Ovuhulela wa Juwawu
4 Nuwindo, miyo woona musiwo wofuguwene odhulu ni wiwa ndhu noobajha, nakala ninga oruma wa palaza, wambela owoga ni miyo negihina: “Kagwela wuno, miyo ginere wuwoniha dhithu dhinafuna wereya.” 2 Numala, muzimu wotxena ogikitela, vano miyo woona mpaddo woomwene odhulu, vampaddoniva vigakiratile muthu. 3 Ole aakiratile vampaddoni voomwene vale, akala ninga mabwe a Jaspe ni a Sardiyu,* teto mpaddo ole woomwene wahapeliwa ni muzirilimbo wakala ninga Esmeralda.*
4 Ohiya eyo, mpaddo ole womwene wahapeliwa ni mpaddo 24 dhoomwene, teto miyo wawoona anamaholela 24 egakiratile kadda muthu vampaddoni vaye, egawanre malaya ootxena ni egawanre kara dha woru mmuruni mwewa. 5 Vampaddoni vale voomwene voojerima, vookuma madhu ni dari. Teto mpaddo ole wahapeeliwa ni malampada 7 ohiddeene a mootho enatapulela muzimu 7 dha Mulugu. 6 Osogolo wa mpaddo ole woOmwene, yahikalawo ethu yaligana nniya ya viduru ninga kristale.
Vaari va mpaddo ole woomwene ni mmabalomwa, mwahikala akerubi 4 yanna mento owinjhiva yanda woona osogolo ni munddulimwa. 7 Mungero oobajha, koveya yakala ninga ya poddogoma, mungero anabiili, koveya yakala ninga ya ng’ombe yeelobwana, mungero anatharu, koveya yakala ninga ya muthu, mungero anennayi, koveya yakala ninga ya pangwe anavava. 8 Angero aatene yaala, kadda mungero ahikanna mampelo 6, teto mampeloya yahikanna mento owinjhiva ode ni muwarimwa. Mbwenye mudhidhi waatene, mutana ni mahiyuva, yowoga yegihina: “Oweela, oweela, oweela di nyu Yehova,* Akopolo dhaatedhene, aali, ali, ni anadhawo.”
9 Mudhidhi waatene angero ala yamuthithimihaga, yanvuwihaga ni yaamutamalelaga Ole akiratile vampaddoni voomwene, Ole anakalawo ni mukalakala, 10 anamaholela 24 enokokora vamentoni va Ole akiratile vampaddoni voomwene ni enomwebedha Ole anakalawo ni mukalakala evokedhaga kara dhewa osogolo wa mpaddo woomwene yegihina: 11 “Yehova,* Mulugu ehu, nyu difwanelele wakela nthithimiho, orihiwa ni kopolo, mwaha muhupaddusa dhithu dhaatedhene teto dhithu ndha, dhihikalawo ni dhihipaddusiwa wodhela efunelo yenyu.”