Dhilebiwe ni Lukaji
5 Labo dhaala Yesu aali sere-sere ya nthiya nooJenezare,* vano muthithi waathu walivo, wompinyaminya wihina wavuruwane madhu a Mulugu. 2 Oliye woona mwanddeya minddi, dhigimesiwe sere-sere yanthiya nenne, mbwenye anamatotaya yahabuwela kobela emodha wasuwaga mathavi. 3 Nuugwela mwanddeya mmodha waali wa Simawu, omuloba wihina asusihedhe vang’ono mmanjheni. Vano oliye okarati mmwanddeyani mune ni wambela ohudhiha muthithi ole waathu. 4 Nuumala owoga, oliye omuloba Simawu egihina: “Kadhowa vooddiha, ni kaavoke mathavi awo wihina nitote oba.” 5 Simawu omwakula egihina: “Namahudhiha, emahiyu yaatene naali mwemuna nitotaga mbwenye kaniddoddilemo ethu, woona wihina di nyu munawoga ginere wavoka.” 6 Vano aliwa nuwavoka, ohidda oba dhowinjhiva ofiyedha mathaviwa wambela otaala. 7 Nuwindo, aliwa wawithana akwiwa yaali mwanddeya mmodhaya wihina edhe yakavihere; aliwa odha, odhaliha mwanddeya dhaminlidhene mwaha wa yeyo mwanddeyadha wambela oddadda.* 8 Nuwoona ndo, Simawu Peduru okokora vamentoni va Yesu ni owoga egihina: “Nabwiya, kamugaddamele mwaha miyo gili muthu oothega.” 9 Mowindo, oliye vamodha naale yaali nuliye otikina vanlubale mwaha wa oba dhowinjhiva yapanriwa, 10 emodhave yahimpadduwela Tiyago ni Juwawu amwaana Zebedewu yaali akwaye Simawu mbwenye Yesu omwaddela Simawu egihina: “Kuwoove. Okuma peeno odhowa osogolo onaavedege athu.” 11 Vano aliwa owetela mwanddeya dhewa ode ohiya dhaatedhene omuharaga.
12 Labo nimodha agaali sidadi dhaala ofiya muliba maranya. Vano numoona Yesu okokora vamentoni vaye ni omuloba egihina: “Nabwiya, akala munoofuna, givulumuseni.” 13 Nuwindo, Yesu otapula nlada naye, omparela mulobwana ole, owoga egihina: “Miyo ginofuna! Vulumuwa.” Vohilegela maranya ale orimela. 14 Numala, Yesu omwaddela egihina onaamwaddele muthu: “Mbwenye odhowe wagumane nnamakutha, ovelele nvaho wodhela ovulumusiwa wawo mowiwanana ni Malamulo a Moyizeji wihina aliwa ekanne onamoona.” 15 Mbwenye matikiniho aamatene aweriyena ovuwa mowaguva, muthithi watene otugumana wihina envuruwane ni evulumusiwe dhiredda dhewa. 16 Teto dila dhowinjhivadhene oliye owaaja mburo womaleya mwiddeddereni wihina alobele.
17 Labo nimodha Yesu aahudhihaga Afarizewu, anamahudhiha a Nlamulo, murudda dhaatedhene dhoGalileya, dhooJudeya ni dhooJeruzale yakiratile vevale, vano kopolo dha Yehova* dhaali ni Yesu wihina aavulumuse athu. 18 Vano alobwana dhaala onfiyana mulobwana ooragala vamaakani, aliwa yowaaja makalelo wihina emuthukulele mburo vaali Yesu. 19 Woona wihina muthithi waathu wahithabwa winjhiva, kayawoona makalelo oomuthukulela mba, vano aliwa ogwela vadhulu va nyumba omukitihela venvo agaali vamaakani vaye, vaari vaathu yamwapele Yesu. 20 Nuwoona nroromelo yanniwana, Yesu owoga egihina: “Mulobwana, dhoothega dhawo dhihimala oleveleliwa.” 21 Vano anamaleba ni Afarizewu wambela onong’ona vikaleliwa yegihina: “Olaya baani anaruwana dhithu dhotaleleya? Baani analevelela dhoothega ahili Mulugu baahi? 22 Mbwenye Yesu onona yubuweliwa ni wawakula egihina: “Munubuwela ddi mmurimani mweenyu?” 23 Enakweya owoga ddi: ‘Owoga wihina dhoothega dhawo dhihileveleliwa,’ obe wera ‘Kavenya weeddege’? 24 Vano wihina munone wi Mwaana Muthu ohukanna kopolo yolevelela dhoothega mwilaboni yavati . . .”, oliye owoga ni muliba oragala ole egihina: “Miyo ginowuwaddela: Kavenya, wathukule maakaawo odhowege vaade vawo.” 25 Nuwindo, oliye wathukula maakaye vakinantihiwiye odhowaga vaade vaye wula amuthithimihaga Mulugu. 26 Mwaha wa yeyo, aatene otikina ni wambela omuthithimiha Mulugu teto odhaaleliwa woova yegihina: “Peeno nihoona dhithu dhotikiniha!”
27 Voharela, Yesu omoona mulobwana dhaala ithaniwa Levi, agakaratile akukusaga musoko ni owoga nuliye egihina: “Okale namahara aaga.” 28 Nuwindo, Levi ohiya dhaatedhene, ovenya omuharaga. 29 Vano Levi wawegeredha mathanga* wihina amwakelena Yesu vaade vaye, ni wahikalavo muthithi waanamakukusa musoko ni athu amodhaya, yajha* vamodha naaliwa. 30 Mwaha wa yeyo, Afarizewu ni anamaleba wambela wakoha anamahara a Yesu yegihina: “Mwahaya bwaddi mugajha ni mugang’wa ni anamakukusa musoko ni aliba ootheega?” 31 Yesu wawakula egihina: “Athu eli agumi kinamuhoowela mediku, mbwenye aredda binamuhoowela. 32 Miyo kagidhele wawithana athu owogowa wihina ethwaruwe mbwenye athu oothega.”
33 Aliwa omwaddela yegihina: “Anamahara a Juwawu enoothuga malabwene ni enolobela teto ethu emodhave enerana Afarizewu mbwenye anamahara awo enojha ni enong’wa.” 34 Yesu wakoha egihina: “Nyu munowathugiha akwaye namatela wula egaali vamodha nnamatelaya? 35 Mbwenye enere ofiya malabo namatela ole ahinakaliye vamodha naakwaye, malabo yaayo enere othuga.”
36 Nuwindo wawaddela yoladdaniha egihina: “Kaavo muthu anagwadda esaala exa otxapelana guwo yoodduwa. Yereya ndo esaala exa enere otaala teto kinaafwanelelege ni guwo yoodduwa. 37 Emodhave, kinenyeya omuthukula vinyu muxa omweeka thumba noodduwa. Yereya ndo, thumbana nnootaala vano vinyuya ni thumbana nnere oyeleleya. 38 Mbwenye anathukuliwa vinyu muxa weekiwa thumba nixa. 39 Teto kaavo anamung’wa vinyu akale, obe muxa, nuwindo owoga egihina: ‘Akale yola dinadhiva.’”