Mwaana a Maamukwele Ohogolowela Okalawo

Muwari mwa yaka ndhe muzongwe ahirubwaga, Yehova omuruma Eliyaji oSarefa. Wengo eere onfwanya maamukwele aanvahege yoojha Eliyaji. Nuufiya, Eliyaji omoona muhiyana dhaala addoddelaga kwini. Oliye aali maamukwele yole Yehova aamuwogiliye. Vano Eliyaji omuloba pawu ni manjhe. Maamukwele ole omwaakula egi: ‘Miyo kaginna pawu, ginna othu vang’ono ni mwanamakura. Mbwenye dhithu ndho dhinagakwane miyo ni mwanaga baahi.’ Eliyaji omwaakula egi: ‘Yehova ohupaganya wihina wagivaha pawu, othu wawo ni makura kinaamale ofiyedha muzongwe ohogolowela orubwa.’

Vano, maamukwele ole ohogolowela vaade ni wegeredha pawu wihina anvahe Eliyaji. Ninga Yehova aapaganyiliye maamukwele ole ni mwanaye okanna dhoojha muwari mwa yaka ndhe dha dala. Othu waye ni makura aye kiyamalamo.

Mbwenye opadduwa ethu yowukuliha. Mwaana a maamukwele ole okala muredda ofiyedha okwa. Maamukwele ole omuloba Eliyaji wihina eerena ethu-siithu. Eliyaji omuthukula mwaana ole mmadani mwa amaye omudhowana okwartu yodhulu ya nyumba ele. Oliye omukinantiha vakamani nuwindo olobela egi: ‘Yehova, ginaloba wihina mmuhogolosele egumi mwaana ola.’ Ethu aalobile Eliyaji yakala ninga kiyandeya! Mwaha okuma kale yaali ehinapadduwege ethu ninga yele Eliyaji aalobiliye. Teto maamukwele ole ni mwanaye kiyaali epaddi ya nlogo na Yehova.

Mbwenye mwaana ole ohogolowela okalawo! Eliyaji owoga ni maamukwele ole egi: ‘Kasugwa! Mwanawo ohuhogolowela okalawo!’ Maamukwele ole ohagalala ni owoga ni Eliyaji egi: ‘Vano gihinona wihina nyu muli mulobwana a Mulugu ni wihina madhu eenyu enadhela wa Yehova ni beebaribari’!