Mburo Wihina Ebedhiwegemo Yehova

Moyizeji agaali omwangoni Sinayi, Yehova omuruma omaga musasa wapama withaniwa tabernakulu, wihina amwaana Ezarayeli emwebedhegemo Oliye. Moyizeji oohowela omaga tabernakulu ele mwamakalelo ookweya, wihina yandege okuna ni okunga teto wihina yandege othukula.

Yehova waloba amwaana Ezarayeli wihina evelelege ele yanniwana. Amwaana Ezarayeli ovelela oru, parata, kobere, mabwe athima, osalu wotxena, guwo, thebe naanenyama ni dhithu dhimodha. Yovelela dhithu dhowinjhiva ofiyedha Moyizeji owoga egihina: ‘Dhihakwana! Kamudhena dhithu dhimodha.’

Alobwana ni ahiyana owinjhiva yanonne werana dhithu dhohiyana-iyana, yokavihera omaga tabernakulu. Amodha yalaba ni guwo, amodha mabwe athima teto amodha oru obe tabwa. Yehova wakavihera amwaana Ezarayeli ohudhera dhithu dhaatedhene yahoweliwa wihina emagena tabernakulu.

Amwaana Ezarayeli omaga tabernakulu ele ndala ninga Yehova aarumiliye. Ode wa tabernakulu wahikala nthaddo, naalivo basiya na kobere ni altare munlubale. Mba mwahikala kurtina noowoma nagawa tabernakuluya dhipaddi biili, mburo Woweela ni mburo Wothabwesesa Weela. Muwari mwa mburo Woweela mwahikala panti ya oru, meza ni altare. Vano muwari mwa mburo Wothabwesesa Weela mwahikala nikasa na nipangano, yaali kaxa yasasanyiwe ni tabwa vamodha ni oru. Ohunona ddiniyani enatapulela nipangano? Nipangano enatapulela mpaganyo wathima. Nikasa na nipangano nowawubusedha amwaana Ezarayeli wihina aliwa yaahipaganya omulabela ni omwiwelela Yehova baahi.

Yehova wasakula amwaana a Arawu wihina ekale anamakutha. Aliwa yohowela osamalela tabernakulu ni dhovelela nlogo nanvahiwa Yehova. Yehova omusakula Arawu wihina akale namakutha munlubale. Oliyene baahi dafwanelela ovolowa mburo Wothabwesesa Weela, dila modha vayakani. Ohunona mwahaya bwaddi? Wihina amulobe Yehova nikurumuwelo na dhotheega dhaye, dha emudhaye ni dhaamwana Ezarayeli.

Tabernakulu ele yamanle omagiwa nuuvira yaka modha amwaana Ezarayeli egakumile Wijipitu. Vano aliwa yahikanna mburo wihina emwebedhegemo Yehova.

Yehova weeriha wihina murabo okume vadhulu va tabernakulu. Muulenddoni mwewa murabo ole wimela naaliwaya yowimela vevale. Vano murabo ole wabajha weedda, naaliwaya yohogolowela weedda olenddo wewa. Yera ndo aliwa yokuna tabernakulu ni oharaga murabo.