Karta Nanabili Aamulebeliye Timotiyu
2 Mowindo mwanaga, odidele omuloba Mulugu wihina uvahe kopolo wodhela opama wohinifwanelela Kiristu Yesu anoonihiye; 2 ni wodhela dhithu guwaddenlimi ni dhivahiwe onamoona naathu owinjhiva, teto wahudhihe dhithu dhendho alobwana oororomeleya wihina naaliwaya yandege wahudhiha athu amodha. 3 Ninga munyakoddo apama a Kiristu Yesu, ovilelegena goyi. 4 Munyakoddo anafuna omuhagalasa ole amulebenle wihina akale munyakoddo, kanawerana malondda ammawani. 5 Enowereya emodhave vamathamagelo, kawo anamwakela padamari wula ahithamagile mowiwanana ni malamuloya. 6 Namalima analaba nuuviheya dinakala oobajha omujha namulibu* a dhowima dhaye. 7 Mudhidhi waatene wubuwelege dhithu dhendha ginuuwaaddelimi; Nabwiya aneere wuvaha enonelo mwa dhithu dhaatedhene.
8 Kudduwale wihina Yesu Kiristu ohuvenyihiwa muukwani teto aali a nihimo na Davidi,* mowiwanana ni muthenga wapama ginalaleyimi; 9 mwaha wa muthenga ola, ginowoona goyi ni gihimagiwa ninga mpanga. Mbwenye madhu a Mulugu kimagiwe. 10 Bumwahaya gihididela ovilelana dhithu dhaatedhene mwaha waale esakuliwe ni Mulugu, wihina naaliwaya efiyedhe ovuluwa mwaha okala mwimodhani ni Kiristu Yesu ni yaakele nthithimiho namukalakala. 11 Madhu ala beebaribari: Akala nihikwa vamodha nuliye, mwebaribarene nnere okanna egumi vamodha nuliye; 12 nadidelave ovilela, nihiyoya nnere othonga vamodha nuliye; mbwenye namukoodda nuliyeya aneere onikoodda; 13 teto nakala athu oohuroromeleya, Mulugu aneere okalave oororomeleya, mwaha Oliye kadha iikoodda.
14 Odidele wawubusedha dhithu ndha mudhidhi waatene, waahudhihaga vamentoni va Mulugu wihina yahakanganelege madhu, dhithu dhahinna mpurelo, mwaha kadhinaakavihera ale enavuruwana. 15 Werena dhaatedhene onandiwe wihina orumedhiwe vamentoni va Mulugu, ninga namalaba ahinna ethu yaamuthukulihe manyazo, ni ananda walabihedha pamadhene madhu eebaribari. 16 Mbwenye orabele muselu dhihinna mabasa dhihiniwanana ni dhithu dhoweela, mwaha muselu ndho dhinodhana mubuwelo wabure, 17 teto muselu ndho dhinomwadheya ninga eviddi.* Eminewu ni Filetu naaliwaya enodhiveliwa owoga muselu ndho. 18 Alobwana ayo ehisukuma ebaribari, ewogaga wi ovenyihiwa waanookwa wihereya, teto enna ononga nroromelo naathu amodha. 19 Naarive dhigaali ndo, alisersi a Mulugu damukalakala ni ohulebiwa madhu enihina: “Yehova* ohaanona ale eli epaddi yaye” teto “Muthu yoole anithana ndina na Yehova anokoodda obure.”
20 Nyumba enlubale, mbamwa kamwinakala dhoobove dha woru ni dha parata baahi, mbwenye dhinokalamo dha tabwa ni dhoologo. Dhoobo dhimodha dhinapariwana mabasa athima, mbwenye dhimodha mabasa yahinna thima. 21 Mowindala, muthu yoole anakala woolapela ni dhoobo ndha dhogomihedha, aneere okala yoobo enaapariwegena mabasa athima, yotxenihiwa, enaamukaviherege mwinnyaya, yegeredhiwe wihina epariwena mabasa aatene apama. 22 Bumwahaya, orabele munigwa dheezombwe, mbwenye odidele weedda nuwogowa, ni nroromelo, nuudhivela, ni murenddele, vamodha naathu enamwebedha Nabwiya ni murima woweela.
23 Ohiya eyo, orabele wakiratela makoho ootaduwa ni yahinna mabasa, mwaha we ohunona wi enotatamula okangana. 24 Mudhaari a Nabwiya kanahowela okangana, mbwenye akanne makalelo apama oowoga ni athu aatene, oofwanelela ohudhiha, ni oonona wiisugwera oonihiwaga goyi, 25 ni aahudhihe nupwaseya ale ehinafuna ovuruwana. Mwaha podi wera Mulugu aneere osaddula* murima wewa wihina ekanne enonelo yapama yeebaribari; 26 ni makalelo yaala, enere othwaruwa ni enere woobowa mmurakoni mwa Ddiyabo, mwaha oliye ohumala waahidda* wihina yeregena efunelo yaye.