Azombwe Annayi Enomwiwelela Yehova

Mwene Nabukodonozori afuna wihina adhaari amodha ooJuda emulabelege. Vano oliye omuruma Aspenaji wihina aasakule azombwe yanna egumi yapama ni ooxaga. Azombwe ayo, yeere oxagihiwa muwari mwa yaka tharu. Azombwe ayo yaasakuliwe yeere ohudhihiwa wileri, oleba, ni owoga ewogelo yoBabiloniya. Teto yerege ojha dhithu dhajha mwene ni athu aatene yakala opalasiyu. Mandina a azombwe ale annayi yaasakuliwe baala: Daniyeli, Ananiya, Mizayeli ni Azariya. Mbwenye Aspenaji wavaha mandina mamodha wi yithaniwegena. Mandinaya yaali ala: Beltesazar, Sadaraki, Mezaki ni Abedenegu. Nerege oxagihiwa yafuniwa wakela oBabiloniya were ononga wandana wewa ni Yehova?

Azombwe ale yahithoma omwiwelela Yehova. Aliwa yahinona wihina malamulo a Yehova yokoddiha ojha dhithu yajha aBabiloniyu. Bumwahaya aliwa owoga ni Aspenaji ni omuloba wihina yahijhege dhithu dhajha mwene. Aspenaji wawakula egi: ‘Nyu mwakoodda ojha dhithu anajha mwene, teto mwambela wondda, miyo ginere opiwa!’

Mbwenye Daniyeli odhowa othapanya ni mulobwana aasamalela. Oliye omukoha egi: ‘Munoonamo aavi munehe wodhela onivaha mataba ni mahinjhe baahi muwari mwa malabo 10? Vano malabo ala yamala, muniliganihe ni azombwe amodha enajha yoojha ya mwene.’ Nuwindo mulobwana ole aasamalela orumedha ele awogile Daniyeli.

Nuuvira malabo 10 Daniyeli ni akwaye yahikanna egumi yapama wapitha azombwe amodha yajha yoojha ya mwene. Teto Yehova ahihagalala vanlubale mwaha wiwelela wewa, ofiyedha onvaha thotho Daniyeli wihina atapulele dhoroha dha mwene.

Numala waxagiha, Aspenaji wathukulela azombwe aatene wa mwene Nabukodonozori. Nuwindo mwene othapanya ni azombwe aatene ni wonelamo wihina Daniyeli, Ananiya, Mizayeli ni Azariya yaali azombwe ooxaga ni athotho. Bumwahaya adhe aasakulege wihina yalabege opalasiyu wa mwene. Teto mwene owaloba monelo wewa wihina emukavihere weddiha muselu dhathima. Yehova ahimukavihera Daniyeli vamodha nakwaye okala athotho wapitha adhaari a mwene.

Daniyeli, Ananiya, Mizayeli ni Azariya yaali wolapela ni elabwiwa vamodha ni emudhiwa. Naarive dhigaali ndo, aliwa kiyamudduwale Mulugwiwa Yehova. Ki we? Nerege onere odidela omubuwela Yehova naarive makolo awo egaali wolapela ni we?