Ogujhuliwa wa Jeruzale

Muwari mwa yaka dhowinjhivadhene, Yehova owaruma anamavuhulela wihina yaakavihere maJudewu omuhogolowela Yehova, mwaha aliwa yomusukuma Yehova ni yowawebedha amulugu owoota. Mbwenye yowukulihaya, sowihina athuya kayawiwelela anamavuhulela. Teto ohiya wavuruwana yawogaga, yeresa wateya. Vano ethu baani Yehova, afuniye werana wihina amarihe webedha wule wowoota?

Mudhidhi yoole, Nabukodonozori mwene oBabiloniya, anna othukula luwani dhohiyana-iyana wihina athongege. Oliye ovolowa muJeruzale ni ommaga mwene Juwaki ni adhaari aye, teto waamaga anyakoddo ni athu owinjhiva ooJuda ni wathukulela oBabiloniya. Ohiya eyo, mwene Nabukodonozori othukula dhoreela dhaatedhene dhafwanyeya mutempulu mwa Yehova, nuwindo omuthoma Zedekiya wihina akale mwene vamburoni va Juwaki.

Omambelelowene Zedekiya oomwiwelela mwene ooBabiloniya. Mbwenye anamavuhulela amodha owoota ni athu amodha omutujela Zedekiya wihina amurugunuwele mwene ooBabiloniya. Vano namavuhulela Jeremiya omwaddela egi: ‘Wahiya omwiwelela mwene ooBabiloniya, dhinere opadduwa dhithu dhabure oJuda. Athu owinjhiva enere okwa, enere ofwanyiwa dala ni enere okala aredda.’

Nuuvira yaka 8, Zedekiya othoma omurugunuwela mwene ooBabiloniya ni oloba nikavihero naanyakoddo oWijipitu. Vano, mwene Nabukodonozori waruma anyakoddo aye wi emurijhe Jeruzale ni emugujhule. Mbwenye Jeremiya omwaddela Zedekiya egi: ‘Wipeleke mmadani mwa mwene ooBabiloniya! Yehova awogile wihina werana ndo, we ni luwani yawo munere ovuluwa. Mbwenye wahiipelaka, anyakoddo ooBabiloniya enere opaha luwani yoJeruzale ni enere wumaga.’ Vano mwene Zedekiya omwakula egi: ‘Giipeleke? Kaginadha gerana!’

Nuuvira yaka modha ni meya, anyakoddo ooBabiloniya ovolowa luwani yoJeruzale, nuwindo ompaha Jeruzale, teto aliwa opaha tempulu, waapa athu owinjhiva ni wathukulela athu amodha oBabiloniya wihina yakale adhaari.

Mwene Zedekiya othawawo oJeruzale, naarive dhigaali ndo, anyakoddo ooBabiloniya odhowa ommaga ni omuthukulela wa mwene Nabukodonozori. Nuwindo mwene Nabukodonozori oruma wihina ahima a Zedekiya epiwe vamentoni vaye. Voharela oliye ompudula mento Zedekiya ni omuhiya mukambura ofiyedha okwa waye. Mbwenye Yehova wapaganya maJudewu egi: ‘Dhavira yaka 70, ginere wuhogoloselani oJeruzale.’

Mbwenye wahinona wihina azombwe amodha yamudhivela Yehova yahithukuleliwa ooBabiloniya? Ddiniyani yaapadduwele? Nerege yeere odidela okala oororomeleya wa Yehova?