Yesu Onoolaleya Wodhela Omwene wa Mulugu

Nubaddiziwa, Yesu obajha owoga naathu aatene wodhela Omwene wa Mulugu. Yesu oolaleya oGalileya ni oJudeya teto anamahara aye yodhowa nuliye. Nuwindo Yesu odhowa oNazare, luwani unnuwiliyewo. Nufiya, ovolowa musinagoga ni wileri ni ndhu nootama yovuhulela ya Izayiya yawoga yegihina: ‘Yehova ohugivaha muzimu wotxena wihina gilaleye muthenga dhapama.’ Ohunona mwahaya bwaddi Yesu adhe aawogege madhu ala? Mwaha athu yafuna wihina oliye aweregena matikiniho baahi. Mbwenye Yehova ahinvaha muzimu wotxena wihina alaleye wodhela Omwene wa Mulugu. Vano Yesu owoga egi: ‘Yovuhulela ela ya Izayiya ehakwanela peeno.’

Nuwindo, Yesu odhowa niya yoGalileya ni wafwanya anamahara aye annayi. Aliwa yithaniwa Peduru, Andere, Tiyagu ni Juwawu teto yaali anamameza. Yesu owoga naaliwa egi: ‘Mugiharege, miyo ginere wuhudhihani okala anamameza aathu.’ Mohilegela, aliwa wahiya mathaviwa omuharaga Yesu. Aliwa weedda oGalileya watewene elaleyaga wodhela Omwene wa Yehova. Aliwa yahudhiha musinagoga, mburo mwafwanyeya athu owinjhiva ni mudila. Wengo wadhowa Yesu athu owinjhiva yomuhara. Ni oSiriyawa waali wolapela ni oGalileya wiwa ewogiwaga wodhela Yesu.

Nuuvira mudhidhi, Yesu wavaha kopolo anamahara aye dhowavulumusa aredda ni wawigara ademoniyu. Yesu alaleya luwani ni luwani, murudda ni murudda vamodha ni anamahara aye. Ni ahiyanaya oororomeleya ninga Mariya Madalena, Jowana ni Suzana yowerana dhaatedhene yandiwa wihina emukavihere Yesu vamodha ni anamahara aye.

Yesu nuumala waxagiha anamaharaye, aliwa odhowa olaleya oGalileya watewene. Athu owinjhiva yiwale muthenga wa Omwene okala anamahara ni obaddiziwa. Mbwenye athu owinjhiva yofuna wiiwa wodhela muthenga wa Omwene. Athu ale yaali owinjhiva ofiyedha Yesu waliganiha ni mundda wa tirigu wahowela ohaddiwa. Bumwahaya Yesu owoga egi: ‘Mulobele wa Yehova wihina aarume athu amodha wi yapare mabasa oohadda.’ Nuuvira mudhidhi Yesu waasakula anamahara 70. Oliye waruma abiili-abiili wihina yalaleye muthenga wodhela Omwene wa Mulugu oJudeya waatewene. Anamahara ale wahudhiha athu aatene. Aliwa ohogolowa oohagalalene ni omwaddela Yesu makalelo mabasa ale yeeddiliwa. Ddiyabo kaandewene wamaaliha mabasa ale oolaleya.

Woona wi Yesu eere ohogolowela odhulu, oofuna wihina anamahara aye edidele wapara mabasa ale. Oliye waruma eegi: ‘Mulaleye wodhela Omwene wa Mulugu elabo yaatene. Mwahudhihe athu aatene Madhu a Mulugu ni mwabaddize.’