Matikiniho Yereyile Niya Yoofila

Farawo nuwiwa wi amwaana Ezarayeli yahidhowa, oliye wawerela anyakoddo aye egi: — ‘Mwegeredhe karo dhaaga dha koddo! Kabeni naathamagihe amwaana Ezarayeli! Kanaahiye aliwa odhowa!’

Mbwenye Yehova aanna watonyihedha amwaana Ezarayeli dilaya. Ohunona makaleloya aatonyihedhiye? Mutana alabihedha murabo mbwenye mahiyu alabihedha waara wakala ninga mootho. Nuuvira mudhidhi, amwaana Ezarayeli ofiya Niya Yoofila, vano Yehova owoga wi ejhehe vang’ono.

Mbwenye egaali vevale, amwaana Ezarayeli omoona Farawo vamodha ni anyakoddo aye edhaaga. Aliwa kayanna wothawelawo. Niya Yoofila yaali osogolo wewa vano munddulimwa okalamo akudda Ejipitu. Aliwa obajha woova ofiyedha wubuwela ohogolowela Wijipitu. Mbwenye Moyizeji oomuroromela Yehova. Bumwahaya owoga egi: — ‘Kamoove. Nijheehe wihina noone makalelo Yehova anafuniye onivulusa.’

Vano Yehova owoga wi amwaana Ezarayeli yiwegeredhe wihina emaruwe. Voharela, Yehova weeriha wihina murabo waali osogolo wa amwaana Ezarayeli ohogolowele mundduli mwewa. Vano murabo ole okala osogolo waakudda Ejipitu. Vano mburo waali amwaana Ezarayeli okalawo waara, mbwenye waakudda Ejipitu okalawo yiihive.

Yehova owoga wihina Moyizeji aavenyihedhe mada aye mu Niya Yoofila. Vano Yehova odhana nipevo emahiyu yaatene. Mwaha wa nipevo nne, Niya ele ogwaddeya vaari ni vaari, vano dhipaddi dhaabili okalaga ninga txinga dha manjhe. Mbwenye variva okalavo dila. Matxikwi ni matxikwi aamwaana Ezarayeli wabuwa ofiyedha kobela emodha.

Farawo naanyakoddo aye ovolowa muniya eviraga dila ele aafugunle Yehova. Vano Yehova wavunganyedha anyakoddo a Farawo ni wafugula maroda a karo dhewa. Anyakoddo ale okuwa yegi: — ‘Kabeni nihogolowele mundduli! Yehova dinawana ni iyo.’

Vano Yehova omuruma Moyizeji wihina avenyihedhe nlada muniya. Numala, manjhe aatene ohogolowa. Farawo naanyakoddo aye aatene okwela mu Niya Yoofila. Kaahanle newene mmodha.

Amwaana Ezarayeli woona dhithu erilena Yehova. Bumwahaya aliwa wambela wiiba jhibo wula ahiyanaya yinaga wihina emutamalele Yehova yegi: — ‘Mmwibele Yehova, mwaha peeno aatene iyo nihoona wi oliye da kopolo dhaatedhene! Oliye ohavokedha muniya akavalo naaleya yaweeddiha.’ Athu aatene yahithabwa ohagalala. Mwebaribarene amwaana Ezarayeli yahoobowa muudharini.