Jeremiya Ahilaleya Nuuliba Murima

Yehova ahimusakula Jeremiya wihina akale namavuhulela ooJuda. Jeremiya ohowela wawaddela athu wihina ehiye dhithu dhabure yeriwana. Oliye owoga egi: ‘Yehova miyo gili mwana muzombwe. Miyo kaginande owoga ni nlogo.’ Yehova owoga nuliye egi: ‘Jeremiya Kuwoove. Ginere wuwaddela dhithu onafuniwe owoga ni ginere wukavihera.’

Labo dhaala, Yehova omuruma Jeremiya wihina aatugumane alobwana athima ooJuda wi apwese jaro yologo vamentoni vewa. Nuwindo awaddele wi yeere opadduwa ethu emodhave ni Jeruzale ninga epadduwile ni jaro ele. Jeremiya nuupwesa jaro ele vamentoni vaalobwana ale, aliwa otakaleliwa vanlubale, ofiyedha namakutha mmodha iithaniwa Pazur onvada Jeremiya, ommaga ni onvolosiha mada ni manyalo aaye mutabwani. Jeremiya ahimala emahiyu yantero ahandaga widdiginya. Vati nuusa oliye otapuliwa. Jeremiya wukuuwa vanlubale ofiyedha owoga wi kahogolowele olaleya. Mbwenye nerege Jeremiya ahiselela olaleya? Naari. Oliye wubuwelela ni owoga egi: ‘Muthenga wa Yehova oli ninga mootho onahidda mmurimani mwaaga. Kaginanda ohiya olaleya.’

Nuuvira Yaka, mwene muxa obajha othonga oJuda. Anamakutha ni anamavuhulela owoota yowiidda dhithu awoga Jeremiya. Mwaha wa yeyo, aliwa waruma, alobwana ooJuda wihina yampe Jeremiya. Mbwenye Jeremiya owoga egi: ‘Akala munafuna mugipe, munagipela ebewene. Mwaha wi dhithu ginawogimi kadhinadha wa miyo mbwenye dhinadhela wa Yehova.’ Vano Alobwana ale yafuna ompa Jeremiya nuwawiwa madhu aawogiliye aliwa owoga yegi: ‘Mulobwana ola kanafwanelela opiwa.’

Jeremiya kaaselele olaleya. Mbwenye nuuvira mudhidhi alobwana ale wambela omwiidda ni omuloba mwene wihina ampe Jeremiya. Vano mwene owoga wihina aliwa podi werana ele yafuniwa. Nuwindo, alobwana ale othoma ompa Jeremiya. Aliwa omuhidda ni onvokedha mmuliddini mooddiha mwadhanle maddogu. Jeremiya obajha oddadda.

Ebede-Meleki nuwiwa ele yampadduwele Jeremiya, oliye odhowa owoga ni mwene egi: ‘Alobwana ale ehinvokedha Jeremiya mmuliddini. Ahikumihiwamo aneere okwa!’ Mwene omuruma Ebede-Meleki ni alobwana owakwana 30 wihina yamukumihe Jeremiya mmuliddini mune. Naarive dhigampadduwele dhithu dhowinjhiva, Jeremiya aali ooliba murima ni kaselele olaleya. Ki we? Onofuna okala ninga oliye?