Karta Nanabili Aamulebeliye Timotiyu
1 Miyo Pawulo murumiwi a Kiristu Yesu wodhela efunelo ya Mulugu mowiwanana ni mpaganyo wegumi onadha mwaha wa Kiristu Yesu, 2 ginulebela we Timotiyu mwanaga ginudhivelimi wihina:
Opama wohinifwanelela, thagaraga ni murenddele wa Mulugu Baabi ni wa Nabwiya ehu Kiristu Yesu, okale ni we.
3 Ginomutamalela Mulugu yoyo ginamparelimi mabasa ootaleleya ninga makolo aaga, mubuwelo ohuginyemelaga teto mutana ni mahiyu kaginudduwala gaalobelaga nuubebedha. 4 Guubuwela mutori dhawo, ginokanna munukwela wowuwoona wihina gidhaleliwe ohagalala. 5 Mwaha ginowubuwela nroromelo naawo nihinna ogwalagwambi, nroromelo naanna avwawo Loyidi ni ammawo Ewunisi, teto gihikanna ebaribari wihina thi nroromelo nimodhave onniwena.
6 Bumwahaya, ginafuna guwubusedhe wihina otetedhegeve ninga mootho gari eyo wakenliwe ni Mulugu wodhela nlada naaga guutapulelimi. 7 Mwaha Mulugu kanivahile muzimu wowoova, mbwenye anivahile muzimu wa kopolo, wodhivela ni wa thotho. 8 Mowindala, kukanne manyazo ovaha onamoona wodhela Nabwiya newene wodhela miyo gimagiwe mwaha waye; mbwenye ororomele kopolo dha Mulugu, ovilelagana goyi onooniwe mwaha olaleya muthenga dhapama. 9 Oliye ohunivulusa, anithanaga wihina nikale athu oweela, ohiya mwaha wa mabasa nnaaparihu, mbwenye mwaha wa efunelo yaye ni opama waye wohinifwanelela. Oliye ubuwenle kale onooniha opama oyo ninnihuna, wodhela Kiristu Yesu, 10 mbwenye vano onoowoneya pamadhene mwaha woneyihiwa Nvulusi ehu Kiristu Yesu. Oliye ohumariha okwa teto wodhela muthenga dhapama, oliye odhana waara winamoneya egumi ehinarimeela. 11 Wodhela muthenga ndho, gihithomiwa wihina gikale namalaleya, murumiwi ni namahudhiha.
12 Bumwahaya ni miyoya ginofwanyiwa makathamiho ayo, mbwenye kaginakanna manyazo. Mwaha gihimunona Ole ginamurumedhimi teto ginororomela wihina aneere osamalela dhithu gimuhiyedhimi mmadani mwaye ofiyedha labo nenno. 13 Waparele ni murima waatene madhu apama wawiwaliwe ni miyo, ni nroromelo vamodha nuudhivela winuthukulele okala mwimodhani ni Kiristu Yesu. 14 Dhoreela ndho dhathima ohiyedhiwiwe, okoye okaviheriwaga ni muzimu wotxena yoyo oli ni iyo.
15 We ohunona wihina athu aatene a luwani yoAziya ehigithawa, amodha wa aliwa di Fijelu ni Ermojene. 16 Nabwiya eeddele thagaraga emudhi ya Oneziforo, mwaha oliye oogihagalasa dila dhowinjhivadhene teto kaanna manyazo mwaha miyo okala mukambura. 17 Ohiya eyo, ngaali oRoma oliye ogisayela pamadhene ofiyedha ogifwanya. 18 Nabwiya Yehova* amweeddele thagaraga labo nenno.* Teto we, uhanona pamadhene munya mabasa baani oliye aapariliye wEfezu.