Yesu Anoohogolowela Odhulu

Yesu ahidhowa ogumana ni anamahara aye oGalileya. Oliye wahiyedha mutholo wathima, owoga egi: ‘Kadhowani mwaakavihere athu enafwanyeya elabo yaatene yavati wihina ekale anamahara aaga, mwahudhihaga dhithu dhaatedhene muhudherinyu ni miyo ni mwabaddizaga ni ginowupaganyani wi ginaakale ni nyu.’

Yesu ahathwanyuwela anamahara aye oGalileya ni oJeruzale muwari mwa malabo 40. Oliye wahudhiha dhithu dhowinjhiva ni wawerana matikiniho. Nuwindo Yesu owoga egi: ‘Kamukumemo muJeruzale, mbwenye mudidele ojheha ele Mulugu apaganyiliye.’

Mbwenye anamahara a Yesu kayonelemo pama ele Yesu aawogiliye. Vano Yesu nuugumana dila yogomihedha ni anamahara aye aliwa omukoha yegi: Nyu munere okala mwene owIzarayeli? Yesu wakula egi: ‘Vamentoni va Yehova kunathi ofiya mudhidhi wihina gikale Mwene. Mohilegela munere wakela muzimu wotxena teto munere okala anamoona aaga, munere olaleya oJeruzale, oJudeya ni oSamariya ofiyedha wigomele elabo yaatene.’

Nuwindo Yesu wambela odhowa odhulu. Vano murabo omukuneela, anamahara aye vano kuhandaga omoona.

Voharela anamahara ale okumawo omwangoni woolivera ni odhowa oJeruzale, aliwa yahikanna elemelelo yotugumana ni olobela, wula ejheehaga wihina Yesu awaddele ethu aliwa yahoweliwa werana.