Joziya Oodhiveliwa Ohudhera Wodhela Yehova

Joziya aathomiwe ninga mwene aganna yaka 8, teto mudhidhi yoole athu owinjhiva yowerana dhithu dhabure dhamutakalela Yehova. Aliwa yowerana dhithu ninga, masenga ni yowawebedha amulugu owoota. Joziya nuwakwaniha yaka 16, osayela onona makalelo apama oomwebedha Yehova. Teto nuuwakwaniha yaka 20, oliye ogujhula dhikwamuthu ni aaltare aatene aamulugu owoota ooJuda. Vano nuwakwaniha yaka 26, oliye oruma wihina ewomihedhiwe tempulu.

Mudhidhi ewomihedhiwaga tempulu, namakutha munlubale Elkiya ofwanya rolu ya Malamulo a Yehova, podi wera rolu ele yalebiwe ni Moyizeji. Vano Safa, namaleba a mwene othukula rolu ele wi amoonihe mwene Joziya, nuwindo Safa wambela wileri rolu ele ni ndhu nootaama. Joziya nuwiwa wileriwa wa rolu ele, oliye wukuuwa vanlubale, mwaha nlogo nanna werana dhithu dhamutakalela Yehova. Nuwindo, Joziya owoga ni Elkiya egi: ‘Mwebaribarene Yehova ohutakaleliwa vanlubale ni iyo, kadhowani mwawoge nuliye. Yehova aneere owoga ethu nnahowelihu werana.’ Yehova wawaddela egi: ‘Woona wihina athu ooJuda ehigisukuma, aliwa enere osinyusiwa. Mbwenye ndho dhinaapadduwe Joziya akwa, mwaha oliye nuwawiwa Malamulo aaga, ohusayela werana ele eli yapama.’

Joziya nuwiwa yowakula ya Yehova wodhela muselu ole, odhowa otempulu, nuwindo watugumanya athu aatene ooJuda. Vano oliye wawileri Malamulo a Yehova ni ndhu nootaama wihina athu aatene yiiwe wileriwa wa Malamulo ale. Nuwindo Joziya ni nlogo opaganya wawiwelela Malamulo a Yehova ni murima wewa waatene.

Ohiya eyo, muwari mwa Malamulo ale Joziya awileriliye, oliye woona wihina Yehova oofuna wi nlogo naye naajhege mathanga a Paskwa yaka dhaatedhene. Mbwenye dhahivira yaka dhowinjhiva maJudewu yahajhaga mathanga a Paskwa. Bumwahaya, Joziya wawegeredha mathanga a Paskwa. Oliye wapeleka anenyama owinjhiva wihina ekuthiwena mukutho ni wawegeredha anamiba wi ekalege otempulu wi emwibelege jhibo Yehova. Vano Paskwa numala, nlogo wawegeredha mathanga mamodha yamanle sumana yantero, yithaniwa Mathanga a Pawu dhohikanna Emela. Dila yogomihedha yaweriliwana mathanga ninga yaala, waali mudhidhi wa namakutha Samuweli. Joziya oodhiveliwa vanlubale ohudhera wodhela Yehova ni wahudhera Malamulo aye. Ki we, onodhiveliwa ohudhera wodhela Yehova.