Anameddelela 12

Amwaana Ezarayeli nukuma omwangoni Sinayi weeddaga olenddo wewa mwiddeddereni. Nuufiya mburo dhaala onithaniwa Kadeji, Yehova owoga ni Moyizeji egihina: ‘Waasakule alobwana owakwana 12, mmodha a kadda nihimo, wihina yeeddelele elabo yoKana.’ Vano Moyizeji owoga ni alobwana ale 12 egi: ‘Nvolowe oKana wihina moone akala elaboya sapama ni akala enofwanelela olimiwa. Moone makalelo eli luwaniya teto akala nlogona tha kopolo obe naari.

Nuuvira malabo 40, anameddelela ale ohogolowa oKana eganna figu, roma ni uva. Vano aliwa wawaddela amwaana Ezarayeli dhithu yoniliwa yegi: ‘Elaboya sapama mbwenye nlogona tha kopolo. Teto luwanidha dhihikanna txinga dholapa.’ Mbwenye Kalebe mmodha wa anameddelela ale owoga egi: ‘Naarive dhigaali ndo nnere wanda wagonjhiha. Ndoweni ovanene!’ Ohunona mwahaya bwaddi Kalebe adhe awogege ndo? Mwaha oomuroromela Yehova ndala ninga nameeddelela mmodhaya ithaniwa Jozuwe. Mbwenye anameddelela amodhaya 10 owoga yegi: ‘Naari! Athu ooKana ehithabwa woopiha! Bumwahaya iyo nuufiya yanoona ninga kwaakwa.’

Amwaana Ezarayeli nuwiwa dhithu yawogile anameddelela, obajha wawoova akananewu. Aliwa obajha owoga yegi: ‘Nihogolowele Wijipitu.’ Vano Jozuwe ni Kalebe obajha wakurumusa amwaana Ezarayeli yegi: ‘Kamuthuwathuwe, Yehova anere onibarela. Nimuroromele oliye baahi.’ Mbwenye amwaana Ezarayeli kiyafunawene ovuruwana. Yahanle neena nuumpa Jozuwe ni Kalebe!

Ki Yehova aali aavi? Oliye owoga ni Moyizeji egi: ‘Gihawerela dhithu dhapama dhowinjhiva amwaana Ezarayeli mbwenye aliwa kinafuna ogiwelela. Bumwahaya, aliwa enakalege mwiddeddereni muwari mwa yaka 40 teto enaakwele mwemuna. Anaavolowe elabo yoKana di Jozuwe, Kalebe ni ahima aamwaana Ezarayeli.’