Anapata Abiili Oohiyana

Izaki aganna yaka 40 omunona muhiyana dhaala ithaniwa Rabeka ni otelana. Izaki oomudhivela vanlubale Rebeka. Nuuvira mudhidhi, Rabeka okanna wari wabala anapata abiili.

Mwaana oobajha okuma aali Ezawu, ooharela aali Jako. Woona wi Ezawu oodhiveliwa osaya, kakarati vaade. Mbwenye Jako akiratesa vaade akaviheraga mabasa.

Mudhidhi yoole, mwaana oomusuza oohiyedhiwa mundda ni korowa makolo aye yakwa. Woona wi Ezawu aali munlubaleya, ahikanna oneti wohalana mukono dhowinjhiva ohiyana ni Jako. Mpaganyo Yehova eriliyena ni Abarawu dhookosa epaddi dha mukono oyo. Ezawu kaapwatha mukono ndho, mbwenye Jako oothabwa ovaha thima.

Labo nimodha Ezawu odhowa osaya mbwenye aahogolowe oogomeene. Nufiya vaade woona onukwela wa yoojha apiya Jako. Vano Ezawu owoga egi: ‘Gihithabwa ovoliwa, givahe mwana yoojha eyo!’ Jako omwakula egi: ‘Wapaganya ogivaha mukono wawo, miyo ginere wuvaha.’ Vano Ezawu wakula egihina: ‘Miyo ginafuna yoojha, kaginapwatha mukono ndho, podi ohalana dhaatedhene.’ Nerege ethu Ezawu eriliyena yaali yapama? Naari. Ezawu ahiyelela ethu yathima mwaha wa yoojha.

Izaki nuwuluvala woona wi wahifiya mudhidhi womureeliha mwanaye munlubaleya. Mbwenye woona wi Jako ahigula mukono ole, Rabeka oveda makalelo wihina Jako areelihiwe. Ezawu nuunona otakaleliwa ni ofunaga ompa ddibile. Woona wi Izaki ni Rabeka yofuna ombarela Jako, omuruma wihina akalege ni Labawu, murogoliye Rabeka ofiyedha onyanyuwa wa Ezawu omala. Jako wiwelela yolaga ele nuwindo odhowa okalaga ni titiyu aye Labawu.