Aliwa Kiyandile Wakwanihedha Mpaganyo Wewa

Yehova omwaddela Moyizeji wihina agwele omwangoni Sinayi. Okala wengo malabo owakwana 40. Yehova waleba malamulo kumi athima vatabwani biili dha mabwe. Malamulo ala enoniwe ninga Malamulo Kumi.

Nuuvira mudhidhi amwaana Ezarayeli obajha wubuwela wihina Moyizeji kaahogolowe. Bumwahaya aliwa owoga ni Arawu yegi: ‘Moyizeji ohurimeela. Nnomuhowela muthu wihina anivenyihewo wuno. Omukose Mulugu ehu!’ Vano Arawu wera: ‘Mudhena oru.’ Oliye ohisa oru ndhe onyungulusa ni okosa ekwamuthu ya oru. Amwaana Ezarayeli nuwoona ekwamuthu ele, obajha webedha ni wawerana mathanga. Aliwa owoga yegi: ‘Ekwamuthu ela di mulugu ehu anikumihile Wijipitu!’ Nerege amwaana Ezarayeli yohowela werana eyo? Naari. Mwaha aliwa yaahipaganya omwebedha Yehova baahi. Mbwenye kiyandile wakwanihedha mpaganyo wewa.

Yehova nuwoona ethu yapadduwa, owoga ni Moyizeji egi: ‘Okite wihina wawoone amwaana Ezarayeli. Aliwa ehihiya ogiwelela ni enna webedha ekwamuthu.’ Moyizeji okita omwangoni Sinayi agahiddele tabwa biili dha mabwe vaalebiwe malamulo kumi.

Mudhidhi akitaga wiiwa nlogo niibaga, teto aajaga ofiya wawoona yinaga ni yebedhaga ekwamuthu ya oru. Moyizeji otakaleliwa vanlubale. Ovoka tabwa ndhe biili dha mabwe ni kopolo dhaatedhene ofiyedha opweseya. Moyizeji omukoha Arawu egi: ‘Mwahaya bwaddi odhe osasanyege ekwamuthu ya oru?’ Ethu weriliwena sonyakavala. Arawu wakula egihina: ‘Kamwerena, kamutakaleliwe. Nyu muhaanona amwaana Ezarayeli. Aliwa yanfuna mulugu wihina emwebedhege. Vano, aliwa odhana oru, miyo onyungulusa nuwindo osasanya ekwamuthu ela.’ Moyizeji ohogolowela omwangoni Sinayi wihina amulobe Yehova wi aalevelele amwaana Ezarayeli.

Yehova aalevelele baahi ale yamwiwelela. Onowoona? Yehova onothabwa ovaha thima wiwelela.