Dhilebiwe ni Juwawu
15 “Miyo gili nvidera webaribari, Ababa bili anamalimaya. 2 Aliwa enogwadda murasi* onadha wa miyo ohunavaha dhowima ni enokasela murasi onavaha dhowima wihina ovahegeve dhowima dhimodha. 3 Nyu muhumala otxena* mwaha wa madhu guwaddenlimini. 4 Mukale mwimodhani ni miyo vano miyo ginere okalave mwimodhani ni nyu. Mowindo, ninga murasi ohunandiwa ovaha yowima yekiwavo wahili muthanko mmodhave wa nvidera, ni nyuwa mwahikala mwimodhani ni miyo kamunande ovaha dhowima. 5 Miyo gili nvidera; nyu muli murasidha. Anaakaleve mwimodhani ni miyo, teto miyo mwimodhani nuliye, muthu yoyo onovaha dhowima dhowinjhiva, mwaha nyu mwahikala mwimodhani ni miyo kamunande werana ethu. 6 Muthu ahikala mwimodhani ni miyo, onovokedhiwa ode ninga murasi ni onowumma. Murasi ndho dhamala dhinowugeliwa, opahiwa. 7 Mwakala mwimodhani ni miyo teto madhu aaga yakalave ni nyu, mwaloba ethu-siithu munafuninyu munere ovahiwa. 8 Ela enowathithimiha Ababa: bumwahaya, mudidele ovaha dhowima dhowinjhiva ni monihe wihina muli anamahara aaga. 9 Mowindala, ninga Ababa enagidhiveliwa, miyo ginowudhivelani; muhuselele odhivela waaga. 10 Nyu mwawiwelela malamulo aaga, kamunaselele odhivela waaga, mowindala ninga miyo ginawiwelelimi malamulo aAbaba kaginaselela odhivela wewa.
11 “Miyo gihuwaddelani dhithu ndha wihina mukanne ohagalala wimodhave ninga waaga, vano mukanne ohagalala winlubale. 12 Nna thi nlamulo naaga: Mudhivelanege mmodha ni mukwaye, ninga miyo guudhivelimini. 13 Kaawo muthu anna odhivela webaribari ahili ole anavaha egumi* yaye wihina awobole akwaye. 14 Nyu munere okala akwaaga, mwerana ele ginuurumimini. 15 Vano, kaginuwithanani adhaari, mwaha mudhaari kanonile dhithu anerena nabwiye. Mbwenye ginuwithanani akwaaga, mwaha gihuwaddelani dhaatedhene giwalimi wa Ababa. 16 Nyu kamugisakunle, mbwenye miyo gihusakulani, teto gihuthomani wihina mudhowe ni nvahegeve dhowima, dhowima dhihinaamale wihina ethu-siithu munaalobinyu wa Ababa ni ndina naaga, oliye uvaheni.
17 “Miyo ginurumani dhithu ndha wihina mudhivelanege mmodha nimukwaye. 18 Akala elabo enowuwiddani, munone wihina yambele ogiidda miyo ehinathi wuwiddani. 19 Mwahakale epaddi yelabo, elabo yerege wudhivelani mwaha okala epaddi yewa. Woona wihina kamuli epaddi yelabo, mbwenye miyo gusakunleni mwilaboni, bumwahaya elabo eguwiddani. 20 Mwawubuwele madhu guwaaddelimini: Mudhaari kanampitha nabwiye. Bumwahaya, akala ehigiharahara ni nyunwa enere wuharaharani. Akala ehawiwelela madhu aaga, enere wawiwelela madhu eenyu. 21 Mbwenye, enere wuwerelani dhithu ndha dhaatedhene mwaha wa ndina naaga, woona wi kimunonne Ole ogirumile. 22 Miyo gahere gahidha giwoga naaliwa, kayathukule nibili na yotheega yewa. Mbwenye vano kinna makalelo ookoodda yoothega yewa. 23 Muthu yoole anagiidda, onowawidda Ababa. 24 Miyo gahere gahapara mabasa yahinapariwege ni muthu mmodhaya, aliwa kayathukule nibili na yotheega yewa, mbwenye, aliwa ehigoona ni ogiidda ni Ababaya. 25 Mbwenye, eyo yereye wihina yakwanele madhu elebiwe Mmalamuloni mwewa, enihina: ‘Ehigiidda gihinna muladdu.’ 26 Adha namakavihera ginafunimi omuruma anakuma wa Ababa, muzimu webaribari, onakuma wa Ababa, oyo onere ovaha onamoona waaga; 27 vano, nyu munere ovaha onamoona, mwaha mwaali ni miyo okumana omambelelowene.