Aamulebeliye Titu
3 Kuselele wawubusedha wihina enaahiye wathithimiha ni wawiwelela anamathonga ni ale enna owedha ni ekalege owiwegeredhene wihina yaapare mabasa aatene apama, 2 ni yahaawogege obure athu amodha, yahikanganege mbwenye ekale athu ookweya yawonihaga opama athu aatene. 3 Teto ni iyoya, kale kananna mubuwelo wapama, kaniiwelela, nahimala oholosiwa, naali adhaari a munigwa ni dhohagalasa dhoohiyana-iyana, mweeddelo weehu waali wabure, naali a nrima, naali athu oohufwanelela ni nowiiddana mmodha ni mukwaye.
4 Vano nuwooneyihiwa opama wa Nvulusi ehu, Mulugu, ni odhivela anniyena ni athu aatene 5 iyo ovulusiwa (kahiyo mwaha wa mabasa owoogowa naapanrihu, mbwenye mwaha wa thagaraga dhaye) wodhela ohabihiwa onithukulele okanna egumi ni onisaddula wodhela muzimu wotxena. 6 Oliye ohunikuthulela muzimu oyo wotxena mwamahala wodhela Yesu Kiristu Nvulusi ehu 7 wihina namala wooniwa ninga athu owoogowa wodhela opama wohinifwanelela, nikale odhuulu mowiwanana ni ejhehedhelo ya egumi yohimala.
8 Madhu ala beebaribari teto miyo ginafuna wihina we odidele ovaha thima dhithu dhendha wihina ale enamuroromela Mulugu yubuwelege baahi werana dhithu dhapama. Dhithu ndha sathima ni dhinowakavihera athu.
9 Mbwenye orabele opokihana wootaduwa, osanyiha muselu dha makolo, okanganela dhithu ni wakanganela Malamulo, mwaha kadhinna mabasa newene mpurelo. 10 Wodhela muthu yoole anavuwiha dhohudhiha dhinaagawanya athu, omulage dila yoobajha ni yanabiili, vano aahuwiwelela ohiye weedda ni muthu yoyo* 11 mwaha we ohunona wi oliye ohuhiya ohara dila yapama ni anna otheega wula itorihaga mwinnya.
12 Gamuruma Artemaji obe Tikiku wihina adhe agumane ni we, werena dhaatedhene onandiwe wihina ogifwanye oNikopoli mwaha fuwengo ginafunimi okalawo mudhidhi wooriidha. 13 Wegeredhe dhaatedhene dhinahoweleya wihina olenddo wa Zena yoyo aanonne pama Malamulo vamodha ni Apolu weedde pama ofiyedha ohaahalela ethu. 14 Ni nlogo neehuna nihudhere* waapara mabasa apama, wodhela okavihera ni dhithu dhofuneya ni yahoweleyaga ethu-siithu mowaguva wihina aliwa enaakale athu ehinavaha dhowiima.
15 Aatene eli ni miyo enowaaruma malojhelo. Wafiyihedhe malojhelo aaga athu yaale enandhivela munroromeloni.
Opama wohinifwanelela okale ni nyu aatene.