Moyizeji Kaamuddiwale Yehova

Onowubuwela wi emudhi ya Jako yahitamela Wijipitu, nga? Vano emudhi ele oroma winjhivana, aliwa ononiwa ninga amwaana Ezarayeli. Nuuvira mudhidhi wowinjhiva Jako ni Juze nuukwa, ogwelavo Farawo mmodha. Oliye obajha woova mwaha amwaana Ezarayeli yahithabwa winjhiva wapitha akudda Ejipitu. Bumwahaya, oliye wawaddihedhaga amwaana Ezarayeli olaba ninga adhaari mmunddani ni wuuba boloku. Mbwenye oliye woona wihina kaapurile ethu. Vano waruma ahima aateene aanalobwana aamwaana Ezarayeli yaabaliwe epiwe. Kunoonelamo wi amwaana Ezarayeli yahithuwathuwa?

Mudhidhi yoole, muhiyana dhaala aali mwizarayelita iithaniwa Jokibede okanna mwaana. Vano wihina Farawo ahimpe mwaana ole, Jokibede ompweha mmuddangani ni omukoya mmakupuni sere-sere ya muhinjhe wo Nilu. Murogoliye ithaniwa Miriya omusugweraga wihina oone ethu yampadduwele.

Vano, mwaana a Farawo a mwanamuhiyana odhowa ohaba. Nufiya wiiko, oliye woona muddanga mugaali mwaana unlaga. Oliye omweddela thagaraga. Vano Miriya omukoha mwaana a Farawo a mwanamuhiyana egi: ‘Munafuna wihina ganvede muhiyana wi amusamalelege mwaana ola wi akale enyu?’ Mwaana a Farawo omwakula egi: ‘Hee.’ Vano Miriya wawithana amaye mwaana ole, Jokibede. Vano mwaana a Farawo owoga ni Jokibede egi: ‘Omuthukule mwaana oyo ni omusamalele. Miyo ginere wuliva.’

Mwaana ole nuwunnuwa vang’ono, Jokibede onvahedha mwaana a Farawo. Vano mwaana a Farawo onvaha mwaana ole ndina na Moyizeji ni omusamalela ninga mwanaye ombala. Moyizeji aaleliwe ninga mwene teto ahikanna dhithu dhaatedhene afuniye. Mbwenye oliye ahinona wi aali mwaana Ezarayeli ni osakula okala ni nlogo na Yehova.

Aganna yaka 40, Moyizeji othoma okavihera nlogo naye. Labo dhaala, oliye omoona mu ejipisiyu anvadaga mwizarayelita. Nuwindo, Moyizeji onvada ni kopolo mu ejipisiyu ole ofiyedha okwa. Oliye onvuhelela vamutxesani. Mbwenye Farawo nunona, osayelaga ompa Moyizeji. Bumwahaya, Moyizeji othawela mburo onithaniwa Midiya. Mbwenye Yehova odidelave omukavihera.