Alebeliye Akudda Romanu
14 Mmwakele muthu akwerebeye munroromeloni, newene kammutorihe akala mubuwelo anniyena ohuhiyana ni weenyu. 2 Muthu anna nroromelo onoojha dhithu dhaatedhene, mbwenye muthu ahinna nroromelo nooliba anaajha matabave baahi. 3 Ole anajha kanamunyemula ole ahinajha, teto ole ahinajha kanamutoriha ole anajha, mwaha Mulugu dimwakenle. 4 We oli aani ofiyedha omutoriha mudhaari ahili awo? Akala ethu aneriyena sapama obe sabure nabwiye dinna ofuru womutoriha. Mwebaribarene woona wi Yehova* podi omukavihera, oliye aneere okala owimelene vamentoni vaye.
5 Muthu podi woonaga labo nimodha okala nathima wakwaranya malabo mamodha, mbwenye muthu mmodhaya, wawonaga malabo aamatene wihina enoligana; bumwahaya, kadda muthu arumedhege yeyo anuubuweliye. 6 Ole anoona labo nimodha okala nathima wakwaranya malabo mamodha, eregena eyo wihina amuthithimihe Yehova.* Teto, ole anajha dhithu dhaatedhene, eregena wihina amuthithimihe Yehova,* mwaha onomutamalela Mulugu; ole anaajha mataba baahi, eregena wihina amuthithimihe Yehova,* mwaha nuliyeya onomutamalela Mulugu. 7 Mwebaribarene, kawo muthu aniikalelawo yeka, teto kawo muthu aniikwela yeka. 8 Akala nnokalawo, nnamukalelawo Yehova;* akala nnokwa, nnamukwela Yehova. Bumwahaya naarive nikalewo obe nikwe, nili a Yehova.* 9 Mwaha wa yeyo, Kiristu ohukwa ni ohuhogolowela okalawo; wihina akale Nabwiya aanokwa ni aathu ookalawo.
10 Mbwenye mwahaya bwaddi ogamutoriha ddibilo? Kiwe, onamunyemulela ddi ddibilo? Mwaha iyo aatene nnere otorihiwa vamentoni va Mulugu. 11 Mowindala ninga dholebela dhinawogiwa dhegihina: “‘Ginoolibela vamentoni vaaga,’ anawoga di miyo Yehova,* ‘athu aatene enere okokora vamentoni vaaga, teto athu aatene enere owoga vathaddovene wihina miyo gili Mulugu.’” 12 Bumwahaya, kadda muthu wa iyo aneere wakulela vamentoni va Mulugu.
13 Mowindo, muselele otorihana mmodha ni mukwaye, ohiya eyo murabele opweha nibwe nookwakwathusa obe ethu emodheene yaafiyedhe omukwakwathusa ddibila. 14 (Gihikanna ebaribari wihina vamentoni va Nabwiya Yesu, kawo ethu yokwakwathusa; mbwenye ethu enakala yonyakavala vamentoni vamuthu yoole anoona ninga sonyakavala.) 15 Bumwahaya, akala ddibilo onotakaleliwa mwaha wa yoojha onajhiwe, onone wihina kunna odhivela nuliye. Kunonge* nroromelo naye, woona wi Kiristu ohukwa mwaha waye. 16 Kamwenye owogiwa obure dhithu dhapama munerinyuna. 17 Enamuthukulele muthu ovolowa Mumweneni mwa Mulugu, kahiyo ojha newene ong’wa, mbwenye enahoweleya fuukala muthu owogowa, amurenddele ni ohagalala onadha mwaha wa muzimu wotxena. 18 Bumwahaya muthu anamparela mabasa Kiristu ni makalelo yaala ninga mudhaari, onomuhagalasa Mulugu ni onorumedhiwa vamentoni vaathu.
19 Mowindala, niilibihedhe werana dhithu dhinadhana murenddele ni dhithu dhinanithukulela olibihana mmodha ni mukwaye. 20 Muhiye wanonga mabasa a Mulugu mwaha wa yoojha. Ebaribari wihina dhithu dhaatedhene soweela, mbwenye sabure ojha yoojha, akala enomukwakwathusa muthu mmodha. 21 Sapama ohijha nyama, newene ohumung’wa vinyu, newene werana ethu enaamukwakwathuse ddibilo. 22 Olibihedhe nroromelo onniwena vamentoni va Mulugu. Oohagalala di muthu yoole ahinitoriha mwaha wa ndhe anarumeedhiye. 23 Mbwenye akala muthu onoojha wula aanganyedhaga, ohutorihiwa, mwaha anajha ahinna nroromelo. Woona wi dhithu dhaatedhene dhihiniwanana ni nroromelo, yoothega.