Yehova Ahimusakula Jozuwe

Muwari mwa yakadhene, Moyizeji daasamalela amwaana Ezarayeli. Mbwenye vano aahanlena malabo mang’onove wihina akwe. Bumwahaya Yehova adhe awogege nuliye egi: ‘Kunaathukulele amwaana Ezarayeli oKana, elabo gaapaganyimi wavaha. Ginere wuwoniha elaboya wolapelawene.’ Moyizeji omuloba Yehova wihina amusakule muthu mmodha wihina aasamalelege amwaana Ezarayeli. Vano Yehova omusakula Jozuwe.

Moyizeji wawaddela amwaana Ezarayeli wihina eere okwa. Teto wawaddela wi Yehova ahimusakula Jozuwe wihina aakavihere ovolowa oKana. Nuwindo Moyizeji owoga ni Jozuwe egi: ‘Kuwoove. Yehova anere wukavihera.’ Nuwindo, Moyizeji ogwela vamwangoni withaniwa Nebu. Yehova omooniha elabo aampaganyiliye Abarawu, Izaki ni Jako. Moyizeji nuumala woona elabo ele oliye okwa aganna yaka 120.

Vano Yehova owoga ni Jozuwe egi: ‘Wabuwe mwihinjhe Jordawu ni ovolowe oKana. Miyo ginere wukavihera ninga gimukaviherimi Moyizeji. Malabo aamatene wilerigi nlamulo gaavahilimi amwaana Ezarayeli. Kuwoove. Okale ooliba murima. Odhowe ni werena dhaatedhene gurumilimi.’

Vano Jozuwe waruma alobwana abiili wihina yeeddelele oJeriko. Thalako enaharela nnere onona dhithu dhaapadduwile. Anameddelela ale nuhogolowa, aliwa owoga wihina waali mudhidhi wofwanelela wi evolowe oKana. Vano Jozuwe wawaddela amwaana Ezarayeli wihina yiwegeredhe, mwaha yohowela wabuwa muhinjhe Jordawu. Oliye waruma anamakutha yathukunle nikasa na nipangano wihina esongole. Nufiya muhinjhe Jordawu, aliwa woona wihina mwihinjheya wahidhaala, mwaha wa yeyo kiyakale yokweya wabuwa. Anamakutha nuwanyingala manjhe, mwihinjhe ole wumma. Aliwa okalave mwemune ofiyedha amwaana Ezarayeli aatene wabuwa. Eyo yahaathukulela amwaana Ezarayeli wubuwela ethu Yehova eeriliyena mu Niya Yoofila.

Vano, amwaana Ezarayeli yahifiya mburo Yehova aapaganyiliye. Aliwa yerege omaga nyumba dhewa, txinga dha luwani ni yerege waala dhowima dhafuniwa. Yaali elabo yapama ni yowoma.