Dhilebiwe ni Lukaji
15 Anamakukusa musoko aatene ni anamathegaya yodha vaali Yesu wihina envuruwane. 2 Afarizewu ni anamalebaya yomwaaba vikaleliwa yegihina: “Mulobwana ola anodhiveliwa okarati ni anamathega ni onoojha naaliwa.” 3 Nuwindo, oliye wawaddela yoladdaniha egihina: 4 “Baani wa nyu anakanna mambila 100 vano nimodha nnorimela, kanaahiya 99 mwiddeddereni vano anodhowa osayela nne nirimele?” 5 Vano oliye afwanya, anookapatha ni anohagalala. 6 Ndo oliye afiya vaade vaye anowawithana akwaye ni amwanddamanaaye ni anowawaddela egihina: ‘Muhagalale ni miyo, mwaha nimbila naaga nne narimele gihifwanya.’ 7 Miyo ginowuwaddelani gegi, ni makalelo mamodhave odhulu winere okala ohagalala mwaha muthu mmodha ootheega othwaruwa, ohiya athu 99 owoogowa ehinahowela othwaruwa.
8 “Obe muhiyana baani anakanna korowa kumi dha darakima,* enorimelavo modha kanahiddiha panti axela mba mwaaye mwatemwene ni asayelamo pamadhene ofiyedha ofwanya? 9 Vano afwanya anowawithana akwaye ni amwanddamanaaye ni anowawaddela egihina: ‘Muhagalale ni miyo, mwaha gihifwanya korowaga ele ya darakima* yagirimenle.’ 10 Miyo ginowuwaddelani gegi, ni makalelo mamodhave angero a Mulugu enere ohagalala mwaha muthu mmodha oothega othwaruwa.”
11 Nuwindo, Yesu owoga egihina: “Mulobwana dhaala aanna ahima abiili. 12 Vano amung’onoya owoga naababe egihina: ‘Babani givaheni dhoreela dhaaga.’ Vano oliye wagawela kadda muthu dhaye. 13 Nuuvira mwanamalabo, mwaana amung’noya othukula dhoreela dhaye ni odhowa elabo yolapela. Nuufiya wule, oliye ononga dhoreela dhaye dhaatedhene mwaha wothukula mweeddelo wabure.* 14 Numala ononga dhaatedhene okumelela* dala elabo yeele yaatene, vano oliye wambela woona goyi. 15 Oliye osayela ganyo vano ofwanya vaade va mwanamurala eelabo yeele, oliye omuruma omundda waye wihina ajhihege guluwe dhaye. 16 Vano oliye omukalelaga murogo alfaroba, dhoojha dha guluwe, mbwenye newene kaavahiwa ethu.
17 “Vano nusuweya musolo, oliye owoga egihina: ‘Anamalaba aababa vano enna ojha ni enna orubala, wula miyo gikwaga dala!’ 18 Gineerege odhowa vaade vaababa gaalobe gegihina: “Babani, gihimutheegela Mulugu oodhulu ni gihuthegelani. 19 Kaginafwanelela okala mwaninyu. Mugoonege ninga mudhaari enyu.”’ 20 Oliye omaruwa odhowa ogumana naababe. Agaali wolapelawene, ababe omoona ni omweddela thagaraga. Aliwa omuthamagela, omukubarela ni ombejari. 21 Vano mwaana ole owoga naababe wera: ‘Babani, gihimutheegela Mulugu oodhulu ni gihuthegelani. Kaginafwanelela okala mwaninyu.’ 22 Vano ababe owoga ni adhariwa yegihina: ‘Kaaguvani! Kaadhenani malaya oolapa athimaya, mmuwarihe, mwamala mmudhena aneli ni sandaliya mmuwarihe. 23 Mwindo, mudhena mwaana ng’ombe yooruva mupe, nnafuna nimujhele mathanga, 24 mwaha mwanaga ola ahikwa vano ohuhogolowela okalawo, ahirimela vano ohukumelela.’ Nuwindo mathanga wambela ojhiwa.
25 “Mwaana apogoya aali omundda, vano ahogolowelaga vaade ni aajaga ofiya, wambela wiwa jhibo wula athu yinaga. 26 Nuwindo, oliye omwithana mudhaari mmodha ni omukoha ethu yapadduwa. 27 Oliye omwaddela egihina: ‘Ddibilo didhiile, vano ababo ompela mwana ng’ombe yooruva mwaha wohogolowa agaali mugumi.’* 28 Mwaha wa yeyo oliye otakaleliwa vanlubale ni okoodda ovolowa. Mbwenye ababe okuma ni ombebedha wihina avolowe. 29 Oliye wawakula ababe egihina: ‘Gihulabelani yaka dhowinjhivadhene ninga mudhaari ni kaginaalupege malamulo enyu. Naarive dhigaali ndo, kamunagipelege newene mbuzi modha wihina gaajhe mathanga nakwaaga. 30 Mbwenye nuufiya mwaninyu ola anoongile dhoreela dhenyu dhaatedhene naanyabi, nyu ompela mwana ng’ombe yooruva.’ 31 Ababe omwakula yegihina: ‘We wakala vevala ni miyo malabo aamatene teto dhithu dhaatedhene ginnimina saawo. 32 Mbwenye iyo nnawerana mathanga ala wihina nihagalale baahi, mwaha ddibilo ola ahikwa vano ohuhogolowela okalawo, ahirimela vano ohukumelela.’”