Yehova Ahimusamalela Eliyaji

Jezabeli wiwa wihina Eliyaji ahaapa anamavuhulela a Bahali, mwaha wa yeyo oliye kaadhiveliwe. Vano oliye wera eere omuwelihedha kunyawunya Eliyaji mwaha wapa anamavuhulela a Bahali. Mwaha wa yeyo, Eliyaji obajha woova, nuwindo oliye othawela mwiddeddereni. Eliyaji olobela egi: ‘Yehova, miyo gihigoma. Ginaloba mugipe.’ Eliyaji ahithabwa ogoma ofiyedha ogona vati va muthanko.

Vano Yehova omuruma mungero. Mungero ole onvenyiha Eliyaji ni owoga egi: ‘Eliyaji kavenya, gihidhanna yoojha wihina ojhe.’ Vano Eliyaji woona pawu ni jaro ya manjhe. Nuwindo, oliye ojha, ong’wa ohogolowela ogona. Mungero ole ohogolowela onvenyiha egi: ‘Kahogolowela ojha, mwaha onere ohowela kopolo wihina weedde olenddo.’ Oliye nuujha, weedda olenddo wa malabo 40, vano ofiya mwango dhaala withaniwa Orebe. Nufiya, oliye ovolowa onikunguni ogonaga. Mbwenye Yehova oomuthuwathuwela bumwahaya adhe amukohege Eliyaji ethu yamuthukulele wukuwa ni othawa. Eliyaji waakula egi: ‘Nabwiya Yehova, amwaana Ezarayeli yahipaganya wuwebedhani mbwenye enawebedha amulugu owoota. Aliwa ehaapa anamavuhulela aatene, vano enafuna egipe ni miyoya.’

Vano Yehova omuloba wihina akume munikunguni mune iimele vamwangoni wihina amoonihe kopolo dhaaye. Vobajha, oliye weriha wihina nipevo ninlubale nivire munikunguni. Voharela, oliye odhana oddiginyeya weelabo ni mootho. Vogomihedha, Eliyaji wiiwa ndhu na vati-vati. Oliye okuneela wintoni ni ovenyawo onikunguni. Yehova omukoha egi: ‘Eliyaji, othawele ddi?’ Nuwindo oliye waakula egi: ‘Miyo githawile mwaha kaavo anuwebedhani, ahili miyo baahi.’ Yehova omwaakula egi: ‘Naari, we kuli weeka. Gihikanna athu owakwana 7000 wIzarayeli enagebedha. Vano, Yehova omwerela Eliyaji wihina anvede Elizewu wi akale namavuhulela vamburoni vaye. Eliyaji kaalegenle, oliye wiwelela dhithu aawogile Yehova. Nnahudhera ddi ni thalako ya Eliyaji? Nnahudhera wi neragana dhithu ananiruma Yehova, oliye aneere onisamalela. Mbwenye vano kabe nihogolowe wihina noone ethu Eliyaji eeriliyena dhihinapadduwe dhithu ndha.