni kuhiyile ogiroromela newene malabo yaale a namoona aaga oororomeleya Antipa, apiwe luwani yeenyu eli mburo Saddana anakaliiye.

14 “‘Mbwenye gihoona dhithu ginafunimi wusumululana: vikalelinyu ehikalawo athu enahara dhohudhiha dha Balawu aamuhudhihile Balaki opweha nibwe nookwakwathusa osogolo wa amwaana Ezarayeli, wihina ejhege dhithu dhinakutheliwa mukutho dhikwamuthu dhoosema ni yaweregena mararuwo.* 15 Ohiya eyo, vaari vawo vihikala nikuru nnahara dhohudhiha dha Nikolawu. 16 Bumwahaya othwaruwe. Waahithwaruwa gineere odha vohilegela wihina giwane naaliwa ni supaadda nolapa nnakuma omulomoni waaga.

17 “‘Ole anna mabaru owiiwa avuruwane ele muzimu onawogiwa ni mulogo wegihina: Muthu yoole anaagonjhihe, gineere onvaha mana ooviteya ni ginere onvaha nibwe ning’ono nootxena, teto muwari mwa nibwe nno muhulebiwa ndina nixa nihinoniwe ni muthu mmodha, ahili muthu yoole anaakela.’

18 “Wa mungero a mulogo woTiyatira olebe wegihina: Dhithu ndha anawoga di Mwaana a Mulugu yoyo mento aye enahidda ninga nlumi na mootho ni manyalo aye enakala ninga muthove* wathima wosiwaga veeko: 19 ‘Gihinona dhowera dhawo, odhivela wawo, nroromelo nawo, mabasa awo onampareliwe Mulugu ni ovilela wawo, ohiya eyo, gihinona wihina mabasa onaapariwe ovanene ehithabwa winjhiva wakwaranya ale waaparesiwe omambelelo.

20 “‘Mbwenye gihoona ethu ginafunimi wusumululana: we onomudumera muhiyana ole Jezabel aniwoona ninga namavuhulela, anaahudhiha ni anaaholosa adhaari aaga, aathukulelaga wawerana mararuwo* ni ojha dhithu dhikutheliwe mukutho dhikwamuthu dhoosema. 21 Miyo gihinvaha mudhidhi wihina athwaruwe, mbwenye oliye kanafuna ohiya mweeddelo waye wa mararuwo.* 22 Mowindala, gihanle vang’ono wihina ginvokedhe oredda ahinandegiye ovenyana vakamani, teto athu yaale enararuwa nuliye, ginere watotela makathamiho manlubale, yahithwaruwa dhithu eneriwana nuliye. 23 Teto gineere waapa anaayeya ni mulili wowopiha, ofiyedha mulogo dhaatedhene onona wihina miyo gili ole anapendda mubuwelo* ni murima, ni gineere omuhogolosela kadda muthu dhowera dhaaye.

24 “‘Mowindala, ginawaddela aatene ehanle oTiyatira, aatene yaale ehinahara dhohudhiha ndha, yaale ehifiyedhile onona dhithu ndha dhinithaniwa “dhithu dhooddiha dha Saddana” wihina: Kaginunyemeliheni mutholo mmodha. 25 Mowindala, mulibihedhe yeele munninyuna ofiyedha miyo odha. 26 Teto muthu yoole anaagonjhihe ni anaaweddelege mabasa aaga ofiyedha omakuthulo, gineere onvaha owedha wihina aathongege athu amalogo, 27 oliye anerege wakukula ni mukogodho* wa mujhila wonamathonga, ofiyedha aliwa opwesiwa ninga biya ya mathaka, mowindala ninga gaakenlimi owedha ni Ababa. 28 Miyo ginere onvaha nikorotxa.* 29 Ole anna mabaru owiiwa avuruwane ele muzimu onawogiwa ni mulogo.’