Jako ni Ezawu Enowandana

Jako aadhowile okala murudda dhaala withaniwa Ara. Muwari mwa olenddo, Yehova opaganya wihina eere omusamalela, ninga amusamaleliye Abarawu ni Izaki. Yehova ahakwanihedha mpaganyo waye. Mudhidhi Jako agaali o Ara, otela okanna ahima owinjhiva ni okala ooreela.

Nuuvira mudhidhi Yehova owoga ni Jako egi: ‘Ohogolowele elabo ya makolo awo.’ Vano Jako ni emudhaaye omaga olenddo odhowaga oKanaa. Vano Jako onona wi Ezawu aanna omuharela ni alobwanaye 400! Jako wambela woova mwaha ubuwela wi eere omwerela obure oliye vamodha ni emudhaaye. Bumwahaya, olobela wa Yehova egi: ‘Yehova ginaloba mugivuluse mmadani mwa ddibilaga.’ Vano labo noharela, Jako ovahedha mukono dha mambila, mbuzi, ng’ombe, akamelu ni aburu wihina avahedhiwe Ezawu.

Emahiyu yeele Jako okalawo yeka, nuwindo omoona mungero. Aliwa obajha owana. Owana emahiyu yaatene ofiyedha Jako ohunyuliwa kondwa. Naarive dhigaali ndo oliye kaaselele. Jako afuna wihina mungero ole amureelihe ni awoge wihina Yehova kaamuhiye oliye wereliwa ethu yabure. Vano mungero ole owoga ni Jako egi: ‘Gihiye gidhowege.’ Jako omwakula egi: ‘Wahigireeliha miyo kaginuhiya.’

Mungero ole omureeliha Jako. Mwaha wa yeyo oliye okanna ebaribari wi kahowela omoova ddibile Ezawu.

Emambesi yeele, Jako omoona Ezawu vamodha ni alobwana aye 400 egaali wolapelawene. Numwaddamela Ezawu, Jako okokora dila tanu nabiili. Vano Ezawu othamaga okubarelana aabilene. Aabilene otomola kutho, nuumala aliwa wandana. Yehova ahihagalala nuwoona makalelo Jako aamarihiliye muladdu ole, kunoonelamo?

Nuwindo, Ezawu ohogolowela owaniwa, mbwenye Jako weeddagave olenddo waye ahogolowelaga elabo ya makolo aye. Jako aanna ahima 12. Mandiniwaya baala: ‘Rubeni, Simeyawu, Levi, Juda, Da, Nafitali, Gadi, Azeri, Izakari, Zebulawu, Juze ni Benjami.’ Yehova omulabihedha mmodha wa aliwa wihina avuluse emudhi yaatene. Aamulabihendhe aani? Nimakalelo baani? Kabe noone.