THALAKO 101
Pawulo Adhowaga oRoma
Olenddo wanatharu wolaleya wa Pawulo waagomele oJeruzale. Agaali wengo oliye omagiwa ni ovokedhiwa mukambura. Emahiyu dhaala, Yesu omukumelela Pawulo murohani ni omwaddela wihina adhowe alaleye oRoma. Pawulo othukuliwa oJeruzale ni odhowiwana oSezareya, ahimala yaka biili agaali mukambura. Vano nufiya mudhidhi wihina athongiwe ni mwene Festu, Pawulo oloba egi: ‘Ginafuna gathongiwe ni mwene Sezare oRoma.’ Festu wakula egi: “We olobile odhowiwana wa Sezare, Sezare aneere wutoriha.” Nuwindo Pawulo ogwelihiwa mbarkuni odhowa oRoma. Akwaye abiili yeedda nuliye yithaniwa Lukaji ni Aristarku odhowa vamodha.
Mudhidhi egaali mulenddoni muzongwe obajha orubwa malabo owinjhivene. Aatene yaali mbarkuni mune yubuwela wihina yere okwa. Mbwenye Pawulo wawaddela egi: ‘Alobwanani, mulibe murima! Iyo kannaakwe mwaha mungero ohugaddela murohani egi: “Pawulo kuwoove. Mwaha we onere ofiya oRoma teto aatene eli ni we mbarkuni enere ovuluwa.
Muzongwe ole a nipevo orubwa muwari mwa malabo 14. Vano alobwana yaali mbarkuni mune woona eliga dhaala ni ofunaga wihina edhowe eliga yele. Yaali eliga yoMalta. Barkuya nufiya vamutxesani oseya nuwindo ogujhuwa, mbwenye athu aatene yaali mbarkuni mune owakwana 276 yahivuluwa. Wihina yande wabuwa athu amodha yera ohabelela, amodha yahiddela dhiparuparu dha barku dhambeluwa. Athu ooMalta wasamalela ni otubanya mootho wihina yothege.
Vano nuuvira mweri miraru, anamasugwera kambura omuthukulela Pawulo oRoma emulabihedhaga barku mmodhaya. Nufiya oRoma, addibila odhowa ogumana nuliye. Nuwawoona addibila efiyaga Pawulo omutamalela Yehova ni othabwaga oliba murima. Naarive agaali munyakambura, Pawulo ereege okala nyumba yowalugariwa mbwenye asugweriwaga ni munyakoddo mmodha. Oliye okala wewule yaka biili. Athu yadhowaga ompaada Pawulo, oliye oowoga naaliwa wodhela Omwene wa Mulugu ni wodhela Yesu. Teto oliye owalebela makarta mulogo wo Aziya Mung’ono ni oJudeya. Mwebaribarene thalako ya Pawulo enowoniha wihina Yehova oomulabihedha wihina aathukulele muthenga wa athu aatene ni mburo dhohiyana-iyana.
“Nnowoniha wi nili amwimeleli a Mulugu, wodhela ovilelana dhoweha dhowinjhiva, dhohosa, orabula, wonihiwa goyi.” — 2 Korintiyu 6:4